Read Biatah Bidayuh 1 THESSALONICA 1 Bible Online

1 THESSALONICA 1 - Biatah Bidayuh bible

1 THESSALONICA 1

¹ So Paul, Silas, ka Timothy nuju bara daya eklisia di Thessalonica, adi mbŭh daya adi Tapa Sama ngga Tuhan Jesus Kristus dapu. Isa-i pinyirasi-mandis Tapa ka damai-I agi ngga angān.

²Kieh nggen trima kaseh di Tapa yŭn sopŭrŭg ngan, buang siraru nyabŭt dŭn ngan darŭm simayang ami.

³Kieh ingat di sirung jawin Tapa adi Sama ta simuki kraja pingandai ngan mbŭh birasŭk ngga pinyabah ngan, simuki pinyirindu ngan mbŭh bada angān bandar nyiraja, ka simuki pingarap ngan mbŭh tagap di Tuhan Jesus Kristus.

⁴Bara dingan, kieh puan Tapa rindu angān ka mbŭh mien angān da jadi tung adŭp-I.

⁵Amai kieh taban Agah Kana ka angān, dŭh ngga piminyu adŭ, pak ngga kuasa, ka ngga Roh Kudus, buang mbŭh tatu puan nang Agah Kana anŭ agi granan sawŭ. Angān puan munki kieh udip sitadŭn kieh agi ngga angān; anŭ mbŭh taŭn yŭn kana adŭp ngan.

⁶ Angān tunda suto danding ami samŭn suto danding Tuhan. Sunggu angān kinyam bagŭ pinyusah, angān mbŭh kambat agah anŭ ngga pinyigaŭn adi mandŭg so Roh Kudus.

⁷Simŭnŭ inŭh angān jadi suto danding yŭn bara daya Kristen di Macedonia ka di Achaia.

⁸Amai dŭh-i agah pasar Tuhan so angān adŭ adi kambang di ndi tarun tana Macedonia ngga Achaia, pak agah pasar pinyabah ngan di Tapa mbŭh kambang di barang yŭn gŭh. Jadi kieh dŭhsah nang ani ani.

⁹Sopŭrŭg daya minyu nang angān agi nakit kambat kieh di andu kieh munan angān, ka simuki angān mbŭh bu mangān tibudo ka pari ka Tapa, an bituan di Ayŭh adi sawŭ ka adi udip.

¹⁰Ngara gŭh nang angān mbŭh kajŭn Anak-I, Jesus, mandŭg so shorga, adi-I mbŭh pakat so kabŭs ka adi pirupas ata so baji Tapa adi re mandŭg.