Read Biatah Bidayuh HEBREW 12 Bible Online

HEBREW 12 - Biatah Bidayuh bible

HEBREW 12

¹Mun ata ati, ata biyŭn bara saksi maning ata. Ja ata pasan kadi kayuh adi matŭn ata, samŭn dosa adi rakat di ata, ka bikaduh ngga siabo asŭng darŭm rumba adi mbŭh dog sidia yŭn ta.

²Ja ata adu adu nyigura ka Jesus, di yŭn pinyabah ta bisangan so sibungas-i ndŭg sikasŭn-i. Ayŭh dŭh arah da rigang! Pak, sabab pinyigaŭn adi kajŭn Ayŭh, Ayŭh dŭh kira mangŭh kabŭs di atuh rigang, ka madin Ayŭh mbŭh guru tura ka tauh takta Tapa.

³Suba pikir kayuh adi mbŭh nyatŭk Ayŭh; munki Ayŭh nyijŭn arap daya adi bidosa di tunduh adŭp-I! Jadi dŭhnyah meh atin ngan jadi ramah buang an ngundur.

⁴Amai darŭm angān birawan ngga dosa angān gibayuh rawan-i ndŭg ka adŭp ngan dog siŭ.

⁵ Mbŭh kambŭt ngan kah pinganang adi ngga Tapa ngatat angān, angān adi keya ka bara anak-I? “Nak, nakit dingah kan Tuhan ngajar angān, ka dŭhnyah jimŭ kan Ayŭh nang angān.

⁶Sabab Tuhan ngajar barang naan daya adi-I rindu, ka ngukum barang naan daya adi-I ngaku anak adŭp-I.”

⁷Nyijŭn sangsara ngan adi keya ka ukum so Tapa; sangsara ngan kiren Tapa ngatur pimudip ngan nimun bara anak-I. Agi kah anak dŭh dog ukum sama-i?

⁸Kambŭi angān dŭh dog ukum, mun bara anak-I adi bŭkŭn, rati-i angān dŭh anak-I adi sawŭ, pak anak-apang.

⁹Mun sama ta di ong, ngara ngukum ata ka ata stabi di ngara. Jung ka meh ata an rabis nundok di Sama ta adi di shorga siŭn dapŭd udip!

¹⁰Sama ta di ong ngukum ata nyitiro adŭ, nimun patut sŭn-i nang; pak Tapa ngukum ata yŭn kana adŭp ta, isa ata bisa jadi kudus mun adŭp-I.

¹¹Kan ata dog ukum, ukum anŭ bada asŭng ta susah, dŭh-i bada sanang. Ripas anŭ, ngara adi dog ngajar ngga ukum anŭ re kambat damai adi upah pimudip tŭnggŭn.

¹² Pakat meh tangan ngan adi ramah, ka nyibake karŭb ngan!

¹³ Adu adu panu di aran adi tŭnggŭn, isa kaja anŭ adi bajang dŭh jadi rabis arap, pak bua.

¹⁴Gruwŭn adŭp ngan udip darŭm damai ngga sopŭrŭg daya, ka gruwŭn pimudip adi kudus; amai kambŭi dŭh simŭnŭ nŭŭh dŭh re tungang kiris Tuhan.

¹⁵ Ingat dŭhnyah angān ngundur so pinyirasi-mandis Tapa. Dŭhnyah angān jadi mun anak tŭngŭn kayuh adi pa'it adi taban bagŭ pinyusah ngga rasun-i.

¹⁶ Dŭhnyah angān udip darŭm pimudip adi dŭh tatu darŭm pingandai kais puan kah dŭh mbit bat di kayuh roh mun Esau, adi sitagar an dapŭd ndi pinggen pinguman mbŭh jua hak-i adi jadi anak pinuai.

¹⁷ Ripas anŭ, angān puan, ayŭh raan kambat berkat nyama-i; pak ayŭh dŭh dog piduri, sabab ayŭh dŭh tungang marik kayuh adi ko-i ndai, sunggu-i ngga sien ayŭh suba.[12]

¹⁸ Angān gi-mating mandŭg mun daya Israel ka kayuh adi bisa dog kinyam, anŭ inŭh Darŭd Sinai ngga apui-i adi bijagu, ka yŭn karŭm, yŭn maput, yŭn sabak ribut,

¹⁹ka yŭn dingah jawŭn trompet, ka dingah sak jawŭn sirŭŭn. Kan daya dingah sirŭŭn anŭ, ngara bandar mite adŭp-i dŭh tia dingah-i,

²⁰ sabab ngara dŭh tan dingah pinganang adi nang, “Dāng bina, kambŭi-i tama darŭd ati, dŭh siŭn dŭh dog manjan ngga batuh ndŭg kabŭs.”

²¹ Kayuh anŭ mbŭh raru sipŭ-i ndŭg ka adŭp Moses agi nang, “Aku kimŭtŭr ka taru!”

²²Pak angān mbŭh di ka Sandah Zion samŭn kupo Tapa adi udip, anŭ inŭh Jerusalem adi di shorga, ngga biribu ribu bara malaikat.

²³Angān mbŭh mandŭg ka yŭn bara anak pinuai Tapa tikuruk darŭm gaŭn, adi mbŭh dog nuris dŭn-i di shorga. Angān mbŭh mandŭg ka Tapa, adi arang sopŭrŭg bangsa manusia, ka mbŭh mandŭg ka yŭn roh roh bara daya adi kana, adi mbŭh dog bada jadi sukup kana.

²⁴ Angān mbŭh mandŭg ka Jesus, adi mbŭh ngatur simanya bauh anŭ, buang ka yŭn deya adi mbŭh dog masik adi natu kayuh adi kana dŭ so adi dog natu deya Abel.

²⁵ Ingat meh garang, dŭhnyah abah dingah sianŭ adi minyu. Daya adi abah dingah pinganang sianŭ adi mandŭg ka ong di piagah agah so Tapa, dŭh tungang nyiramat adŭp-i. Ata rabis dŭh tungang nyiramat adŭp ta kambŭi ata nyipunok Ayŭh adi minyu so shorga!

²⁶ Di tika anŭ sirŭŭn-I ngugoh ong, pak madin Ayŭh mbŭh bijanji, “Dŭm ndi sidah Aku re ngugoh, dŭh-i ong adŭ pak rangit ani.”

²⁷Pinganang anŭ “dŭm ndi sidah” mbŭh granan kiren nang kayuh adi mbŭh dog napa re dog ngugoh ka dog kadi, isa kayuh adi dŭh tungang dog ngugoh bisa babŭ.

²⁸Ata patut nggen trima kaseh, sabab ata kambat pritah adi dŭh tungang dog ngugoh. Ja ata nggen trima kaseh ka nyambah Tapa ngga gaya adi pimunos asŭng-I, darŭm stabi ngga taru;

²⁹ sabab Tapa ta taŭn-I sawŭ keya ka apui adi pirabur.