Read Biatah Bidayuh JOSHUA 3 Bible Online

JOSHUA 3 - Biatah Bidayuh bible

JOSHUA 3

¹Ngga andu jawa ndi, Joshua ngga sopŭrŭg daya Israel awar makat, tingge tarun yŭn ngara bibari di Acacia, di ka abong Yang Jordan, adi yŭn ngara bibari buang kajŭn tika re mutas.

²Taruh andu ripas anŭ bara pinguru panu di tarun yŭn bibari

³ka kidaan di daya bagŭ, “Kambŭi angān kiris bara imam gŭrŭng Pati Simanya TUHAN adi Tapa ngan, makat meh ka tunda ngara.

⁴Angān gi-bŭn di ka abong ati, jadi ngara re kiren aran di angān. Pak dŭhnyah nyindŭk Pati Simanya; bada sitangah batuh juan ngan jo so punok Pati Simanya.”

⁵Joshua nang di daya bagŭ, “Pibisig adŭp ngan, amai andu sipagi TUHAN re ndai pingandai-nginga di ruang ngan.”

⁶Komŭnŭ ayŭh kidaan di bara imam bada tambit Pati Simanya ka taban-i ngga panu diŭ so bara daya bagŭ. Ngara ndai nimun adi ayŭh mbŭh kidaan.

⁷TUHAN nang di Joshua, “Kayuh adi re Ku ndai andu ati re bada sopŭrŭg daya Israel piguru stabi di kuu keya ka di daya adi raru bās, ka ngara re rada nang Aku agi ngga kuu nimun Aku ari agi ngga Moses.

⁸Kidaan di bara imam adi tawid Pati Simanya nang, kan ngara mbŭh ndŭg sungi, ngara dŭh siŭn dŭh mūn ka piin ka rŭŭ mijog sindŭk tabing.”

⁹Komŭnŭ Joshua nang di daya bagŭ, “Mandŭg kamati, ka nyiringa di kayuh adi TUHAN adi Tapa ngan nang.

¹⁰Buang angān masang panu, Ayŭh tatu re pibu daya Canaan, daya Hitti, daya Hivi, daya Periz, daya Girgash, daya Amor, ka daya Jebus. Angān re puan nang Tapa adi udip agi di ruang ngan

¹¹kan Pati Simanya TUHAN adi nguasa ndi ong ong mutas Yang Jordan diŭ so angān.

¹²Jadi madin, mien simŭng duwŭh naan daya, ndi naan so barang tibaran-asar Israel.

¹³Kan bara imam, adi tawid Pati Simanya TUHAN adi nguasa ndi ong ong, na kaja ngara di piin, piin Yang Jordan re ngŭndŭr, ka piin adi aman so sijo re tikandang ka tipaad di ndi yŭn.”

¹⁴Nganŭ mbŭh tipuh ngatŭm, ka sungi anŭ mbŭh uba. Kan bara daya bu so yŭn bibari re mutas Yang Jordan, bara imam panu diŭ so ngara, tawid Pati Simanya. Ka kan bara imam na kaja ngara di sungi,

¹⁶piin rasu ngŭndŭr ka tipaad mudek ndŭg Adam, kupo adi sindŭk Zarethan. Piin adi aman ka Rawŭt Pide mbŭh patŭd bandar, ka daya Israel rasu tungang mutas sungi sindŭk Jericho.

¹⁷Atan bara daya panu mutas di tana badŭh, bara imam adi tawid Pati Simanya mijog di tana badŭh di yun Yang Jordan ndŭg ka sopŭrŭg daya mbŭh abo mutas.