Read Biatah Bidayuh JOSHUA 2 Bible Online

JOSHUA 2 - Biatah Bidayuh bible

JOSHUA 2

¹ Komŭnŭ Joshua pait duwŭh naan pinyiong so bari ngara di Acacia, ngga pinganang bada ngara pirasa tarun tana Canaan darŭm bisukan, rabis-i kupo Jericho. Kan ngara ndŭg kupo anŭ, ngara nyirŭmŭn di ramin dayung sundar adi dŭn Rahab.

²Raja di Jericho mbŭh agi dingah kada daya Israel mandŭg ngarŭm anŭ di nyibatŭh rais ngara,

³jadi ayŭh pait pinganang ka Rahab: “Bara dari adi di ramin mu inŭh mandŭg di nyibatŭh ndi tarun tarun tana rais ati! Taban ngara ngga ruah!”

⁴Rahab nam, “Agi daya mandŭg ka ramin ku, pak aku dŭh puan so ki pimandŭg ngara. Ngara bu kan batŭh andu mbŭh simŭdŭp diŭ so tiban-bās kupo dog tŭŭp. Aku dŭh siken re kamaki ngara, pak kambŭi angān rikas tadak ngara, angān tungang nyandat ngara.” (Nganŭ Rahab muko taban duwŭh naan pinyiong anŭ ngga di ka tibung ramin-i ka sukan ngara di rasan tugung tugu flex adi taŭn muko-i diŭ nugung diginŭ.)

⁷Bara daya raja anŭ ruah so kupo, ka tiban-bās kupo dog tŭŭp. Ngara jiroh bara pinyiong daya Israel ndŭg tarun adi agi aran mutas Yang Jordan.

⁸Diŭ so bara pinyiong anŭ bŭŭs ngarŭm anŭ, Rahab di ka tibung ramin

⁹ka nang di ngara, “Aku puan nang TUHAN mbŭh nggen tarun tana ati di angān. Barang naan daya darŭm rais ati raru taru angān;

¹⁰ Kieh agi dingah TUHAN nyibadŭh Rawŭt Bireh yŭn ngan di tika angān bu ruah so Egypt. Kieh agi gŭh dingah angān siŭ Sihon ngga Og, duwŭh naan raja daya Amor tura ka timor Yang Jordan.

¹¹Kieh mbŭh raru taru kan kieh dingah agah anŭ; pinyipagan sopŭrŭg ami mbŭh miyap sabab angān. TUHAN adi Tapa ngan inŭh Tapa di rangit di sambu ka digiti di ong.

¹²Ngapŭi madin bipayu meh darŭm adŭn-I nang angān re kana buang nakit ngga bara di rawang ku, nimun aku mbŭh kana ngga angān, ka nggen di aku tandā adi ngga ku bisa sabah di angān.

¹³Bijanji ngga aku nang adŭp ngan re nyiramat sindŭ sama ku, bara jurud dari ngga jurud dayung ku samŭn rawang rawang ngara! Dŭhnyah bada kieh dog siŭ!”

¹⁴Bara pinyiong anŭ nang di ayŭh, “Isa-i Tapa tambit asŭng ami kambŭi kieh dŭh ndai nimun adi kieh muko nang![1] Kambŭi kuu dŭh kidaan di tadŭ daya pasar kieh ati, kieh bijanji ngga kuu kieh re nakit ngga angān kan TUHAN nggen di kieh tarun tana ati.”

¹⁵Rahab rŭŭ di ramin adi dog ndai sinyadi ngga sindung kupo, jadi ayŭh bisor pinyiong anŭ so pinjan ramin-i pakai taris.

¹⁶Ayŭh nang di ngara, “Di ka rais tarun tana sandah, te bara daya raja dapŭd angān rai-i. Bisukan diginŭ taruh andu ndŭg ka ngara mbŭh pari. Ripas anŭ angān bisa pijuu pimanu ngan.”

¹⁷Pinyiong pinyiong anŭ nang di ayŭh, “Kieh re ingat janji adi kuu muko ndai ngga kieh.

¹⁸Ati inŭh kayuh adi kuu dŭh siŭn dŭh ndai. Kan kieh nyerang tarun tana ngan, mŭŭng taris bireh ati di pinjan adi so mu bisor kieh. Bagan sindŭ ngga sama mu, bara jurud dari mu, ngga sopŭrŭg manak di rawang sama mu bada tikuruk di ramin mu.

¹⁹Asi asi adi ruah so ramin anŭ, pinyikabŭs-i inŭh so sarah adŭp-i, ka kieh dŭh re dapu tanggong; pak kambŭi agi daya adi darŭm ramin mu kinaman, kieh siŭn dapu tanggong.

²⁰Sunggu mŭnŭ, kambŭi kuu kidaan di tadŭ daya pasar kieh, kieh re pasan janji ami ati.”

²¹Ayŭh situju, ka bada ngara panu. Kan ngara mbŭh bu, ayŭh mŭŭng taris bireh anŭ di pinjan.

²²Pinyiong pinyiong anŭ di ka tarun tana sandah ka bisukan. Bara daya raja jiroh ngara sitŭkŭd taruh andu di sapa tarun tana rais pak dŭh tungang dapŭd ngara, jadi ngara pari ka Jericho.

²³Komŭnŭ pinyiong adi duwŭh naan anŭ mūn so dudu sandah anŭ, mutas sungi, ka pari ka yŭn Joshua. Ngara kidaan di Joshua sopŭrŭg kayuh adi mbŭh jadi,

²⁴ka komŭnŭ nang, “Kieh mbŭh puan nang TUHAN mbŭh sawŭ nggen ndi tarun tarun tana rais anŭ di ata. Sopŭrŭg daya diginŭ mbŭh raru taru di ata.”