Read Biatah Bidayuh JOSHUA 1 Bible Online

JOSHUA 1 - Biatah Bidayuh bible

JOSHUA 1

¹Ripas Moses adi urun TUHAN mbŭh kabŭs, TUHAN minyu di pinurung Moses, Joshua anak Nun.

²Ayŭh nang, “Urun Ku Moses mbŭh kabŭs. Sidia meh madin, kuu ngga sopŭrŭg daya Israel, ka mutas Yang Jordan mŭrŭt tarun tana adi Aku nggen di angān.

³ Nimun adi Aku mbŭh kidaan di Moses, Aku nggen di kuu ngga di sopŭrŭg daya Ku sopŭrŭg tarun tana adi angān re kudak anŭ.

⁴Bayah tarun tana ngan anŭ inŭh so tarun tana-pajam tura ka siratan ndŭg dudu darŭd Lebanon di tura ka utara; so tibande Yang Euphrates tura ka timor, mutas rais Hitti, ndŭg Rawŭt Mediterranean tura ka barat.

⁵ Joshua, mating daya re tungang ngarah kuu sitŭkŭd kuu udip. Aku re agi ngga kuu nimun Aku agi ngga Moses. Aku re ari agi ngga kuu; Aku dŭh re tagan kuu.

⁶ Kuu dŭh siŭn dŭh birani ka dŭhnyah bada atin mu arot, amai kuu adi re jadi pinguru ngara ati darŭm ngara ngisi tarun tana adi Aku mbŭh bijanji di tayung-babuk ngara.

⁷Bada adŭp mu birani, ka dŭhnyah atin mu arot; ka nakit ingat tunda sopŭrŭg Ukum-adat adi urun Ku Moses mbŭh nggen di kuu. Dŭhnyah kambŭt tadŭ tadŭ pinganang-i isa angān mujur di barang ka yŭn angān panu.

⁸Nakit ingat surat Ukum adat an ari dog basa darŭm angān tikuruk simayang. Birajar-i sandu singarŭm, ka nakit tunda barang kayuh adi dog nuris dieh. Simŭnŭ inŭh angān re sanang buang mujur.

⁹Ingat Aku mbŭh pesan di kuu nang kuu dŭh siŭn dŭh birani buang dŭhnyah bada atin mu arot! Dŭhnyah taru puan kah jimŭ; Aku, TUHAN adi Tapa mu, agi ngga kuu di barang ka yŭn kuu panu.”

¹⁰Komŭnŭ Joshua ngatur bara pinguru bada

¹¹di ka yŭn bibari ka kidaan di bara daya, “Sidia pinguman, sabab dŭm taruh andu angān re mutas Yang Jordan di ngisi tarun tana adi TUHAN adi Tapa ngan nggen di angān.”

¹² Joshua nang di tibaran tibaran-asar Reuben, Gad, ka sitangah so tibaran-asar Manasseh,

¹³“Ingat Moses adi urun TUHAN mbŭh kidaan di angān nang TUHAN adi Tapa ngan an nggen di angān tarun tana di tura ka timor Yang Jordan yŭn ngan rŭŭ.

¹⁴Bara sawŭn ngan, bara anak ngan, ngga dudu dāng kudip ngan kajŭn digiti, pak bara soldadu ngan adi mbŭh sidia yŭn biperang, re mutas di ka pah mandi diŭ so bara daya Israel adi bŭkŭn amai re turung ngara

¹⁵ndŭg ka ngara mbŭh ngisi tarun tana tura ka barat Jordan adi TUHAN adi Tapa ngan mbŭh nggen di ngara. Kan TUHAN mbŭh bada sopŭrŭg tibaran-asar daya Israel siramat, nŭ ka angān bisa pari ka natu pinyirŭŭ ngan digiti di tarun tana adŭp ngan di tura ka timor Yang Jordan, adi Moses, urun TUHAN mbŭh nggen di angān.”

¹⁶Ngara nam Joshua, “Kieh re ndai sopŭrŭg kayuh adi kaam kidaan di kieh, ka re di ka barang yŭn kaam pait kieh.

¹⁷Kieh re tunda pinganang mai, nimun kieh ko ari tunda pinganang Moses, ka isa-i TUHAN adi Tapa mai agi ngga kaam, nimun Ayŭh ko agi ngga Moses!

¹⁸Asi asi adi pagan kinabah kuasa mai, puan kah nyibireu tadŭ tadŭ pingatur mai re dog ukum kabŭs. Kaam dŭh siŭn dŭh birani ka dŭhnyah bada atin mai arot!”