Read Biatah Bidayuh HEBREW 3 Bible Online

HEBREW 3 - Biatah Bidayuh bible

HEBREW 3

¹Bara dingan ku adi Kristen, adi dog bagan Tapa gŭh! Na pikir ngan di Jesus, adi Tapa mbŭh pait da jadi Imam Bās pinyabah adi ata ngaku.

² Ayŭh tŭtŭd di Tapa, adi mbŭh mien Ayŭh da ndai kraja anŭ, nimun Moses mbŭh tŭtŭd darŭm kraja-i di ramin Tapa.

³Daya adi pijog ramin dapŭd stabi rabis bās so adŭp ramin anŭ. Simŭnŭ gŭh Jesus patut dapŭd stabi rabis bās so adi Moses dapŭd.

⁴Tiap ramin taŭn-i dog ndai daya, pak Tapa inŭh adi ndai sopŭrŭg kayuh.

⁵Moses agi sawŭ tŭtŭd darŭm ramin Tapa nimun urun, ka ayŭh minyu pasar kayuh adi Tapa re nang jŭ.

⁶Pak Kristus agi tŭtŭd nimun Anak darŭm-I jaga daya Tapa. Ata inŭh daya-I kambŭi ata bijijŭ ngga atin pagan ka ngga atin-sabah di kayuh adi ata harap.

⁷ Jadi meh, sak adi nang Roh Kudus, “Kambŭi angān dingah sirŭŭn Tapa andu ati,

⁸dŭhnyah bada adŭp ngan baking mun tayung-babuk ngan di andu ngara rawan Tapa, mun ngara di andu ngara suba Ayŭh di tarun tana-pajam.

⁹Diginŭ ngara suba Aku, Tapa nang, sunggu ngara mbŭh kiris kayuh adi Aku ko ndai sitŭkŭd pat puru sawa.

¹⁰Ngapŭi Aku baji di ngara ka nang, ‘Ngara siraru tirawan Aku ka abah tunda pinyipesan Ku.’

¹¹Aku baji ka bipayu: ‘Ngara dŭh re mŭrŭt tarun tana anŭ adi yŭn Ku an nggen rŭŭ-paya di ngara!’ ”

¹²Bara dingan ku, jaga meh sibia-i atin ngan jadi raru arap ka abah sabah ndŭg ka bu so Tapa adi udip.

¹³Pak, siŭn mating so angān jadi tibudō da dosa ka jadi baking, angān dŭh siŭn dŭh an turung dingan ngan barang andu siragi ata udip di jaman adi dog kadŭn di Surat-kudus “Andu Ati.”

¹⁴Amai sopŭrŭg ata samah nyiraja ngga Kristus kambŭi ata bidigŭng tagap di atin-sabah ta anŭ adi ata mbŭh biyŭn so sibungas ndŭg sikasŭn-i.

¹⁵ Ati inŭh kayuh adi Surat-kudus nang: “Kambŭi angān dingah sirŭŭn Tapa andu ati, dŭhnyah bada adŭp ngan baking mun tayung-babuk ngan, di andu ngara rawan Tapa.”

¹⁶Asi ngara adi dingah sirŭŭn Tapa ka rawan Ayŭh? Sopŭrŭg ngara adi Moses taban ngga ruah so Egypt.

¹⁷Di asi Tapa baji sitŭkŭd pat puru sawa? Di ngara adi bidosa, adi kabŭs di tarun tana-pajam.

¹⁸Di andu Tapa bipayu, “Ngara dŭh re mŭrŭt tarun tana anŭ adi yŭn Ku an nggen rŭŭ-paya di ngara,” pasar asi Ayŭh nang sakanŭ? Pasar ngara adi rawan Ayŭh.

¹⁹Madin ata puan nang ngara dŭh dapŭd mŭrŭt tarun tana anŭ, sabab ngara dŭh sabah.