Read Biatah Bidayuh 2 TIMOTHY 4 Bible Online

2 TIMOTHY 4 - Biatah Bidayuh bible

2 TIMOTHY 4

¹Di sirung jawin Tapa ngga di sirung jawin Kristus Jesus, adi re jadi arang ngara adi udip ngga adi kabŭs, ka sabab Ayŭh mbŭh re an mandŭg di mritah nimun Raja, aku ngga siabo asŭng ngasu kuu

²da nyuse agah so Tapa, ka piagah-i dŭh kira tika-i patut bait dŭh patut. Kuu an nyibatur ka kidaan sarah daya, ka ngatat daya, darŭm kuu ngajar ngga puno atin sabar.

³Tika-i re mandŭg kan daya re dŭh an dingah ajar adi batur, pak tunda pinyiraan adŭp ngara ka re nguruk bagŭ gurū adi an kidaan di ngara kayuh adi ngara gruwŭn an dingah.

⁴Ngara re abah dingah kayuh adi sawŭ, pak re graŭh an dingah dundan adi au-tarun.

⁵Pak kuu an nakit jaga adŭp mu di tadŭ nga-i; nyijŭn pinyusah, ndai kraja adi nyuse Agah Kana, ka ndai sopŭrŭg kraja mu nimun urun Tapa.

⁶Ka aku ati, tika-i mbŭh mandŭg adi ngga Aku re kabŭs keya ka sadis yŭn Tapa. Dŭm dŭh tui aku re tingge ong ati.

⁷Aku mbŭh birumba ngga situngang tungang ku, ndŭg abo-i, ka aku taŭn babŭ tagap darŭm pinyabah.[3]

⁸Ka madin mbŭh agi kajŭn aku, upah manang udip bamai ngga Tapa, adi Tuhan, arang adi tŭnggŭn, re nggen di aku di Andu anŭ. Dŭh di aku adŭ, pak di sopŭrŭg daya adi kajŭn, ngga pinyirindu, Ayŭh adi re tatŭng.

⁹Suba ngga sibisa bisa mu rikas mandŭg ka yŭn ku.

¹⁰ Demas mbŭh awang ong ati ka mbŭh tagan aku, di ka Thessalonica. Crescens di ka Galatia, ka Titus di ka Dalmatia.

¹¹ Kaŭs-i Luke adŭ agi ngga aku. Taban Mark ngga kamati, sabab ayŭh dapŭd turung aku di kraja.

¹² Aku muko pait Tychicus ka Ephesus.

¹³ Kan kuu mandŭg, taban jipo-tabar ku adi aku tingge di Troas di ramin Carpus; taban gŭh barun barun surat anŭ, rabis-i anŭ adi dog ndai so anyit.

¹⁴ Alexander adi tukang basi agi ndai pinyusah bās di tunduh aku. Tuhan re maras ayŭh nanyam pingandai-i.

¹⁵Nakit jaga adŭp mu so ayŭh, sabab ayŭh mbŭh bandar nyakar kayuh adi ata piagah.

¹⁶Mating daya turung aku sibungas aku minyu nyibandar adŭp ku; sopŭrŭg daya mbŭh tagan aku. Mite Tapa apun adŭ ngara!

¹⁷Pak Tuhan agi ngga aku ka nyibake aku, isa aku tungang piagah ngga sipuno-i Agah Kana anŭ yŭn sopŭrŭg daya adi dŭh bangsa Jahudi dingah; ka aku dog nyiramat so ukum kabŭs.

¹⁸Ka Tuhan re nyiramat aku so sopŭrŭg kayuh arap ka taban aku ka darŭm Pritah-I di shorga. Bragah ka Ayŭh ndŭg situi tui! Amen.

¹⁹ Aku pait tabi ka Priscilla ngga Aquila samŭn rawang Onesiphorus.

²⁰ Erastus rŭŭ di Corinth, ka aku tingge Trophimus di Miletus, sabab ayŭh birandam.

²¹Suba ngga sibisa bisa mu mandŭg diŭ so tipuh madud. Eubulus, Pudens, Linus, ka Claudia pait tabi, ka simŭnŭ gŭh sopŭrŭg daya Kristen adi bŭkŭn.

²²Tuhan agi ngga simangi ngan. Pinyirasi-mandis Tapa agi ngga sopŭrŭg ngan.