Read Biatah Bidayuh 1 TIMOTHY 1 Bible Online

1 TIMOTHY 1 - Biatah Bidayuh bible

1 TIMOTHY 1

¹So Paul, adi pinyuruh Kristus Jesus so ka pinyibada Tapa adi Pinyikudip ta ngga Kristus Jesus adi pingarap ta,

² nuju Timothy, anak ku adi sawŭ darŭm pinyabah: Isa-i Tapa Sama ngga Kristus Jesus Tuhan ta nggen di kuu pinyirasi-mandis, masi, ka damai.

³Aku raan kuu rŭŭ di Ephesus, nimun aku ko ngasu kuu di andu aku re di ka Macedonia. Agi kada daya diginŭ mbŭh nggen ajar kadong, ka kuu dŭh siŭn dŭh mritah ngara da dŭh tia.

⁴Kidaan di ngara da kambŭt dundan adi au-tarun anŭ samŭn susud taris tayung-babuk adi raru ambu, adi kaŭs-i bada daya bikaii. Kayuh mun anŭ dŭh-i nanyam ka atur-pinyiraan Tapa, adi taŭn dog puan so ka pinyabah.

⁵Pinŭtŭn pritah ati inŭh ngga kies pinyirindu adi mandŭg so atin bisig, pikir-kira atin adi bisig, ka pinyabah adi sawŭ batur.

⁶Mbŭh agi kada daya miriseu so kayuh anŭ ka mbŭh manyap darŭm kirakar ngara adi au-tarun.

⁷Ngara raan jadi bara gurū ukum-adat Tapa, pak ngara dŭh mirati pinganang adŭp-i, bait-i kayuh adi-i nang darŭm bandar sabah nang sawŭ.

⁸Kieh puan Ukum-adat taŭn kana kambŭi-i dog pakai ngga aran adi batur.

⁹Patut dog ingat, ukum ukum-adat dog ndai, dŭh-i yŭn daya adi kana, pak yŭn daya adi miranggar ukum-adat ngga daya adi arap, yŭn daya adi dŭh stabi di Tapa ngga adi bidosa, yŭn daya adi dŭh biyŭn adat ngga adi udip puno ngga tibiat ong, yŭn bara pinyiŭ adi siŭ ndŭg ka sindŭ sama adŭp-i,

¹⁰yŭn daya adi dŭh tatu urah rakah-i, yŭn daya adi nyibŭŭs ngga dingan-i adi samah dari, yŭn daya adi nakap daya ngga bu an-i jua, yŭn daya adi pingadong ka yŭn daya adi nggen taksi kadong, puan kah adi ndai kayuh adi dŭh nanyam ka ajar adi batur.

¹¹Ajar anŭ bisa dog dapŭd darŭm Agah Kana adi mbŭh dog nyerah ka darŭm tangan ku yŭn dog piagah, Agah Kana adi so Tapa adi bragah ka biberkat.

¹²Aku nggen trima kaseh di Kristus Jesus Tuhan ta, amai pinyibake adi-I mbŭh nggen di aku yŭn kraja ku. Aku nggen trima kaseh di Ayŭh, amai Ayŭh mbŭh nyirundeng aku tibirang ka mbŭh tijuan aku da bituan di adŭp-I,

¹³ sunggu dawŭ-i pinganang ku agi arap pasar Ayŭh buang kisiis ka ngamun Ayŭh. Pak Tapa masi di aku sabab nganŭ aku gibayuh sabah buang dŭh puan kayuh adi ndai ku.

¹⁴Ka Tuhan ta ren pinyirasi mandis-I di tunduh ku ka nggen di aku pinyabah samŭn pinyirindu adi mbŭh tung jata darŭm ata udip ndi ngga Kristus Jesus.

¹⁵Pinganang ati agi sawŭ, patut dog trima ka dog sabah: Kristus Jesus mandŭg ka ong di nyiramat daya adi bidosa. Aku ati adi rabis arap,

¹⁶pak Tapa mbŭh raru masi di aku siŭn Kristus Jesus bisa sukup sabar darŭm-I ngatur aku, adi siabo bidosa, yŭn suto danding di sopŭrŭg ngara adi re sabah di Ayŭh ka adi re dapŭd udip adi sawŭ adi tan adu adu.

¹⁷Di Raja adi udip adu adu ka adi dŭh bisa kabŭs buang adi dŭh tatŭng, Ayŭh adi ndi adŭ; di Ayŭh inŭh stabi ngga bragah ndŭg situi tui! Amen.

¹⁸Timothy, kuu adi anak ku, aku mbas pasan di tangan mu pinyipesan ati, adi mbŭh nanyam ka pinganang-binabi adi ko dog ruwan prajah pasar kuu. Pakai pinganang anŭ ndu sinyata siŭn kuu dapŭd sanang birawan,

¹⁹ka bidigŭng di pinyabah ngga pikir-kira atin mu adi bisig. Agi daya adi bŭn nyiringa ka tunda pikir-kira atin-i adi bisig ka mbŭh pirusak pinyabah-i.

²⁰Hymenaeus ngga Alexander inŭh duwŭh naan so ngara adi mun anŭ, adi aku ko nggen ka darŭm kuasa Shetan siŭn ngara birajar ka dŭh tia ngujat rawan Tapa.