Read Biatah Bidayuh HEBREW 4 Bible Online

HEBREW 4 - Biatah Bidayuh bible

HEBREW 4

¹Madin Tapa mbŭh nggen janji-I anŭ di ata, anŭ inŭh ata bisa kambat rŭŭ-paya anŭ adi-I nang. Sabab anŭ ata patut an nakit, isa mating so ata dog dapŭd dŭh patut kambat rŭŭ-paya anŭ.

²Amai ata mbŭh dingah Agah Kana anŭ, mun ngara gŭh. Ngara dingah agah anŭ, pak-i dŭh biguna yŭn ngara, sabab kan ngara dingah-i, ngara dŭh kambat-i ngga pinyabah.

³ Ata adi sabah, meh, mbŭh kambat rŭŭ-paya anŭ adi Tapa ko bijanji an nggen. Sak adi nang-I, “Aku baji ka mbŭh bipayu: ‘Ngara dŭh re mŭrŭt tarun tana anŭ adi yŭn Ku an nggen rŭŭ-paya di ngara!’ ” Ayŭh nang sakanŭ sunggu kraja-I mbŭh kamas so sibungas ong dog napa-I.

⁴ Amai agi darŭm Surat-kudus dog nang sakati pasar andu adi ju: “Tapa rŭŭ di andu adi ju so sopŭrŭg kraja-I.”

⁵ Kayuh anŭ dog nang dinge: “Ngara dŭh re mŭrŭt tarun tana anŭ adi yŭn Ku an nggen rŭŭ-paya di ngara.”

⁶Ngara adi ko diŭ dingah Agah Kana anŭ dŭh kambat rŭŭ-paya anŭ, sabab ngara dŭh sabah. Adi bŭkŭn meh mbŭh dog bada kambat-i.

⁷ Ati mbŭh taŭn tatŭng sawŭ amai Tapa mbŭh sidia andu adi bŭkŭn, adi dog kadŭn “Andu Ati.” Kudu kudu sawa ripas anŭ Ayŭh minyu pasar-i so baba David di Surat-kudus nimun adi ko dog nang tejah: “Kambŭi angān dingah sirŭŭn Tapa andu ati, dŭhnyah bada adŭp ngan baking.”

⁸ Kambŭi Joshua ko nggen di ngara rŭŭ-paya adi Tapa ko bijanji an nggen, tatu-i ripas anŭ Tapa dŭh re an minyu pasar andu adi bŭkŭn.

⁹Ngapŭi meh, babŭ agi yŭn bara daya adi Tapa mbŭh mien andu rŭŭ-paya mun andu rŭŭ-paya Tapa di andu adi ju.

¹⁰ Amai ngara, adi kambat rŭŭ-paya anŭ adi Tapa ko bijanji an nggen, re rŭŭ so kraja ngara, nimun Tapa ko rŭŭ so jangi kraja.

¹¹Ja meh ata, garang, ngga sibisa bisa ta gruwŭn rŭŭ-paya anŭ, isa mating so ata dŭh dapŭd kambat-i mun ngara sitagar kurang pinyabah.

¹²Pinganang Tapa inŭh udip buang bikuasa, reja dŭ so pedang adi duwŭh siid-i. Pinganang anŭ tabŭk tambus di asah simangi ngga roh, di asah bukuh turang ngga isin turang. Pinganang anŭ jadi keya ka akim yŭn ta di pinyiripong ngga di pikir-kira ta.

¹³Mating kayuh bisa dog sukan so Tapa; barang masam kayuh adi mbŭh dog napa taŭn-i tatŭng di batŭh-I. Ka ata dŭh siŭn dŭh an dapu tanggong pimudip adŭp ta di sirung jawin-I.

¹⁴Ja meh garang, ata bidigŭng tagap di pinyabah adi ata ngaku. Amai ata biyŭn Imam adi siabo bās, adŭp Jesus Anak Tapa, adi mbŭh di ka sirung jawin Tapa.

¹⁵Imam Bās ta ati, dŭh-I dŭh biyŭn pinyirasi di pinyiramah ta. Ayŭh inŭh Imam Bās ta, adi ko dog pinyisuba darŭm bagŭ masam kayuh mun adŭp ta, pak dŭh-I bidosa.

¹⁶Ja ata ngga atin birani masang ka yŭn takta Tapa, di yŭn agi pinyirasi-mandis. Diginŭ ata re kambat pingapun buang dapŭd pinyirasi-mandis, ngga turung adŭp ta di tika ata biguna dieh.