Read Biatah Bidayuh HEBREW 1 Bible Online

HEBREW 1 - Biatah Bidayuh bible

HEBREW 1

¹Jah-i Tapa ko siraru minyu di tayung-babuk ta darŭm bagŭ masam gaya so baba bara nabi,

²pak di sikasŭn tipuh ati Ayŭh minyu di ata so Anak-I. Ngga Ayŭh inŭh Tapa napa rangit ngga ong, Ayŭh adi Tapa mbŭh mien da dapu sopŭrŭg kayuh di pinŭbŭn-i.

³Ayŭh nyekar jawa bragah Tapa ka raŭn gayŭn-I agi samah ngga raŭn gayŭn Tapa. Ngga pinganang-I adi bikuasa, Ayŭh digŭng rangit ngga ong. Ripas-I mbŭh dapŭd pingapun dosa yŭn sopŭrŭg manusia, Ayŭh guru di shorga tura ka tauh Tapa, adi siabo bikuasa.

⁴Anak Tapa mbŭh dog bada bās dŭ so bara malaikat, nimun adŭn adi Tapa mbŭh nggen di Ayŭh agi bās dŭ so dŭn bara malaikat.

⁵ Amai Tapa bŭn nang di tadŭ malaikat-I, “Kuu inŭh anak Ku; andu ati Aku mbŭh jadi Sama mu.” Bŭn gŭh Tapa nang pasar tadŭ malaikat, “Aku re jadi Sama-i, ka ayŭh re jadi anak Ku.”

⁶ Pak kan Tapa mbŭh re an pait Anak pinuai-I ka ong, Ayŭh nang, “Sopŭrŭg malaikat Tapa dŭh siŭn dŭh nyambah Ayŭh.”

⁷ Pak pasar bara malaikat Tapa mbŭh nang, “Tapa ndai bara malaikat-I jadi sabak, ka bara urun-I jadi jireb apui.”

⁸ Pak pasar Anak, Tapa mbŭh nang: “Takta Mu, O Tapa, re tan[1] adu adu! Kuu mritah daya Mu[2] ngga pinyitŭnggŭn.

⁹Kuu rindu kayuh adi batur ka tiru di kayuh adi sarah. Ngapŭi Tapa, adi Tapa Mu, mbŭh mien Kuu ka mbŭh nggen di Kuu pinyigaŭn stabi adi rabis bās so adi-I mbŭh nggen di bara dingan Mu.”

¹⁰ Ayŭh gŭh mbŭh nang, “Kuu, Tuhan, di sibungas-i mbŭh napa ong, ka ngga tangan adŭp Mu Kuu mbŭh napa rangit.

¹¹Sopŭrŭg anŭ re miyap, pak Kuu re babŭ; sopŭrŭg-i re rusak mun piraka.

¹²Kuu re ngupet-i mun jipo-tabar, ka sopŭrŭg-i re dog nukar mun piraka. Pak Kuu dŭh re birubah, ka pimudip Mu dŭh biyŭn pinŭbŭn.”

¹³ Tapa bŭn nang di tadŭ malaikat-I: “Guru digiti tura ka tauh Ku ndŭg ka Aku mbŭh bada pinganyu mu jadi bangan di ribo kaja mu.”

¹⁴Ani bara malaikat? Ngara anŭ roh adi bituan di Tapa, adi-I pait da turung sinadan daya adi re kambat pinyiramat.