Read Biatah Bidayuh HEBREW 8 Bible Online

HEBREW 8 - Biatah Bidayuh bible

HEBREW 8

¹ Rati pinganang ami ati inŭh ata biyŭn Imam Bās anŭ, adi guru tura ka tauh takta Tapa adi Bikuasa di shorga.

²Ayŭh jadi Imam Bās di Yŭn adi Siabo Kudus, anŭ inŭh, darŭm bari adi sawŭ adi dog pijog adŭp Tuhan, dŭh so pingandai manusia.

³Barang naan Imam Bās mbŭh dog tijuan da jugan pinganggen ngga sadis dāng ka Tapa, ka mun anŭ gŭh Imam Bās ta dŭh siŭn dŭh an biyŭn kayuh dog jugan.

⁴Kambŭi Ayŭh di ong, Ayŭh manŭn dŭh jadi imam, amai mbŭh agi bara imam tukang jugan pinganggen nanyam dog miratak Ukum-adat Jahudi.

⁵ Kraja pingandai ngara jadi imam batur-i gambar ka singangi kayuh adi di shorga. Simŭnŭ gŭh kayuh di jaman Moses jah. Di andu ayŭh re pijog Bari Tuhan, Tapa nang di ayŭh, “Kuu dŭh siŭn dŭh an ndai-i nanyam ka suto adi mbŭh dog kiren di kuu di darŭd.”

⁶Pak madin, Jesus mbŭh dog nggen kraja imam adi rabis bās so tung ngara, nimun simanya anŭ adi-I mbŭh ngatur yŭn Tapa ngga daya-I agi kana dŭ, sabab-i bisangan di janji pasar kayuh adi kana dŭ.

⁷Kambŭi mating kayuh sarah di sibungas simanya, dŭh ata sah jiroh simanya adi numbor duwŭh.

⁸ Pak Tapa mbŭh dapŭd arap daya-I kan-I nang, “Tipuh-i re mandŭg, Tuhan nang, kan Aku re ndai simanya bauh ngga daya Israel ka ngga daya Judah.

⁹Simanya anŭ dŭh re mun simanya adi Aku ko ndai ngga tayung-babuk ngara di andu Aku taban ngara ruah so rais Egypt. Ngara dŭh tŭtŭd di simanya adi Aku ko ndai ngga ngara, ngapŭi Aku dŭh piduri ngara.

¹⁰Pak madin, ati inŭh simanya adi re Ku ndai ngga daya Israel di tipuh adi re mandŭg, nang Tuhan: Aku re na ukum-adat Ku di pikir ngara ka nuris-i darŭm atin ngara. Aku re jadi Tapa ngara, ka ngara re jadi daya Ku.

¹¹Ngara re dŭhsah ngajar dingan puan kah kidaan di rasū ngara, ‘Puan meh Tuhan.’ Amai sopŭrŭg ngara re puan Aku, so adi siabo sŭ ndŭg ka adi siabo bās.

¹²Aku re apun dosa ngara ka dŭh re tia ingat sarah ngara.”

¹³Darŭm-I minyu pasar simanya bauh, Tapa mbŭh bada anŭ adi diŭ jadi amba; ka tadŭ kayuh adi jadi amba ka mbŭh rusak re rikas manyap.