Read Biatah Bidayuh 2 THESSALONICA 1 Bible Online

2 THESSALONICA 1 - Biatah Bidayuh bible

2 THESSALONICA 1

¹ So Paul, Silas, ka Timothy, nuju daya eklisia di Thessalonica, adi mbŭh bara daya adi Tapa Sama ta ka Tuhan Jesus Kristus dapu:

²Isa-i Tapa adi Sama ta ngga Tuhan Jesus Kristus nggen di angān pinyirasi-mandis ngga damai.

³Bara dingan, kieh dŭh siŭn dŭh an siraru nggen trima kaseh di Tapa sabab angān. Patut inŭh kieh ndai simŭnŭ, sabab pinyabah ngan mbŭh bana kambang ka pinyirindu ngan dupan adŭp ngan mbŭh dŭ dŭ bitambah.

⁴Anŭ inŭh sabab kieh mingangŭn pasar angān di dupan bara eklisia Tapa. Kieh mingangŭn di gaya ngan bijijŭ ngga atin tŭtŭd ka sabah darŭm angān dog kisiis ka dog kinanyuh.

⁵Sopŭrŭg anŭ kiren ukum Tapa agi tŭnggŭn, buang-i sabab anŭ meh angān re tibirang kinyam Ong Bauh Tapa,[1] amai yŭn anŭ inŭh angān sangsara.

⁶Tapa re ndai kayuh adi batur: Ayŭh re pijera ngara adi pijera angān.

⁷Ayŭh re nggen saduh di angān adi dog pijera, ka di kieh ani. Ayŭh re ndai simŭnŭ kan Tuhan Jesus nandŭng so shorga ngga bara malaikat-I adi bikuasa,

⁸taban apui adi bijireb, ngga ngukum ngara adi tirawan Tapa samŭn ngara adi abah dingah Agah Kana pasar Tuhan ta Jesus.

⁹ Ngara re sangsara darŭm dog ukum ngga ukum ruro, dog nyibarai so yŭn Tuhan ka so bragah kuasa-I,

¹⁰kan Ayŭh mandŭg di Andu anŭ di kambat bragah ka stabi so sopŭrŭg daya-I ngga sopŭrŭg adi sabah. Angān gŭh re sua ngga ngara, sabab angān mbŭh sabah agah adi kieh ko kidaan di angān.

¹¹Anŭ sabab kieh siraru simayang yŭn ngan. Kieh simayang mite Tapa bada angān tibirang udip nanyam ka pinyiraan-I. Isa-i Ayŭh pijadi ngga kuasa-I sopŭrŭg pinyiraan ngan di pinyikana, ka nyukup pingandai pinyabah ngan.

¹²Ngga simŭnŭ inŭh adŭn Tuhan ta Jesus re dog nyibragah darŭm angān, ka angān darŭm Ayŭh, so ka pinyirasi-mandis Tapa ta ngga Tuhan [2] ta Jesus Kristus.