Read Biatah Bidayuh JOSHUA 17 Bible Online

JOSHUA 17 - Biatah Bidayuh bible

JOSHUA 17

¹Pire tana tura ka barat yang Jordan mbŭh dog pirutung yŭn kada rawang adi sesang anak pinuai Joseph adi dŭn Manasseh. Machir, adi sama Gilead, inŭh anak pinuai Manasseh buang pimagan perang; jadi Gilead ngga Bashan di tura ka timor yang Jordan mbŭh dog pirutung yŭn-i.

²Tarun tana tura ka barat yang Jordan mbŭh dog pirutung yŭn bara rawang Manasseh adi bŭkŭn: Abiezer, Helek, Asriel, Shechem, Hepher ngga Shemida. Ngara inŭh bara sesang dari so Manasseh anak Joseph, ka ngara mbŭh pingubak rawang rawang anŭ gŭh.

³Zelophehad, anak Hepher, adi anak Gilead, adi anak Machir, adi anak Manasseh, dŭh biyŭn anak dari, pak anak anak dayung adŭ. Dŭn ngara inŭh Mahlah, Noah, Hoglah, Milcah, ngga Tirzah.

⁴ Ngara di ka yŭn Eleazar adi imam, ka yŭn Joshua anak Nun, ka yŭn bara pinguru, ka nang, “TUHAN muko pesan Moses bada nggen di kieh ngga di bara madis ami adi dari, pire tana yŭn jadi utung ami.” Ngapŭi, nimun adi TUHAN mbŭh pesan, ngara ngga bara madis ngara dog pirutung tarun tana.

⁵Sabab anŭ meh Manasseh trima simŭng utung tarun tana, nambah Gilead ngga Bashan adi di tura ka timor yang Jordan,

⁶amai bara sesang-i adi dayung ngga adi dari mbŭh samah dog pirutung. Tarun tana Gilead mbŭh dog pirutung ka bara sesang Manasseh adi bŭkŭn.

⁷Tarun tana Manasseh piguru so Asher ndŭg Michmethath, di timor Shechem. Baat tana anŭ ndŭg siratan, adi pibŭrŭt bara daya Entappuah.

⁸Tarun tana adi maning Tappuah dog dapu Manasseh, pak kupo Tappuah, adi di baat, dog dapu bara sesang Ephraim.

⁹Baat anŭ mūn ka sungi Kanah. Kupo kupo adi di siratan sungi anŭ dog dapu Ephraim, sunggu-i darŭm tarun tana Manasseh. Baat Manasseh pijuu mapang tura ka utara sungi anŭ ndŭg Rawŭt Mediterranean.

¹⁰Ephraim tura ka siratan, ka Manasseh tura ka utara, ka Rawŭt Mediterranean jadi baat ngara tura ka barat. Asher agi di utara barat ka Issachar di utara timor.

¹¹Di darŭm tarun tana Issachar ngga Asher, Manasseh dapu kupo Beth Shan ngga Ibleam, samŭn anak anak kupo adi maning-i, samŭn Dor (anŭ adi di pang rawŭt),[9] Endor, Taanach, Megiddo, ngga anak anak kupo adi maning-i.

¹² Pak daya Manasseh dŭh tungang pibu daya adi taŭn mbŭh agi rŭŭ di kupo kupo anŭ; jadi daya Canaan meh gibabŭ agi rŭŭ diginŭ.

¹³Di tika daya Israel jadi rabis bake, ngara dŭh pibu daya Canaan so tarun tana ngara, pak ngara takan ngara bada nyiraja yŭn ngara.

¹⁴Bara sesang Joseph nang di Joshua, “Mani kaam mbŭh nggen tana ndi utung adŭ di kieh bada dapu? Kieh ati mbŭh raru bagŭ amai TUHAN mbŭh nyiberkat kieh.”

¹⁵Joshua nam, “Kambŭi angān mbŭh raru bagŭ, ka rais tarun tana sandah Ephraim mbŭh raru sŭ yŭn ngan, di meh ka darŭm tarun ka raba sayan yŭn adŭp ngan di tarun tana daya Periz ngga daya Rephaim.”

¹⁶Ngara nam, “Rais tarun tana sandah anŭ dŭh sadang yŭn ami, pak bara daya Canaan adi rŭŭ di tana rabak biyŭn krita kuda adi dog ndai so basi, bait-i ngara adi rŭŭ di Beth Shan ngga anak anak kupo adi maning-i puan kah ngara adi rŭŭ di Rubān Jezreel.”

¹⁷Joshua nang di tibaran-asar Ephraim ngga tibaran-asar Manasseh Barat, “Sawŭ bagŭ angān, ka angān mbŭh raru bake gŭh. Angān re trima rabis so ndi utung.

¹⁸Rais tarun tana sandah anŭ re jadi tung jangān. Sawŭ sunggu-i gibabŭ tarun, angān re sayan-i ka dapu-i so bŭngŭn ndi ndŭg bŭngŭn andi. Jeja ka daya Canaan anŭ, angān re pibu ngara so nŭ, sunggu ngara daya adi bake ka biyŭn krita krita kuda adi dog ndai so basi.”