Read Biatah Bidayuh HEBREW 9 Bible Online

HEBREW 9 - Biatah Bidayuh bible

HEBREW 9

¹Sibungas simanya biyŭn atur simayang ngga tarun yŭn simayang adi dog ndai manusia.

² Bari dog pijog, anŭ adi tura ka sapa, dog kadŭn Yŭn Kudus. Darŭm-i agi rika prita, mija ka ruti adi dog jugan ka Tapa.

³ Di punok tabir adi numbor duwŭh agi bari adi dog kadŭn Yŭn adi Siabo Kudus.

⁴ Darŭm-i agi mija-sambah mas yŭn mupun kimanyan ka Pati Simanya adi dog marut ngga mas ka brisi ngga tipayan mas adi brisi ngga manna, sikud Aaron adi prisok, ka duwŭh kiping batuh di yŭn Pinyipesan dog nuris.

⁵ Di tunduh Pati anŭ agi cherubim ngga nandā Tapa agi diginŭ; urad ngara tiburai nyayung tarun yŭn dosa dog apun. Pak madin dŭh-i tika ngga kidaan rati sopŭrŭg kayuh ndŭg pinyikad-i.

⁶ Simŭnŭ inŭh kayuh kayuh anŭ dog ngatur. Bara imam di mŭrŭt Bari adi tura ka sapa barang andu ndai kraja ngara,

⁷ pak kaŭs-i imam bās adŭ adi mŭrŭt bari tura ka darŭm; ayŭh mŭrŭt kamanŭ ndi sawa ndi sidah adŭ. Ayŭh taban mŭrŭt deya adi-i jugan ka Tapa ngga ngarun adŭp-i ka ngga taran dosa adi daya ndai darŭm dŭh rada.

⁸Roh Kudus mbŭh granan ngajar so pingatur anŭ nang aran di ka Yŭn adi Siabo Kudus anŭ gibayuh dog kuka siragi bari anŭ adi tura ka sapa babŭ mijog.

⁹Ati inŭh tandā pinatŭng yŭn jaman ati. Sirati-i, pinganggen ngga sadis dāng adi dog jugan ka Tapa dŭh dapŭd bada atin bara daya adi simayang sukup kana,

¹⁰amai kayuh anŭ kaŭs-i pasar pinguman, nok, ka barang masam adat pibisig. Sopŭrŭg anŭ batur-i atur adi tungang dog kiris adŭ, adi dog pakai ndŭg ka tipuh adi ngga Tapa nukar-i ngga atur adi bauh.

¹¹Pak Kristus mbŭh mandŭg jadi Imam Bās yŭn kayuh kayuh kana adi mbŭh agi digiti.[9] Bari adi yŭn-I ndai kraja-I agi bās dŭ buang sukup kana; dŭh-i bari adi dog ndai tangan manusia, anŭ inŭh, dŭh so ong ati adi dog napa.

¹²Kan Kristus mŭrŭt so ka bari anŭ ka mŭrŭt ka darŭm Yŭn adi Siabo Kudus ndi sidah yŭn adu adu, Ayŭh dŭh taban deya kambing bait deya dari sapi ndu sadis. Pak-I taban deya adŭp-I ngga dapŭd pinyiramat adi tan adu adu yŭn ta.

¹³ Deya kambing ngga deya dari sapi samŭn apŭk anak sapi adi ko dog badang dog masik di tunduh daya adi sŭn adat nang kais, ka pingandai anŭ pibisig ngara so kais anŭ.

¹⁴Kambŭi daya dapŭd dog pibisig ngga adat anŭ, jung rabis deya adŭp Kristus dapŭd pibisig daya! So ka Roh adi udip adu adu Ayŭh jugan adŭp-I jadi sadis adi sukup kana ka Tapa. Deya-I re pibisig pikir-kira atin ta so pingandai adat adi dŭh biguna, isa ata bisa bituan di Tapa adi udip.

¹⁵Amai sabab anŭ, Kristus inŭh sianŭ adi ngatur simanya bauh, isa ngara adi dog bagan Tapa bisa kambat berkat adi tan adu adu adi Tapa ko bijanji an nggen. Kayuh anŭ bisa jadi sabab mbŭh agi pinyikabŭs adi pirupas daya so sarah adi ngara ndai sitadŭn simanya amba dog pakai.

¹⁶Pasar surat payu adi ngga daya kutung bisaka ripas-i mbŭh kabŭs, taŭn-i patut nŭŭh puan ayŭh adi ndai-i mbŭh sawŭ kabŭs.

¹⁷Amai siragi daya adi ndai-i babŭ udip, surat payu anŭ gibayuh bisa dog pakai. Surat payu anŭ dog pakai adŭ-i ripas ayŭh mbŭh kabŭs.

¹⁸Ngapŭi-i, simanya adi diŭ[10] gŭh ngasi kambŭi deya agi dog pakai.

¹⁹ Sibungas-i, Moses piagah di daya Israel sopŭrŭg Pinyipesan nanyam adi mbŭh dog miratak darŭm Ukum-adat. Komŭnŭ ayŭh tambit deya dari sapi ka deya kambing, gaur-i ngga piin, ka masik-i di surat Ukum-adat samŭn di sopŭrŭg daya, pakai tugu hyssop ngga buruh biri adi bireh.

²⁰Ayŭh nang, “Ati inŭh deya adi natu simanya adi Tapa ko pesan di angān da sita.”

²¹ Mun anŭ gŭh Moses masik deya di tunduh Bari Tuhan ka di tunduh sopŭrŭg kayuh adi dog pakai di tika simayang.

²² Sawŭ, nanyam ka Ukum-adat batang an sopŭrŭg kayuh an dog pibisig ngga deya, ka dosa dog apun adŭ-i kambŭi deya agi dog piruah.

²³Sopŭrŭg kayuh anŭ, adi gambar kayuh di shorga, an dog pibisig ngga gaya adi mun anŭ. Pak kayuh anŭ adi di shorga biguna di sadis adi kana dŭ.

²⁴Amai Kristus mating-I mŭrŭt ka darŭm Yŭn Kudus adi dog ndai manusia, adi gambar anŭ adi sawŭ. Ayŭh di mŭrŭt shorga, di yŭn-I madin mijog ngarun ata di sirung jawin Tapa.

²⁵Imam bās Jahudi mŭrŭt ka darŭm Yŭn adi Siabo Kudus barang sawa taban deya dāng. Pak Kristus dŭh-I siraru mŭrŭt di nyadis adŭp-I,

²⁶amai te gŭt rati-i Ayŭh mbŭh dŭh siŭn dŭh an siraru kinyam sangsara so sibungas ong dog napa. Sibandar-i, madin di tipuh sopŭrŭg jaman mbŭh sindŭk re mungan, Ayŭh mbŭh mandŭg ndi sidah yŭn adu adu, di nyadis adŭp-I yŭn taran dosa.

²⁷Barang naan daya dŭh siŭn dŭh kabŭs ndi sidah, ka komŭnŭ bisara di sirung jawin Tapa.

²⁸ Mun anŭ gŭh adŭp Kristus mbŭh dog jugan ndi sidah jadi sadis ngga ngarun dosa daya bagŭ. Ayŭh re mandŭg dinge, dŭh sitagar an ngatur dosa, pak an nyiramat ngara adi kajŭn Ayŭh.