Read Biatah Bidayuh HEBREW 5 Bible Online

HEBREW 5 - Biatah Bidayuh bible

HEBREW 5

¹Tiap tiap naan imam bās dog mien so bara daya ka dog tijuan da bituan di Tapa ngga ngarun daya, da jugan pinganggen ngga sadis ngga taran dosa.

²Amai adŭp-i ramah darŭm bagŭ yŭn-i, ayŭh dapŭd jadi duduh ngga daya adi budo bawa ka adi ndai sarah.

³ Ka sabab adŭp-i ramah, ayŭh dŭh siŭn dŭh an jugan sadis dŭh-i ngga taran dosa daya bŭkŭn adŭ pak yŭn dosa adŭp-i ani.

⁴ Mating daya mien yŭn adŭp-i dŭn puan kah pangkat imam bās. Anŭ mbŭh so pinyibagan adŭp Tapa inŭh daya jadi imam bās, nimun Aaron dog bagan Tapa.

⁵ Simŭnŭ gŭh Kristus, dŭh-I tambit dŭn puan kah pangkat imam bās yŭn adŭp-I. Adŭp Tapa adi nang di Ayŭh, “Kuu Anak Ku; andu ati Aku mbŭh jadi Sama Mu.”

⁶ Ayŭh agi gŭh nang di ayat adi bŭkŭn, “Kuu re jadi Imam ndŭg situi tui, mun Imam Melchizedek.”[3]

⁷ Darŭm-I jadi manusia di ong ati, Jesus bidua ka mite di Tapa adi taŭn dapŭd nyiramat Ayŭh so pinyikabŭs, ngga sirŭŭn bana buang ngga sien. Sabab Ayŭh pirapat adŭp-I buang tŭtŭd di Tapa, Tapa dingah Ayŭh.

⁸Pak sunggu Ayŭh Anak Tapa, Ayŭh birajar so sangsara-I nurut pinyiraan Tapa.

⁹Kan Ayŭh mbŭh jadi sukup kana, Ayŭh jadi atak pinyiramat adi tan adu adu yŭn sopŭrŭg daya adi tunda pinyiraan-I,

¹⁰ka Tapa meh mbŭh kadŭn Ayŭh Imam Bās, mun Imam Melchizedek.[4]

¹¹Bagŭ an ami nang pasar kayuh ati, pak susah re kidaan rati-i di angān, sabab angān paŭh sais mirati kayuh.

¹² Mbŭh sukup tipuh-i yŭn ngan jadi gurū, pak angān babŭ biguna di daya da ngajar angān sibungas ajar pasar agah Tapa. Sipatut-i angān man tubi, pak angān babŭ nok sisuh.

¹³Daya adi nok sisuh taŭn-i babŭ anak daya, gibayuh puan kayuh adi batur ngga adi sarah.

¹⁴Tubi, taŭn-i yŭn daya adi tuuh, daya adi mbŭh tungang natŭng so pikanyet adŭp-i, ani adi kana ngga ani adi arap.