Read Biatah Bidayuh 1 THESSALONICA 2 Bible Online

1 THESSALONICA 2 - Biatah Bidayuh bible

1 THESSALONICA 2

¹Bara dingan, adŭp ngan mbŭh puan nang pimandŭg ami ka yŭn ngan prajah dŭh-i jadi au-tarun.

² Angān puan kieh dog pijera ka dog pimangŭh di Philippi diŭ so kieh mandŭg ka yŭn ngan di Thessalonica. Ka sunggu bagŭ daya nyakar, Tapa ta nggen di kieh atin pagan ngga kidaan di angān Agah Kana adi mandŭg so adŭp-I.

³Pimite ami di angān dŭh-i bisangan di kayuh adi sarah puan kah pinŭtŭn adi aset, dŭh gŭh ngga suba an nipu asi asi.

⁴Sibandar-i, kieh siraru minyu nanyam ka pinyiraan Tapa, sabab Ayŭh mbŭh puan kieh bisa dog sabah da piagah Agah Kana anŭ. Kieh dŭh suba an pimunos asŭng manusia, pak an pimunos asŭng Tapa, adi suba atin ami.

⁵Angān puan kieh dŭh mandŭg ka yŭn ngan taban piminyu adi muji, dŭh gŭh ngga pinŭtŭn an dapŭd utung so angān. Tapa inŭh saksi ami!

⁶Kieh dŭh suba an jiroh puji so asi asi, bait so angān, puan kah so daya bŭkŭn.

⁷Sibandar-i, kieh ati adi pinyuruh Kristus, bisa mite tadŭ kayuh so angān. Pak kan kieh agi ngga angān, kieh duduh ngga angān keya ka sindŭ[1] jaga bara anak-i.

⁸Sabab pinyirindu ami di angān kieh mbŭh sidia an samah ngga angān dŭh-i Agah Kana so Tapa adŭ pak asŭng adŭp ami ani. Angān adi kieh raru siŭt!

⁹Tatu angān ingat, angān adi bara dingan ami, munki kieh bandar nyiraja! Kieh nyiraja sandu singarŭm isa kieh dŭh nyusah angān darŭm kieh nyuse Agah Kana so Tapa di angān.

¹⁰Adŭp ngan jadi saksi ami, simŭnŭ gŭh adŭp Tapa, munki atur pimudip ami di ruang ngan adi sabah di Kristus, mbŭh bisig, batur, ka dŭh biyŭn takar sarah.

¹¹Angān puan gaya kieh ngga barang naan angān agi keya ka sama ngga bara anak-i.

¹²Kieh ngatat angān, kieh nyaduh angān, ka kieh babŭ ngasu angān panu aran pimudip adi pimunos asŭng Tapa. Ayŭh inŭh adi bagan angān da sua kinyam Pinyipritah-I ngga bragah-I.

¹³Ka agi gŭh sabab adi bŭkŭn adi bada kieh siraru nggen trima kaseh di Tapa. Kan kieh taban ka angān agah so Tapa, angān dingah ka kambat-i dŭh mun daya kambat agah so manusia, pak kambat-i nimun agah adi sawŭ so Tapa. Amai Tapa agi nyiraja darŭm angān adi sabah.

¹⁴ Bara dingan, kayuh adi jadi di angān agi samah ngga kayuh adi jadi di eklisia eklisia di Judea, di ngara diginŭ adi mbŭh tung Kristus Jesus. Angān mbŭh kinyam pinyusah so daya bangsa adŭp ngan, mun ngara mbŭh kinyam pinyusah so daya Jahudi,

¹⁵ adi siŭ Tuhan Jesus samŭn bara nabi, ka mbŭh kisiis kieh. Mbŭh payah inŭh ngara di sirung jawin Tapa! Ngara rawan sopŭrŭg daya!

¹⁶Ngara suba nagah kieh nyuse agah Tapa di daya adi dŭh bangsa Jahudi, agah adi taŭn bisa nyiramat ngara. Darŭm ndai simŭnŭ, ngara mbŭh nyukup sopŭrŭg dosa adi ngara mbŭh siraru ndai tian ti. Ka pinŭbŭn-i madin, baji Tapa mbŭh mandŭg re nyatŭk ngara!

¹⁷Mun kieh, bara dingan, kan kieh nyitiro jo so angān, sawŭ dŭh darŭm pikir-kira pak darŭm pŭrŭng, kieh agi jabŭng di angān ka raru an munan angān dinge.

¹⁸Kieh raan pari ka angān. Adŭp ku mbŭh pikudu kari an pari, pak Shetan matŭn kieh.

¹⁹Taŭn-i mbŭh adŭp ngan, angān adi dŭh kurang so bara adi bŭkŭn adi kieh harap, adi jadi pinyigaŭn ami, ka adi sabab-i kieh bisa mingangŭn di pimanang ami di sirung jawin Tuhan Jesus kan Ayŭh mandŭg.

²⁰Sawŭ inŭh, di angān kieh mingangŭn, ka angān inŭh pinyigaŭn ami!