Read Biatah Bidayuh HEBREW 11 Bible Online

HEBREW 11 - Biatah Bidayuh bible

HEBREW 11

¹Biyŭn pinyabah, rati-i ata mbŭh puan adŭp ta tatu re dapŭd kayuh adi ata harap, buang puan kayuh anŭ adi ata dŭh tungang kiris agi sawŭ.

²Amai pinyabah ngara inŭh Tapa munos asŭng-I di tayung-babuk ta.

³ So pinyabah inŭh ata mirati nang rangit ngga ong dog napa ngga pinganang Tapa, ka ngga simŭnŭ meh kayuh adi tungang dog kiris mbŭh dog napa so kayuh adi dŭh tungang dog kiris.

⁴ Pinyabah inŭh adi bada Abel jugan ka Tapa sadis adi kana dŭ so tung Cain. Sabab pinyabah-i ayŭh mbŭh daya tŭnggŭn di batŭh Tapa, sabab adŭp Tapa mbŭh munos asŭng-I di pinganggen-i. So ka pinyabah-i Abel babŭ minyu, sunggu ayŭh mbŭh kabŭs.

⁵ Pinyabah inŭh adi bada Enoch dŭh kabŭs. Ayŭh dog tambit ka dog taban ka yŭn Tapa. Mating daya tungang dapŭd ayŭh, sabab ayŭh mbŭh dog tambit adŭp Tapa. Sŭn Surat-kudus nang, diŭ so Enoch dog tambit, ayŭh agi pimunos asŭng Tapa.

⁶Mating daya tungang pimunos asŭng Tapa, adŭ-i ngga pinyabah. Amai asi asi adi mandŭg ka Tapa dŭh siŭn dŭh an sabah di Tapa nang Ayŭh sawŭ agi, Ayŭh adi ngupah daya adi jiroh adŭp-I.

⁷ Pinyabah inŭh adi bada Noah dingah pinyibakan Tapa pasar kayuh adi re jadi adi-i dŭh tungang kiris. Ayŭh tunda pinganang Tapa ka ndai batra adi yŭn-i ngga rawang-i siramat. Komŭnŭ meh Tapa ngukum ong, ka sabab pinyabah-i Noah mbŭh kambat so Tapa pinŭnggŭn adi jadi so pinyabah.

⁸ Pinyabah inŭh adi bada Abraham tunda pinganang Tapa kan-I bagan ayŭh da di ka rais adi-I ko bijanji an nggen di ayŭh. Ayŭh bu tingge rais adŭp-i, dŭh puan kamaki-i di.

⁹ Ngga pinyabah ayŭh udip mun daya tami di rais adi Tapa ko bijanji an nggen di ayŭh. Ayŭh rŭŭ di bari, mun Isaac ngga Jacob, adi samah kambat janji anŭ so Tapa.

¹⁰Kayuh anŭ simŭnŭ, amai Abraham kajŭn kupo anŭ adi tan adu adu, adi adŭp Tapa ko ngatur ka pijog.

¹¹ Pinyabah inŭh adi bada Abraham tungang jadi sama, sunggu ayŭh mbŭh raru minyamba ka Sarah taŭn-i mbŭh aboh. Ayŭh[11] taŭn sabah Tapa ingat janji-I.

¹² Sunggu Abraham dŭh tui re kabŭs, so ayŭh sadi mbŭh ruah bagŭ sesang mun dudu bitang di rangit, ka mun dudu sirah sumat di tabing rawŭt.

¹³ Darŭm babŭ sabah ngara kabŭs. Ngara mating kambat kayuh anŭ adi Tapa ko bijanji an nggen, pak so jo ngara agi kiris-i ka angan-i, buang ngaku adŭp-i daya tami ka daya nupang di ong ati.

¹⁴Ngara adi minyu sakanŭ taŭn mbŭh kiren adŭp-i jiroh rais adi bisa dog kadŭn tung adŭp-i.

¹⁵Ngara dŭh ingat rais adi ngara tingge; kambŭi ngara babŭ ingat, ngara biyŭn pluang ngga pari kamanŭ.

¹⁶Pak rais adi ngara gruwŭn inŭh rais adi kana dŭ, rais shorga. Ngapŭi Tapa dŭh mangŭh kan ngara ngaku Ayŭh Tapa, sabab Ayŭh mbŭh sidia kupo yŭn ngara.

¹⁷ Pinyabah inŭh adi bada Abraham jugan anak-I Isaac ndu sadis kan Tapa suba ayŭh. Ngga adŭp Abraham inŭh Tapa mbŭh ndai janji-I, pak babŭ gŭh Abraham sidia an jugan anak tambŭ-i ndu sadis.

¹⁸ Tapa nang di ayŭh, “So Isaac kuu re biyŭn bara sesang adi Aku ko bijanji an nggen.”

¹⁹Abraham puan Tapa tungang pakat Isaac so kabŭs; ka bisa ata kadŭn, Abraham mbŭh keya ka kambat Isaac pari so kabŭs.

²⁰ Pinyabah inŭh adi bada Isaac bijanji an nggen berkat yŭn jaman jŭ di Jacob ngga Esau.

²¹ Pinyabah inŭh adi bada Jacob, diŭ so-i kabŭs, nyiberkat barang naan anak Joseph. Ayŭh bisangan di ubak sikud-i ka nyambah Tapa.

²² Pinyabah inŭh adi bada Joseph, kan-i mbŭh re kabŭs, minyu pasar pinyiruah bara daya Israel so Egypt, buang-i nggen pinganang pasar munki re ngga pŭrŭng-i kan ayŭh mbŭh kabŭs.

²³ Pinyabah inŭh adi bada pimas Moses sukan ayŭh sitian taruh buran ripas-i ko dog biranak. Ngara kiris pira-i ramus, ka ngara dŭh taru nyibireu pritah raja.

²⁴ Pinyabah inŭh adi bada Moses, kan-i mbŭh baga, abah dog kadŭn sukuh raja Egypt.

²⁵Ayŭh an dŭ sua kinyam sangsara ngga bara daya adi Tapa mbŭh mien so-i nyitiro pimunos adŭp-i ngga dosa.

²⁶Ayŭh puan nang kinyam sangsara yŭn Kristus mbŭh jo biguna dŭ so sopŭrŭg pinyikaya Egypt, amai ayŭh nŭtŭn tingga upah adi re mandŭg jŭ.

²⁷ Pinyabah inŭh adi bada Moses bu tingge Egypt darŭm dŭh taru di baji raja. Mun adi ko kiris Tapa adi dŭh tatŭng, ayŭh abah pari ka Egypt.

²⁸ Pinyabah inŭh adi bada ayŭh ndai Paska ka nggen ukum bada deya dog masik di barang tiban, isa Malaikat Pinyikabŭs dŭh siŭ bara anak pinuai daya Israel.

²⁹ Pinyabah inŭh adi bada bara daya Israel tungang mutas Rawŭt Bireh, mun adi panu di tunduh tana badŭh; kan bara daya Egypt suba an ndai simŭnŭ, rawŭt anŭ pirŭnggŭd ngara.

³⁰ Pinyabah inŭh adi bada sindung kupo Jericho rubuh ripas bara daya Israel baris maning-i sitian ju andu.

³¹ Pinyabah inŭh adi bada Rahab adi dayung sundar dŭh dog siŭ samah ngga ngara adi nyibireu pinganang Tapa, amai ayŭh ko nakit kambat pinyiong pinyiong Israel.

³² Bisa kah aku pijuu dundan ku? Tipuh dŭh sukup re ku ngga minyu pasar Gideon, Barak, Samson, Jephthah, David, Samuel, ka bara nabi.

³³ Ngga Pinyabah ngara nyerang ka ngarah barang rais. Ngara ndai kayuh adi batur ka kambat kayuh adi Tapa ko bijanji an nggen. Ngara tŭŭp baba singah,

³⁴ mura apui adi bisā, bu mangān dog siŭ ngga pedang. Ngara ramah, pak jadi bake; ngara bikuasa darŭm perang ka ngarah bara soldadu daya bangsa bŭkŭn.

³⁵ Ngga pinyabah, bara dayung kambat bara madis ngara adi mbŭh dog pakat so kabŭs. Adi bŭkŭn, abah dog pirupas, kabŭs dog kijera ramŭn an dog pakat ka pimudip adi kana dŭ.

³⁶ Kada ngara dog pimangŭh ka dog madŭs, ka adi bŭkŭn dog muak ngga parik basi ka dog pibŭrŭt ka darŭm jer.

³⁷ Ngara dog manjan ngga batuh ndŭg kabŭs, ngara dog kapŭg nyinuwŭh ngga grigaji, ngara dog siŭ ngga pedang. Ngara panu nēn anyit biri puan kah anyit kambing. Ngara sirata, dog kisiis, ka dog kinanyuh.

³⁸Ong dŭh sukup kana yŭn ngara! Ngara bijaruh mun daya nupang di tarun tana-pajam ka di sandah, rŭŭ darŭm tang ka darŭm rubang tana.

³⁹Sopŭrŭg ngara mbŭh pimunos asŭng Tapa ngga pinyabah ngara di Ayŭh! Pak Ngara mating kambat kayuh adi Tapa ko bijanji an nggen,

⁴⁰sabab Tapa mbŭh natu kayuh adi kana dŭ yŭn ta. Tujuan-I inŭh, ngara bisa jadi sukup kana adŭ-i darŭm biayo ngga ata.