Read Biatah Bidayuh HEBREW 10 Bible Online

HEBREW 10 - Biatah Bidayuh bible

HEBREW 10

¹Ukum-adat Jahudi dŭh-i suto adi sukup kana yŭn kayuh adi sawŭ. Anŭ batur-i singangi kayuh kana adi re mandŭg. Sadis anŭ anŭ dog jugan barang sawa. Simuki meh Ukum-adat re bisa, ngga sadis ati, bada sukup kana daya adi mandŭg nyambah Tapa?

²Kambŭi daya adi nyambah Tapa sawŭ mbŭh dog pibisig so dosa ngara, ngara dŭh tia kinyam sarah darŭm atin ngara, ka sadis dŭh re tia dog jugan.

³Jadi sadis adi dog jugan barang sawa batur-i bada daya rada dosa ngara.

⁴Amai deya dari sapi ka deya kambing dŭh dapŭd taran dosa.

⁵ Sitagar anŭ, kan Kristus mbŭh re an mandŭg ka ong, Ayŭh nang di Tapa: “Kaam dŭh raan sadis ngga pinganggen, pak Kaam mbŭh sidia pŭrŭng yŭn Ku.

⁶Kaam dŭh munos di ndi pŭrŭng dāng dog badang di tunduh mija-sambah puan kah sadis ngga taran dosa.

⁷Jadi Aku nang, ‘Ta Aku, O Tapa, an ndai pinyiraan Mai, nimun adi dog nuris pasar Aku darŭm surat Ukum-adat,’ ”

⁸Sibungas-i Ayŭh nang, “Kaam dŭh raan bait munos asŭng di sadis ngga pinganggen puan kah di dāng adi dog badang di tunduh mija-sambah samŭn sadis adi ngga taran dosa.” Ayŭh nang sakanŭ sunggu sopŭrŭg sadis anŭ dog jugan nanyam ka Ukum-adat.

⁹Komŭnŭ Ayŭh nang, “Ta Aku, O Tapa, an ndai pinyiraan Mai.” Jadi Tapa kadi sadis adi amba ka gati-i ngga sadis Kristus.

¹⁰Sabab Jesus Kristus ndai kayuh adi Tapa raan Ayŭh ndai, ata sopŭrŭg mbŭh dog pibisig so dosa da sadis pŭrŭng adŭp-I adi dog jugan ndi sidah yŭn adu adu.

¹¹ Barang andu bara imam Jahudi ndai kraja ngara ka marar jugan sadis anŭ anŭ, sadis adi dŭh dapŭd taran dosa.

¹² Pak Kristus jugan ndi sadis ngga taran dosa, sadis anŭ ngasi ndŭg situi tui; komŭnŭ Ayŭh guru tura ka tauh Tapa.

¹³Diginŭ Ayŭh madin kajŭn ndŭg ka Tapa mbŭh bada pinganyu-I jadi bangan di ribo kaja-I.

¹⁴Ngga ndi sadis meh, Ayŭh mbŭh bada sukup kana ndŭg situi tui sinadan daya adi dog pibisig so dosa.

¹⁵Ka Roh Kudus gŭh mbŭh bisaksi di ata. Roh Kudus nang,

¹⁶ “Ati inŭh simanya adi Aku re ndai ngga ngara darŭm tipuh adi re mandŭg, nang Tuhan: Aku re na ukum-adat Ku di atin ngara ka nuris-i di pikir ngara.”

¹⁷ Ka komŭnŭ Ayŭh nang, “Aku dŭh re tia ingat dosa ngga pingandai arap ngara.”

¹⁸Jadi kan sopŭrŭg dosa ngga pingandai arap mbŭh dog apun, sadis dŭh re tia biguna.

¹⁹Bara dingan ku, ata bisa, ngga pinyikabŭs Jesus, mŭrŭt ngga atin pus ka darŭm Yŭn adi Siabo Kudus.

²⁰Ayŭh mbŭh kuka yŭn ta aran adi bauh, aran adi udip, so ka Tabir anŭ adi taŭn mbŭh pŭrŭng adŭp-I.

²¹Ata biyŭn imam bās adi jaga Ramin Tapa.

²² Jadi ja meh ata di nyindŭk Tapa ngga atin tŭnggŭn ka ngga pinyabah adi sawŭ, ngga atin adi mbŭh dog pibisig so pikir-kira atin adi mbŭh kinyam sarah ka ngga pŭrŭng adi dog mamuh ngga piin bisig.

²³Ja ata bidigŭng tagap di pingarap adi ata ngaku, sabab ata sabah Tapa ta taŭn ingat janji-I.

²⁴Ja ata ingat rada dingan ta, turung dingan kiren pinyirindu ka ndai pingandai kana.

²⁵Dŭhnyah mun ngara adi bŭkŭn, adi dŭh an nyigiran ari mandŭg tikuruk. Ata an ari ngatat dingan ta, amai Andu Tuhan mbŭh dŭ dŭ sindŭk.

²⁶Amai re mating tia sadis adi ngga taran dosa ta kambŭi ata saji adu adu ndai dosa ripas ajar adi sawŭ pasar Agah Kana muko dog ngajar di ata.

²⁷ Kaŭs-i kayuh adi ata patut rada madin inŭh, ata kajŭn darŭm taru andu anŭ adi ngga Tapa mandŭg jadi arang, ka apui bās anŭ adi re pirarap sinadan daya adi rawan Tapa!

²⁸ Daya adi nyibireu Ukum-adat Moses dog ukum kabŭs; mating apun di ngara kan dog dapŭd sarah so pinganang duwŭh puan kah taruh naan saksi.

²⁹ Simuki meh ngga ngara adi ngamun Anak Tapa, adi kinarap deya simanya Tapa adi mbŭh pibisig ngara so dosa, ka adi pimangŭh Roh Kudus adi rindu ngara? Suba kira, munki masam bisā-i re tung ngara ukum!

³⁰ Amai ata puan asi Ayŭh adi nang, “Aku re maras dendam, Aku re rapas”; ka Ayŭh gŭh adi nang, “Tuhan re jadi arang daya-I.”

³¹Taŭn-i raru payah inŭh nŭŭh rabu ka darŭm tangan Tapa adi udip!

³²Ingat nŭh munki angān dawŭ-i. Di tipuh anŭ, ripas jawa Tapa nyekar di angān, angān sangsara da bagŭ masam kayuh, ka angān dŭh arah.

³³Angān agi andu dog pimangŭh ka dog kijera di sirung jawin daya bagŭ, ka agi andu angān saji sua ngga ngara adi dog ndai simŭnŭ.

³⁴Angān mbŭh samah kinyam pinyusah daya-takap, ka kan sopŭrŭg rata ngan dog sirapas, angān nyijŭn ngga sanang asŭng, sabab angān puan nang adŭp ngan babŭ biyŭn anŭ adi kana dŭ, adi tan adu adu.

³⁵Dŭhnyah kinanyap atin pagan ngan, sabab-i taban upah adi bās.

³⁶Angān an sabar, siŭn angān tungang ndai pinyiraan Tapa ka kambat kayuh adi-I bijanji an nggen.

³⁷ Amai, nimun adi nang Surat-kudus, “Dŭm nyitiro, ka Ayŭh adi re mandŭg re ndŭg; Ayŭh dŭh re rambat.

³⁸Daya Ku adi tŭnggŭn re sabah ka re udip; pak kambŭi agi so ngara dŭh tia sabah di Aku, Aku dŭh re sanang asŭng di ngara.”

³⁹Ata dŭh inŭh daya adi dŭh sabah di Tapa, ka adi manyap. Ata inŭh daya adi biyŭn pinyabah ka adi mbŭh siramat.