Read Biatah Bidayuh 1 TIMOTHY 2 Bible Online

1 TIMOTHY 2 - Biatah Bidayuh bible

1 TIMOTHY 2

¹Diŭ so kayuh bŭkŭn, aku ngasu angān simayang yŭn sopŭrŭg daya. Mite Tapa turung ka nyiberkat daya, ka nggen trima kaseh di Tapa yŭn sopŭrŭg daya.

²Simayang yŭn bara raja samŭn ngara adi bikuasa, isa-i ata udip darŭm sanang ka darŭm damai ngga stabi di Tapa ka ngga urah-rakah adi kana.

³Ati kana buang pimunos asŭng Tapa adi Pinyikudip ta;

⁴Ayŭh raan sopŭrŭg daya dog nyiramat ka puan ajar adi sawŭ pasar pinyiramat.

⁵Amai agi ndi adŭ Tapa, ka agi ndi naan adŭ adi nguru manusia ka Tapa; Ayŭh anŭ Kristus Jesus,

⁶adi nggen adŭp-I ngga nubos sopŭrŭg manusia. Anŭ inŭh ngga kiren di tika adi batur Tapa raan sopŭrŭg daya dog nyiramat,

⁷ ka anŭ inŭh sabab aku mbŭh dog pait jadi pinyuruh ka gurū yŭn daya adi dŭh bangsa Jahudi, an piagah di ngara agah pasar pinyabah adi sawŭ. Aku dŭh kadong; aku kidaan kayuh adi sawŭ!

⁸Di tika simayang aku raan dari bidua, ngara adi mbŭh nyerah adŭp ngara ka Tapa ka adi bisa pakat tangan ngara darŭm simayang dŭh ngga baji bait karit.

⁹ Aku raan gŭh bara dayung nakit ngga adŭp ngara buang dŭh sungak di piraka ngara; dŭh sungak di udat ubok, dŭh sungak di pimakai mas puan kah mutiara, puan kah sungak di piraka adi grua,

¹⁰pak ndai pingandai kana, nimun patut dayung adi nang adŭp-i puno darŭm adat.

¹¹Bara dayung patut birajar darŭm dŭh bidudu ka darŭm atin tŭkŭn.

¹²Aku dŭh nyibandar ngara ngajar bait biyŭn kuasa di tunduh bara dari; ngara dŭh siŭn dŭh pirŭŭ adŭp-i.

¹³ Amai Adam inŭh adi diŭ dog napa, komŭnŭ ka-i Eve;

¹⁴ ka dŭh-i Adam adi dog nyibudo; dayung inŭh adi mbŭh tibudō ka miranggar ukum-adat Tapa.

¹⁵Pak dayung re dog nyiramat darŭm-i mira,[1] kambŭi ayŭh bijijŭ darŭm pinyabah, pinyirindu ka darŭm pimudip kudus, ngga atin tŭkŭn.