Read Biatah Bidayuh JOSHUA 20 Bible Online

JOSHUA 20 - Biatah Bidayuh bible

JOSHUA 20

¹ Komŭnŭ TUHAN kidaan di Joshua,

²da nang di daya Israel, “Mien kupo kupo pinyigrindung adi Aku muko bada Moses kidaan di angān.

³Kambŭi tadŭ so angān tipia siŭ daya dŭh ngga singaja, ayŭh bisa bu kamanŭ mangān daya adi an maras dendam.

⁴Ayŭh siŭn bu tudu ndi so tadŭ tadŭ kupo anŭ, ka radus di ka tarun yŭn bisara adi di tiban-bās kupo, ka nyuse di pinguru pinguru kupo kayuh adi mbŭh jadi. Komŭnŭ ngara re trima ayŭh mŭrŭt kupo anŭ ka nggen di ayŭh tarun yŭn rŭŭ diginŭ.

⁵Ka kambŭi daya adi an maras dendam nudug ayŭh kamanŭ, daya kupo anŭ dŭh siŭn nyerah ayŭh ka daya anŭ. Ngara dŭh siŭn dŭh grindung ayŭh amai ayŭh siŭ daya dŭh ngga singaja ka dŭh sabab baji.

⁶Ayŭh siŭn rŭŭ di kupo anŭ ndŭg ka ayŭh muko bisara di sirung jawin daya bagŭ, ka ndŭg ka daya adi jadi Imam Bās darŭm kupo anŭ di tipuh anŭ mbŭh kabŭs. Muko anŭ, nŭ ka ayŭh siŭn mari ka kupo adŭp-i, adi so-i bu.”

⁷Jadi sabab anŭ meh di tura ka barat yang Jordan ngara miratak kupo Kadesh adi di Galilee, di rais tarun tana sandah Naphtali; kupo Shechem, di rais tarun tana sandah Ephraim; ka kupo Hebron, di rais tarun tana sandah Judah.

⁸Di tura ka timor yang Jordan, di darŭd tarun tana-pajam adi rata buang bayah bigatung, ngara mien kupo Bezer di tarun tana Reuben; Ramoth di Gilead, di tarun tana Gad; ka Golan di Bashan, di tarun tana Manasseh.

⁹Sopŭrŭg kupo pinyigrindung anŭ mbŭh dog mien yŭn sopŭrŭg daya Israel, ka yŭn sopŭrŭg daya pinami adi rŭŭ di ruang ngara. Tadŭ tadŭ daya adi siŭ daya dŭh ngga singaja siŭn dapŭd pinyigrindung diginŭ so sianŭ adi an maras dendam; ngara dŭh bisa dog siŭ sibayuh ngara bisara di sirung jawin daya bagŭ.