Read Biatah Bidayuh HEBREW 13 Bible Online

HEBREW 13 - Biatah Bidayuh bible

HEBREW 13

¹Nimun patut-i angān adi Kristen, angān an adu adu rindu dingan ngan.

² Dŭhnyah abah kambat pinami ka darŭm arŭn ngan. Darŭm ndai simŭnŭ mbŭh agi daya, darŭm dŭh rada, kambat malaikat.

³Ingat ngara adi darŭm jer, keya ka adŭp ngan agi ngga ngara darŭm jer. Ingat ngara adi sangsara, keya ka adŭp ngan agi sangsara mun ngara.

⁴Sopŭrŭg daya an stabi di banan sawan, ka banŭh bait sawŭn dŭh siŭn dŭh an tŭtŭd ngga dingan-i. Tapa re ngukum daya adi udip darŭm sarah ka daya adi tanggah.

⁵ Bada pimudip ngan jo so pinyiawang duit, ka bada adŭp ngan munos ngga anŭ adi angān mbŭh biyŭn. Amai Tapa mbŭh nang, “Aku dŭh re tandah angān; Aku dŭh re tagan angān.”

⁶ Jadi pus meh ata, ka nang, “Tuhan inŭh pinurung ku, Aku dŭh re taru. Ani meh bisa daya ndai di tunduh ku?”

⁷Ingat bara pinguru ngan adi mbŭh, adi ko piagah agah Tapa di angān. Ingat munki ngara ko udip ka kabŭs, ka nanya meh pinyabah ngara.

⁸Jesus Kristus inŭh babŭ mijah, andu ati, ka adu adu.

⁹Dŭhnyah bada barang masam ajar adi saruh taban angān miriseu so aran adi batur. Kana dŭ inŭh ata dog nyibake ngga pinyirasi-mandis Tapa, ka dŭh so tunda atur pasar pinguman; ngara adi tunda atur anŭ bŭn-i dapŭd utung so dieh.

¹⁰Bara imam adi nyiraja di tarun yŭn daya Jahudi bisambah dŭh biyŭn hak re man sadis adi di tunduh mija-sambah ta.

¹¹ Imam Bās Jahudi taban deya dāng ka darŭm Yŭn adi Siabo Kudus yŭn jugan-i ndu sadis ngga taran dosa; pak pŭrŭng dāng anŭ dog badang di sapa tarun yŭn daya bibari.

¹²Sabab anŭ meh Jesus kabŭs di sapa kupo, siŭn-I pibisig daya-I so dosa ngga deya adŭp-I.

¹³Ja ata di ka yŭn-I di sapa tarun yŭn daya bibari ka sua dapu mangŭh-I.

¹⁴Amai mating kupo adi tan adu adu yŭn ta di ong ati; ata jiroh kupo anŭ adi re mandŭg.

¹⁵Ja ata siraru jugan puji ka Tapa ndu sadis ta so ka Jesus, adi pinganggen so baba adi ngaku Ayŭh Tuhan.

¹⁶Dŭhnyah kambŭt ndai pingandai kana ka turung dingan ngan, sabab anŭ inŭh sadis adi pimunos asŭng Tapa.

¹⁷Tŭtŭd ngga bara pinguru ngan ka nurut pritah ngara. Ngara dŭh masah jaga simangi ngan, amai ngara mbŭh dapu tanggong kraja ngara di sirung jawin Tapa. Kambŭi angān tŭtŭd ngga ngara, ngara re ndai kraja ngara ngga atin gaŭn; kambŭi dŭh, ngara re ndai-i ngga atin susah, ka-i dŭh re jadi utung di angān.

¹⁸Adu adu simayang yŭn kieh. Kieh batur batur puan pikir-kira atin ami agi bisig, sabab kieh raan ari ndai kayuh adi batur.

¹⁹Aku mite angān simayang mite Tapa rikas pait aku ka angān.

²⁰Tapa mbŭh pakat Tuhan ta Jesus so kabŭs, adi Pingingat-Biri adi bās sabab deya-I,[13] adi ngga simanya adi tan adu adu dog natu. Isa-i Tapa damai nggen di angān sopŭrŭg kayuh kana adi angān biguna ngga ndai pinyiraan-I, ka isa Ayŭh, so Jesus Kristus, ndai darŭm ata kayuh adi pimunos asŭng-I. Ka di Kristus bragah ndŭg situi tui! Amen.

²²Aku mite angān, bara dingan ku, dingah ngga atin sabar ajar adi ngga ku ngatat angān; amai surat ku ati adi nuris ku ka angān dŭh-i ambu.

²³Aku raan angān puan dingan ta Timothy mbŭh dog piruah so ramin jer. Kambŭi ayŭh awar mandŭg, aku re taban ayŭh kan aku mandŭg ka yŭn ngan.

²⁴Nggen tabi ami di sopŭrŭg pinguru ngan ka di sopŭrŭg daya adi Tapa mbŭh mien. Bara adi sabah adi so Italy pait tabi ka angān.

²⁵Isa-i pinyirasi-mandis Tapa agi ngga sopŭrŭg ngan.