Read Biatah Bidayuh HEBREW 2 Bible Online

HEBREW 2 - Biatah Bidayuh bible

HEBREW 2

¹Anŭ inŭh sabab ata dŭh siŭn dŭh an rabis tagap bidigŭng di ajar ajar anŭ adi ata ko dingah, isa ata dŭh manyap.

²Agah adi mbŭh dog nggen bara malaikat di tayung-babuk ta mbŭh tatŭng sawŭ, ka asi asi adi dŭh tunda-i puan kah dŭh sita-i mbŭh kambat ukum-i.

³Simuki meh garang ata re bisa mangān ukum kambŭi ata dŭh piduri pinyiramat bās anŭ? Adŭp Tuhan mbŭh piagah pinyiramat anŭ, ka ngara adi dingah Ayŭh mbŭh kiren di ata kayuh anŭ agi sawŭ.

⁴Nganŭ gŭh adŭp Tapa mbŭh natu sopŭrŭg-i sawŭ ngga barang masam pingandai-nginga ka pingandai-saruh-I, ka ngga pinganggen Roh Kudus adi-I kutung nanyam ka pinyiraan adŭp-I.

⁵Tapa mating bada bara malaikat nguasa ong bauh adi re mandŭg, anŭ inŭh ong adi kieh nang.

⁶ Amai, nanyam ka adi mbŭh dog nuris darŭm Surat-kudus: “Ani manusia, O Tapa, ka Kaam patut na pikir Mai di ngara; tigŭrŭ manusia, ka Kaam patut mbit bat dieh?

⁷Kaam mbŭh bada ngara nyitiro rapat so bara malaikat; Kaam mbŭh nggen di ngara makota bragah ngga stabi,

⁸ka mbŭh bada ngara jadi pinguasa sopŭrŭg kayuh.” Ayat anŭ nang Tapa mbŭh bada manusia jadi “pinguasa sopŭrŭg kayuh”; anŭ inŭh samŭn tadŭ tadŭ kayuh. Pak madin dŭh ata kiris manusia nguasa sopŭrŭg kayuh.

⁹Pak ata mbŭh kiris Jesus, adi ko nyitiro dog bada rapat so bara malaikat, isa so pinyirasi-mandis Tapa Ayŭh patut kabŭs yŭn sopŭrŭg daya. Madin ata kiris Ayŭh dog nggen makota bragah ngga stabi sabab jera-birasa pinyikabŭs adi-I ko kinyam.

¹⁰Taŭn-i mbŭh patut Tapa, adi napa ka kudip sopŭrŭg kayuh, bada Jesus jadi sukup kana so jera-birasa, siŭn bagŭ anak Tapa dapŭd sua dapu bragah-I. Amai Jesus inŭh adi taban ngara ka pinyiramat.

¹¹Ayŭh pibisig manusia so dosa ngara; Ayŭh ngga ngara adi mbŭh dog pibisig samah dapu ndi Sama. Anŭ inŭh sabab Jesus dŭh mangŭh kadŭn ngara rawang-I.

¹² Ayŭh nang di Tapa, “Aku re kidaan di bara jurud Ku kayuh adi Kaam mbŭh ndai; Aku re muji Kaam di tika ngara tikuruk.”

¹³ Ayŭh nang gŭh, “Aku re na pingarap Ku di Tapa.” Ka-I nang gŭh, “Ta Aku ngga bara anak adi Tapa mbŭh nggen di Aku.”

¹⁴Amai sabab ngara adi Ayŭh kadŭn anak taŭn-i daya adi biyŭn isin ngga deya, adŭp Jesus mbŭh jadi mun ngara ka udip di ong mun manusia. Ayŭh ndai simŭnŭ isa so pinyikabŭs-I Ayŭh bisa ngarah Siarap, adi biyŭn kuasa di tunduh pinyikabŭs;

¹⁵ka simŭnŭ gŭh Ayŭh pirupas ngara adi mbŭh keya ka urun sitŭkŭd udip ngara sabab taru pinyikabŭs.

¹⁶Amai mbŭh granan tatŭng dŭh-i malaikat adi-I turung, pak bara sesang Abraham.

¹⁷Ka rati-i, Ayŭh dŭh siŭn dŭh an jadi mun bara daya-I darŭm sopŭrŭg kayuh siŭn-I jadi Imam Bās ngara adi tŭtŭd ka adi puno ngga masi, darŭm bituan di Tapa, isa dosa sopŭrŭg daya-I bisa dog apun.

¹⁸Madin Ayŭh tungang turung ngara adi dog pinyisuba, sabab adŭp-I muko dog pinyisuba ka jera.