Read Biatah Bidayuh HEBREW 7 Bible Online

HEBREW 7 - Biatah Bidayuh bible

HEBREW 7

¹ Melchizedek inŭh raja Salem ka imam Tapa adi Sambu Sopŭrŭg kayuh. Darŭm Abraham mari biperang, ripas ko ngarah pat naan raja, Melchizedek bidapŭd ngga ayŭh ka nyiberkat ayŭh,

²ka Abraham nggen di ayŭh ndi utung darŭm simŭng so sopŭrŭg kayuh adi-i tambit so biperang. (Sibungas rati dŭn Melchizedek inŭh “Raja Pinŭnggŭn”; ka sabab ayŭh raja Salem, rati dŭn-i anŭ gŭh “Raja Damai.”)

³Mating dog nuris pasar sindŭ sama Melchizedek puan kah tayung babuk-i; mating gŭh dog nuris pasar pinyibranak-i ngga pasar pinyikabŭs-i. Ayŭh keya ka Anak Tapa; ayŭh jadi imam ndŭg situi tui.

⁴Angān kiris meh garang, munki masam bās ayŭh. Abraham, adi babuk ta adi timagah, nggen di ayŭh ndi utung darŭm simŭng so sopŭrŭg kayuh adi-i tambit so biperang.

⁵ Ka bara sesang Levi adi bara imam mbŭh dog pesan Ukum-adat da tambit ndi utung darŭm simŭng so daya Israel, anŭ inŭh, so daya bangsa adŭp ngara, sunggu ngara gŭh bara sesang Abraham.

⁶Melchizedek dŭh sesang Levi, pak ayŭh tambit ndi utung darŭm simŭng so Abraham ka nyiberkat ayŭh, daya adi mbŭh kambat janji Tapa.

⁷Mating daya dŭh puan nang sianŭ adi nyiberkat agi bās dŭ so sianŭ adi dog nyiberkat.

⁸Mun bara imam adi tambit ndi utung darŭm simŭng taŭn-i manusia adi bisa kabŭs; pak Melchizedek adi tambit ndi utung darŭm simŭng taŭn-i adi udip, sak adi nang Surat-kudus.

⁹Bisa gŭh dog nang, kan Abraham nggen ndi utung darŭm simŭng, Levi gŭh nggen jangi ndi utung darŭm simŭng (sunggu bara sesang-i tambit ndi utung darŭm simŭng so daya Israel.)

¹⁰Amai Levi gibayuh dog biranak, pak bisa dog kadŭn, ayŭh agi darŭm pŭrŭng babuk-i Abraham di andu Melchizedek bidapŭd ngga Abraham.

¹¹Amai bara imam so asar Levi, Ukum-adat mbŭh dog nggen di daya Israel. Ka kambŭi kraja pingandai bara imam so asar Levi sukup kana, dŭh daya sah jiroh imam adi bŭkŭn adi so asar Melchizedek,[7] adŭ-i so asar Aaron.

¹²Amai kan atur adi ngga mien imam dog ngubah, ukum-adat patut gŭh dog ngubah.

¹³Ka Tuhan ta, adi rati piminyu pinganang ta tong-i, mbŭh so tibaran-asar bŭkŭn, ka mating so tibaran asar-I mbŭh jadi imam.

¹⁴Sopŭrŭg daya puan Ayŭh dog biranak so tibaran-asar Judah; ka Moses mating nyabŭt tibaran-asar anŭ darŭm-i minyu pasar bara imam.

¹⁵Kayuh anŭ mbŭh jadi rabis tarang; agi imam bŭkŭn timbur, adi mun Melchizedek.

¹⁶Ayŭh dog bada jadi imam, dŭh so ka atur manusia, pak so ka kuasa pimudip adi dŭh bisa mungan.

¹⁷ Amai Surat-kudus nang, “Kuu re adu adu jadi Imam, mun Imam Melchizedek.”[8]

¹⁸Atur adat adi amba, meh mbŭh dog pasan, sabab-i dŭh tagap buang mbŭh dŭh tia biguna.

¹⁹Amai Ukum-adat Moses dŭh dapŭd bada tadŭ kayuh jadi sukup kana. Ka madin ata mbŭh biyŭn pingarap adi kana dŭ adi so ta tungang mandŭg nyindŭk Tapa.

²⁰Nambah anŭ, agi gŭh payu Tapa. Di andu bara adi bŭkŭn dog bada jadi imam, mating payu dog pakai.

²¹ Pak ngga payu Jesus jadi Imam kan Tapa nang di Ayŭh, “Tuhan mbŭh bipayu ka dŭh re ngubah pikir-I: ‘Kuu re adu adu jadi Imam.’ ”

²²Ngga payu anŭ meh, Jesus jadi jamen simanya adi kana dŭ.

²³Bisa gŭh ngga danding: bagŭ inŭh ngara adi imam adi bŭkŭn, sabab ngara kabŭs ka dŭh tungang pijuu kraja ngara.

²⁴Pak Jesus udip adu adu, ka kraja-I jadi imam dŭh dog nggen di daya bŭkŭn.

²⁵Ka sawŭ Ayŭh tungang, madin ngga siraru, nyiramat daya adi mandŭg ka Tapa so ka adŭp-I, sabab Ayŭh udip adu adu an bidua ka Tapa yŭn ngara.

²⁶Jesus meh, Imam Bās adi ata biguna. Ayŭh kudus; Ayŭh dŭh biyŭn sarah puan kah dosa; Ayŭh mbŭh dog nyidŭrŭ so bara adi bidosa ka mbŭh dog paad ka yŭn adi rabis bigatung so rangit.

²⁷ Ayŭh dŭh mun bara imam bās adi bŭkŭn; Ayŭh dŭhsah jugan sadis barang andu ngga taran dosa adŭp-I diŭ ka komŭnŭ dosa daya. Ayŭh jugan ndi sadis, ndi sidah yŭn adu adu, di tika Ayŭh jugan adŭp-I.

²⁸Ukum-adat Moses tijuan bara daya adi dŭh sukup kana da jadi imam bās; pak janji Tapa adi dog ndai ngga payu, adi mandŭg sundis so Ukum-adat, tijuan Anak, adi mbŭh jadi adu adu sukup kana.