Read Biatah Bidayuh JOSHUA 7 Bible Online

JOSHUA 7 - Biatah Bidayuh bible

JOSHUA 7

¹Pinyipesan TUHAN di Israel bada dŭh tambit so Jericho tadŭ tadŭ kayuh adi re dog pirabur dŭh dog tunda. Ndi naan daya dŭn Achan nyibireu atur anŭ, ka TUHAN meh raru baji di bara daya Israel. (Achan inŭh anak Carmi ka sukuh Zabdi, so manak Zerah, so tibaran-asar Judah.)

²Joshua pait kada daya so Jericho di ka Ai, kupo tura ka timor Bethel, sindŭk Bethaven, bada pirasa tarun tana anŭ. Muko ndai simŭnŭ,

³ngara pari ka kidaan di Joshua: “Dŭhsah sopŭrŭg daya matak di nyerang Ai. Pait duwŭh puan kah taruh ribu naan adŭ. Dŭhnyah pait sopŭrŭg bara soldadu bada di kamanŭ di biperang. Dŭh kupo anŭ bayah.”

⁴Jadi kurang rabis taruh ribu naan daya Israel adi matak nyerang, pak daya so kupo anŭ ngarah ngara bada ngundur.

⁵Daya Ai tadak ngara so tiban-bās kupo ndŭg kwari kwari batuh, ka siŭ kurang rabis taruh puru nŭm naan ngara di aran mūn sandah. Jadi daya Israel mbŭh ramah simangi buang mbŭh raru taru.

⁶Joshua ngga bara pinguru Israel nyiratak piraka ngara darŭm susah ka sipŭŭb nura Pati Simanya ndŭg singumi andu anŭ, ka di ubak ngara agi dabu tana ngga nandā adŭp ngara susah.

⁷Ka Joshua nang, “TUHAN Raja! Mani Kaam taban kieh mutas Yang Jordan? Batur ngga Mai ton kieh di daya Amor adŭ kah? An bada kieh kabŭs adŭ kah? Mani dŭh bada kieh pati ka rŭŭ di pah majeh Yang Jordan adŭ?

⁸Ani bisa ku nang, O TUHAN, amai madin Israel mbŭh ngundur bada pinganyu?

⁹Daya Canaan ngga sopŭrŭg daya bŭkŭn adi di rais ati re dingah pasar kayuh anŭ. Ngara re kirurung kieh ka siŭ barang naan kieh! Simuki meh Kaam re tak bragah adŭn Mai?”

¹⁰Ka TUHAN nang di Joshua, “Makat! Mani kuu guring di tana mun anŭ?

¹¹Israel mbŭh bidosa! Ngara mbŭh miranggar pekat-janji adi Aku bada ngara tunda. Ngara mbŭh tambit kada kayuh adi patut dog pirabur. Ngara mbŭh naku kayuh anŭ, kadong pasar kayuh anŭ, ka gaur-i ngga pimakai adŭp ngara.

¹²Anŭ inŭh sabab daya Israel dŭh tungang rawan pinganyu ngara. Ngara ngundur so pinganyu ngara amai adŭp ngara mbŭh dog nyatŭk ukum yŭn dog siŭ! Aku dŭh re tia rŭŭ ngga angān kambŭi angān dŭh pirabur kayuh kayuh anŭ adi dŭh angān patut tambit!

¹³Makat! Pibisig sopŭrŭg ngara, ka bada ngara sidia yŭn re tikuruk bidapŭd ngga Aku. Kidaan di ngara bada sidia andu sipagi, amai Aku, TUHAN adi Tapa Israel re an minyu sakati: ‘Israel, angān mbŭh biyŭn kayuh kayuh adi Aku muko bada angān pirabur! Angān dŭh re tungang rawan pinganyu ngan kambŭi angān bayuh kubo pirabur dudu kayuh anŭ.’

¹⁴Ngapŭi meh, kidaan di ngara nang ngga isan isan andu sipagi ngara re dog taban ka jawin ka yŭn Ku, nanyam ka tibaran-asar ngara masin masin. Tibaran-asar adi Aku mien re di ka jawin, nanyam ka manak ngara masin masin. Manak adi Aku mien re di ka jawin, nanyam ka rawang ngara masin masin. Rawang adi Aku mien re di ka jawin, barang naan bitunda ndi ngga ndi.

¹⁵Sianŭ adi dog bagan ka dog dapŭd nyikŭn kayuh kayuh anŭ adi patut dog pirabur re dog badang, samŭn rawang-i ngga sopŭrŭg kayuh adi-i dapu, amai ayŭh mbŭh nggen mangŭh di Israel ka mbŭh miranggar simanya Ku.”

¹⁶Awar isan isan andu jawa ndi, Joshua taban daya Israel ka yŭn TUHAN nanyam ka tibaran-asar ngara masin masin, ka tibaran-asar Judah meh dog mien.

¹⁷Joshua taban tibaran-asar Judah mandŭg ka jawin, nanyam ka manak ngara masin masin, ka manak Zerah meh dog mien. Komŭnŭ ayŭh taban manak Zerah mandŭg ka jawin nanyam ka rawang ngara masin masin, ka rawang Zabdi dog mien.

¹⁸Ayŭh taban rawang Zabdi ka jawin, barang naan bitunda ndi ngga ndi, ka Achan, adi anak Carmi ka sukuh Zabdi, dog mien.

¹⁹Joshua nang di ayŭh, “Nak, kidaan ngga sawŭ digiti, di sirung jawin TUHAN, adi Tapa Israel, ka kidaan di aku madin kayuh adi ko mu ndai. Dŭhnyah miman so aku.”

²⁰“Sawŭ inŭh,” Achan nam. “Aku mbŭh bidosa rawan TUHAN, adi Tapa Israel, ka ati inŭh kayuh adi aku mbŭh ndai.

²¹Bigaur ngga dudu kayuh adi kieh sirapas, aku agi dapŭd ndi jipo Babylonia adi raru ramus, pirak sindŭk 2 kilogram bat-i, ka ndi panggar mas adi rabis sitangah kilogram bat-i. Aku raru ripong di kayuh kayuh anŭ, ka aku tambit-i. Kaam bisa dapŭd dudu kayuh anŭ dog napuk darŭm tana darŭm bari ku, ka pirak anŭ agi di rasan-i.”

²²Jadi Joshua pait kada daya. Ngara bikaduh di ka bari anŭ ka dapŭd sopŭrŭg kayuh anŭ sawŭ agi dog napuk diginŭ, ka pirak anŭ sawŭ agi di rasan-i.

²³Ngara taban dudu kayuh anŭ ruah so bari, taban-i ka yŭn Joshua ngga sopŭrŭg daya Israel, ka pasan di sirung jawin TUHAN.

²⁴Joshua ngga sopŭrŭg daya Israel muak Achan, tambit pirak anŭ, jipo anŭ, panggar mas anŭ, samŭn bara anak dari ngga anak dayung-i, dudu sapi, kaldi, biri, ngga sopŭrŭg buat rata-i, ka taban ngara di ka ndi rubān adi dŭn Rubān Pinyusah.

²⁵Ka Joshua nang, “Mani kuu taban pinyusah adi mun ati ka kieh? Madin TUHAN re taban pinyusah ka kuu!” Sopŭrŭg daya meh manjan Achan ngga batuh ndŭg kabŭs; ngara manjan ka badang gŭh rawang-i samŭn buat rata-i.

²⁶Ngara nugung batuh di tunduh tadang Achan; tugung batuh anŭ gibabŭ diginŭ ndŭg andu ati. Anŭ meh sabab tarun anŭ gibabŭ dog kadŭn Rubān Pinyusah. Muko anŭ TUHAN mbŭh dŭh tia baji.