Read Biatah Bidayuh JOSHUA 4 Bible Online

JOSHUA 4 - Biatah Bidayuh bible

JOSHUA 4

¹Kan ndi bangsa anŭ mbŭh abo mutas Yang Jordan, TUHAN nang di Joshua,

²“Mien simŭng duwŭh naan daya, ndi naan so barang tibaran-asar,

³ka bada ngara tambit simŭng duwŭh panggar batuh so yun Yang Jordan, so yŭn anŭ adi bara imam ko yŭn mijog. Kidaan di ngara bada taban dudu batuh anŭ ka na-i di tarun adi yŭn angān bibari ngarŭm ati.”

⁴Komŭnŭ Joshua bagan simŭng duwŭh naan daya anŭ adi ayŭh ko mien,

⁵ka nang di ngara, “Mūn ka Yang Jordan di jawin Pati Simanya TUHAN adi Tapa ngan. Barang naan angān masin masin taban ndi batuh di kawin, anŭ inŭh, ndi batuh yŭn ndi tibaran-asar Israel.

⁶Batuh batuh anŭ re ngga bada daya Israel ingat pasar kayuh adi TUHAN mbŭh ndai. Jŭ, kan bara anak sukuh ngan siken ani rati batuh anŭ di angān,

⁷angān bisa kidaan di ngara nang piin Yang Jordan ngŭndŭr kan Pati Simanya TUHAN mutas-i. Batuh batuh anŭ re ari bada daya Israel ingat kayuh adi mbŭh jadi digiti.”

⁸Bara dari anŭ ndai kayuh adi Joshua mbŭh bada ngara ndai. Nimun adi TUHAN mbŭh pesan di Joshua, ngara tambit simŭng duwŭh panggar batuh so yun Yang Jordan, anŭ inŭh, ndi yŭn ndi tibaran-asar daya Israel, taban-i ka yŭn ngara bibari, ka na-i diginŭ.

⁹Joshua nugung gŭh simŭng duwŭh panggar batuh di yun Yang Jordan, di yŭn bara imam adi tawid Pati Simanya TUHAN ko yŭn mijog. (Batuh batuh anŭ gibabŭ diginŭ madin.)

¹⁰Bara imam mijog di yun Yang Jordan ndŭg ka sopŭrŭg kayuh mbŭh kamas dog ndai, kayuh adi TUHAN mbŭh pesan Joshua da kidaan di bara daya da ndai. Anŭ, kayuh adi Moses mbŭh pesan. Daya Israel bigaut mutas sungi anŭ.

¹¹Kan sopŭrŭg daya mbŭh di pah mandi Yang Jordan, bara imam adi tawid Pati Simanya TUHAN panu diŭ di jawin daya bagŭ.

¹²Bara daya adi so tibaran-asar Reuben ngga tibaran-asar Gad, ngga sitangah bara so tibaran-asar Manasseh, mbŭh sidia yŭn re biperang, mutas diŭ so bara adi bŭkŭn, nimun adi Moses ko kidaan di ngara.

¹³Di sirung jawin TUHAN agi pat puru ribu naan bara dari adi mbŭh sidia re biperang, mutas di ka rabak sindŭk Jericho.

¹⁴Kayuh adi TUHAN ndai di andu anŭ bada daya Israel stabi di Joshua keya ka di daya adi raru bās. Ngara stabi di ayŭh sitŭkŭd ayŭh udip, nimun ngara mbŭh stabi di Moses.

¹⁵Komŭnŭ TUHAN bada Joshua

¹⁶kidaan di bara imam adi tawid Pati Simanya da ruah so Yang Jordan.

¹⁷Joshua kidaan di ngara,

¹⁸ka kan bara imam mbŭh ndŭg tabing sungi, piin sungi anŭ pari aman, ka pari ngapuh tabing-i.

¹⁹Daya Israel mutas Yang Jordan ngga andu adi simŭng darŭm sibungas buran, ka bibari di Gilgal tura ka timor Jericho.

²⁰Diginŭ Joshua nugung batuh anŭ adi simŭng duwŭh panggar adi dog tambit so Yang Jordan.

²¹Ka ayŭh nang di daya Israel, “Jŭ, kan bara anak sukuh ngan siken ani rati batuh batuh ati,

²²angān kidaan di ngara pasar daya Israel mutas Yang Jordan panu di tunduh tana badŭh.

²³Kidaan di ngara nang TUHAN adi Tapa ngan nyibadŭh piin Yang Jordan yŭn ngan ndŭg ka angān mbŭh abo mutas, nimun Ayŭh muko nyibadŭh Rawŭt Bireh yŭn ta.

²⁴Sabab anŭ barang naan daya di ong re puan munki masam bās-i kuasa TUHAN, ka angān re adu adu stabi TUHAN adi Tapa ngan.”