Read Biatah Bidayuh JOSHUA 18 Bible Online

JOSHUA 18 - Biatah Bidayuh bible

JOSHUA 18

¹Ripas ngara muko sirabut tarun tana Canaan, sopŭrŭg kaum Israel tikuruk di Shiloh ka rasu pijog Bari TUHAN.

²Gibabŭ agi dŭm ju tibaran-asar daya Israel adi gibayuh dog pirutung tarun tana.

³Jadi Joshua nang di daya Israel, “Ndŭg sinde angān re kajŭn diŭ so angān mŭrŭt ka tambit tarun tana adi TUHAN, Tapa tayung-babuk ngan, muko nggen di angān?

⁴Taban ka yŭn ku taruh naan daya so barang tibaran-asar. Aku re pait ngara bada di ngawah ndi tarun tarun tana rais ati ka ngŭkŭd tarun tana adi ngara raan dapu. Ko anŭ ngara pari ka yŭn ku.

⁵Tarun tana anŭ re dog pirutung nyikiju; Judah siŭn rŭŭ di tarun tana adŭp-i di siratan, ka Joseph di tarun tana adŭp-i di utara.

⁶Nuris ruru tarun tana anŭ adi ju utung ka taban-i ka yŭn ku. Komŭnŭ aku re taran dadu[10] ngga bisiken ngga TUHAN Tapa ta yŭn ngan.

⁷Bara daya Levi, sunggu mŭnŭ, dŭh re sua trima utung tana ngga angān, amai tung ngara utung inŭh jadi imam TUHAN. Tibaran-asar Gad, Reuben, ngga Manasseh timor muko gŭh trima tung ngara utung tana di tura ka timor yang Jordan, adi Moses, adi urun TUHAN, muko nggen di ngara.”

⁸Ngara adi dog mien anŭ matak di kudak ka ngŭkŭd tarun tana anŭ ripas Joshua muko nggen atur ati di ngara: “Panu kudak ndi abong abong tarun tana anŭ ka ngŭkŭd-i, ka pari ka yŭn ku. Komŭnŭ digiti di Shiloh, aku re bisiken ngga TUHAN yŭn ngan pakai taran dadu.”

⁹Jadi ngara matak ka kudak ndi abong abong tarun tana anŭ, ka nuris munki ngara kutung tarun tana anŭ nyikiju, buang nuris susud kupo kupo. Komŭnŭ ngara pari ka yŭn Joshua di yŭn bibari di Shiloh.

¹⁰Joshua taran dadu ngga bisiken ngga TUHAN yŭn ngara, ka pirutung barang tibaran-asar Israel adi dŭm ngga pire tarun tana anŭ.

¹¹Abong tarun tana adi dog dapu bara rawang tibaran-asar Benjamin inŭh adi sibungas-i dog pirutung. Tarun tana ngara inŭh di asah tibaran-asar Judah ngga tibaran-asar Joseph.

¹²Di utara, baat ngara piguru so yang Jordan ka maad ired di utara Jericho ka biruit nuju barat kadŭg rais tarun tana sandah jeh ndŭg tarun tana-pajam Bethaven.

¹³Baat anŭ nuju ired sandah di tura ka siratan Luz (adi dŭn Bethel gŭh), ka mūn nuju Ataroth Addar, di darŭd tura ka siratan di Saba Beth Horon.

¹⁴Baat anŭ pijuu ka biruit nuju siratan piguru so tura ka barat darŭd anŭ ka nuju Kiriath Baal (puan kah Kiriath Jearim) adi tibaran-asar Judah dapu. Anŭ inŭh baat tura ka barat.

¹⁵Baat di siratan, piguru so bŭngŭn Kiriath Jearim ka nuju[11] Rubang Rubang piin Nephtoah.

¹⁶So nŭ baat anŭ mūn ka sigŭn darŭd adi muā Rubān Hinnom, di tŭbŭn Rubān Rephaim tura ka utara. Komŭnŭ baat anŭ nuju siratan kadŭg Rubān Hinnom, tura ka siratan dūg Jebus nuju Enrogel.

¹⁷So nŭ ka-i biruit ka utara nuju Enshemesh ka pijuu ndŭg Geliloth bistatang ngga Ateng Adummim. Baat anŭ mūn so nŭ nuju Batuh Bohan (Bohan inŭh anak dari Reuben),

¹⁸ka murah tura ka utara dūg anŭ adi nura Rubān Jordan. So nŭ baat anŭ mūn ka mŭrŭt rubān anŭ,

¹⁹murah utara dūg Beth Hoglah ndŭg utara suak di Rawŭt Pide, adi yŭn Yang Jordan minangŭh. Anŭ inŭh baat adi di siratan.

²⁰Yang Jordan jadi baat tura ka timor. Anŭ inŭh baat baat tarun tana adi bara rawang tibaran-asar Benjamin trima jadi utung ngara.

²¹Kupo kupo adi dog dapu bara rawang tibaran-asar Benjamin inŭh Jericho, Beth Hoglah, Emek Keziz,

²²Beth Arabah, Zemaraim, Bethel,

²³Awim, Parah, Ophrah,

²⁴Chepharammoni, Ophni, ngga Geba: simŭng duwŭh kupo, ngga anak anak kupo adi maning-i.

²⁵Diginŭ agi gŭh Gibeon, Ramah, Beeroth,

²⁶Mizpah, Chephirah, Mozah,

²⁷Rekem, Irpeel, Taralah,

²⁸Zela, Haeleph, Jebus (puan kah Jerusalem), Gibeah ngga Kiriath Jearim: Simŭng pat kupo, ngga anak anak kupo adi maning-i. Anŭ inŭh tana adi bara rawang tibaran-asar Benjamin trima jadi utung ngara.