Read Biatah Bidayuh 1 THESSALONICA 5 Bible Online

1 THESSALONICA 5 - Biatah Bidayuh bible

1 THESSALONICA 5

¹Dŭhsah kieh nuris ka angān, bara dingan, pasar jam ngga tipuh sopŭrŭg kayuh ati jadi.

² Amai adŭp ngan mbŭh puan nang Andu Tuhan re mandŭg keya ka pinaku mandŭg singarŭm.

³Kan daya nang, “Ati tika damai, ka mating ani ani pito,” nganŭ gŭh pinyusah re gŭgŭh timbur ka nyatŭk ngara! Pinyusah anŭ re nyirŭgŭh mandŭg keya ka dayung adi bite nyirŭgŭh naman sarang re biranak, ka mating daya re tungang pirupas adŭp-i so pinyusah anŭ.

⁴Pak angān, bara dingan, dŭh di darŭm karŭm, ka Andu anŭ dŭh patut mandŭg ka angān ngga gŭgŭh, keya ka pinaku.

⁵Sopŭrŭg ngan mbŭh daya adi udip darŭm jawa, adi mbŭh tung jawa sandu. Ata dŭh daya adi udip darŭm karŭm puan kah dog dapu karŭm.

⁶Jadi meh, ata patut dŭh bŭŭs mun ngara adi bŭkŭn; ata patut bijaga buang bada pimudip ta tirase.

⁷Singarŭm daya bŭŭs; singarŭm gŭh daya mabuk.

⁸ Pak ata mbŭh tung jawa sandu, ka ata patut udip tirase. Ata dŭh siŭn dŭh pakai pinyabah ngga pinyirindu ndu basi pinapas sudo, ka pingarap ta di pinyiramat ndu ta tupi basi.

⁹Tapa mien ata dŭh sabab-I raan ata sangsara da baji-I; Ayŭh mien ata siŭn ata dapŭd dog nyiramat so ka Tuhan ta Jesus Kristus,

¹⁰adi kabŭs yŭn ta siŭn ata dapŭd udip samah ngga Ayŭh, bait-i ata udip puan kah kabŭs di andu-I mandŭg.

¹¹Dupan adŭp ngan, ngatat buang turung dingan ngan, nimun adi ndai ngan madin.

¹²Kieh mite angān, bara dingan, stabi di ngara adi nyiraja di dupan ngan, adi nyiruton ka ngajar angān darŭm aran pimudip Kristen.

¹³Kiren stabi ngga pinyirindu di ngara ngga sipuno-i sabab kraja pingandai ngara. Ndai damai dupan adŭp ngan.

¹⁴Kieh ngasu angān, bara dingan, bakan ngara adi tibanga, mirasang ngara adi pinakut, turung ngara adi ramah, ka sabar ngga barang naan daya.

¹⁵Dŭhnyah angān maras arap ngga arap, pak isa-i barang naan angān gruwŭn ndai kana di dingan ngan ka di sopŭrŭg daya.

¹⁶Angān an siraru gaŭn,

¹⁷buang siraru simayang,

¹⁸an ari biyŭn atin trima kaseh di tadŭ nga-i darŭm sopŭrŭg kayuh. Ati inŭh kayuh adi Tapa raan di angān darŭm angān udip ndi ngga Kristus Jesus.

¹⁹Dŭhnyah matŭn Roh Kudus;

²⁰dŭhnyah ngamun agah adi mandŭg so Roh Kudus.

²¹Suba sopŭrŭg kayuh: bidigŭng di kayuh adi kana

²²ka mangān sopŭrŭg adi arap.

²³Isa-i Tapa adi nggen damai di ata bada angān sukup kudus. Isa-i Tapa jaga asŭng ngan, simangi ngan, ka pŭrŭng ngan so sopŭrŭg sarah, di andu pimandŭg Tuhan ta Jesus Kristus.

²⁴Ayŭh adi bagan angān re ndai simŭnŭ, sabab Ayŭh tŭtŭd.

²⁵Simayang gŭh yŭn kieh, bara dingan.

²⁶Tabi sopŭrŭg adi sabah ngga tabi adi tandā damai.

²⁷Aku ngasu ngga kuasa Tuhan angān basa surat ati di sirung jawin sopŭrŭg bara adi sabah di Jesus.

²⁸Pinyirasi-mandis Tuhan ta Jesus Kristus agi ngga angān.