Read Biatah Bidayuh 1 THESSALONICA 3 Bible Online

1 THESSALONICA 3 - Biatah Bidayuh bible

1 THESSALONICA 3

¹ Sikasŭn-i kieh mbŭh dŭh tungang nyijŭn jabŭng ami. Jadi kieh natu adŭp ami pijuu rŭŭ sadi di Athens

²darŭm kieh pait Timothy, dingan ta adi samah nyiraja yŭn Tapa ayō kieh adi nyuse Agah Kana pasar Kristus. Kieh pait ayŭh ka angān isa ayŭh nagap ka turung angān di pinyabah ngan,

³isa mating so angān ngundur sitagar pinyikisiis anŭ. Adŭp ngan puan pinyikisiis anŭ mbŭh so ka pinyiraan Tapa yŭn ta.

⁴Di andu kieh agi ngga angān, kieh agi awar kidaan nang ata re dog kisiis. Madin adŭp ngan mbŭh puan-i mbŭh tambus.

⁵Sabab anŭ meh aku pait Timothy. Ka sabab aku mbŭh dŭh tungang nyijŭn atin ngingen ku, aku pait ayŭh ka angān bada tingga munki pinyabah ngan. Aku ngingen sibia-i angān mbŭh dog suba Siarap ka kraja ta jadi au-tarun!

⁶ Madin Timothy mbŭh pari, taban agah kana pasar pinyabah ngan ka pasar pinyirindu ngan. Ayŭh mbŭh kidaan di kieh nang angān siraru ingat kieh, ka raan bidapŭd ngga kieh nimun kieh gŭh raan bidapŭd ngga angān.

⁷Jadi meh, bara dingan, darŭm sopŭrŭg pinyusah ngga sangsara ami kieh kinyam adŭp ami dog ngatat darŭm kieh dingah pasar angān. Pinyabah ngan di Kristus mbŭh ngatat kieh,

⁸amai madin kieh sawŭ udip kambŭi angān mijog tagap darŭm angān udip ndi ngga Tuhan.

⁹Madin kieh nggen trima kaseh di Tapa yŭn ngan. Kieh nggen trima kaseh di Ayŭh sabab pinyigaŭn adi kieh kinyam di sirung jawin-I sabab angān.

¹⁰Sandu singarŭm, ngga siabo atin ami, kieh mite Ayŭh bada kieh bidapŭd ngga angān ka nggen di angān ani adi angān biguna yŭn pinyabah ngan.

¹¹Isa-i Tapa adi Sama ta ngga Tuhan Jesus sidia aran adi ngga kieh bisa bidapŭd ngga angān!

¹²Isa-i Tuhan bada pinyirindu ngan bitambah di dingan ngan ka di sopŭrŭg daya ndŭg ka-i jadi bās mun pinyirindu ami di angān.

¹³Simŭnŭ Ayŭh re nyibake angān, ka angān re jadi sukup kana buang kudus di sirung jawin Tapa adi Sama ta kan Tuhan ta Jesus mandŭg ngga sopŭrŭg daya adi mbŭh tung adŭp-I. [2]