Read Biatah Bidayuh JAMES 5 Bible Online

JAMES 5 - Biatah Bidayuh bible

JAMES 5

¹Dingah pinganang ku, angān adi kaya! Muās ka sien meh angān yŭn pinyusah anŭ adi re nyatŭk angān!

² Pinyikaya ngan mbŭh jadi amba, ka piraka ngan mbŭh dog man gŭgŭt.

³Mas pirak ngan mbŭh bitagar, ka tagar anŭ re jadi saksi rawan angān ka re man isin ngan mun apui. Angān mbŭh nguruk pinyikaya di sikasŭn tipuh ati.

⁴ Angān gibayuh bayar gaji ngara adi nyiraja di teya ngan. Dingah meh ngara mingungut! Ngara adi ko nguruk buwa yŭn ngan mbŭh ngadu buang mite turung so Tapa, Tuhan adi Bisa-pŭrŭg.

⁵Pimudip ngan di ong ati mbŭh puno ngga pinyikaya ka sanang. Angān mbŭh pigamu adŭp ngan yŭn andu adi ngga angān dog simareh.

⁶Angān nunggu ka siŭ daya adi dŭh biyŭn sarah, pak ngara dŭh rawan angān.[3]

⁷Sabar meh angān adi bara dingan ku, ndŭg ka Tuhan mandŭg. Tingga munki masam sabar-i bara tukang-teya darŭm ngara kajŭn tana piruah buwa adi brega. Ngga atin sabar ngara kajŭn ujen di tipuh jaya ngga di tipuh bunga.

⁸Angān gŭh dŭh siŭn dŭh an sabar. Nagap meh atin ngan, sabab andu adi ngga Tuhan mandŭg mbŭh sindŭk.

⁹Dŭhnyah mingungut di dingan ngan, angān adi bara dingan ku, isa Tapa dŭh ngukum angān. Arang mbŭh sindŭk, mbŭh sidia re tatŭng.

¹⁰Bara dingan ku, ingat bara nabi adi minyu ngga adŭn Tuhan. Tambit ngara ndu suto danding yŭn pinyitŭtŭd atin ngga sabar di tika sangsara.

¹¹ Kieh kadŭn ngara sanang sabab ngara tan. Angān ko dingah pasar atin sabar Job, ka munki Tuhan di pinŭbŭn-i turung ayŭh. Ayŭh simŭnŭ amai Tuhan mandis buang puno ngga atin masi.

¹² Rabis-i, bara dingan ku, dŭhnyah bipayu kan angān ndai janji. Dŭhnyah bipayu pakai rangit, pakai ong, puan kah pakai tadŭ tadŭ kayuh. Nang “Sawŭ” kan-i sawŭ, nang “Dŭh” kan-i dŭh. Simŭnŭ angān dŭh re dog ukum.

¹³Agi kah di dupan ngan daya dog pinyusah? Ngara patut simayang. Agi kah adi gaŭn? Ngara patut biragu ragu puji.

¹⁴ Agi kah adi birandam? Ngara patut bagan nyamba eklisia da simayang yŭn ngara buang, ngga adŭn Tuhan, nginyo ngara ngga inyo kanā.

¹⁵Dua adi dog nang ngga pinyabah bisa pibua daya anŭ; Tuhan re bada ngara pari bua, ka dosa adi ngara ko ndai re dog apun.

¹⁶Jadi meh, ngaku sarah ngan di dingan ngan buang simayang yŭn dingan ngan, isa angān dapŭd bua. Dua daya adi ndai pinyiraan Tapa biyŭn kuasa buang ngasi.

¹⁷ Elijah inŭh daya adi mun ata. Ayŭh bandar bandar simayang mite mating ujen, ka-i dŭh ujen sitŭkŭd taruh sawa sitangah.

¹⁸ Komŭnŭ ayŭh simayang dinge, ka rangit ren ujen ka tana piruah buwa-i.

¹⁹Bara dingan ku, kambŭi agi so angān manyap, ka ndi so angān taban ayŭh pari ka Tapa,

²⁰ ingat ati: asi asi so angān adi nyiruton daya adi bidosa da pari so aran-i adi sarah, ayŭh mbŭh nyiramat simangi daya bidosa anŭ[4] so pinyikabŭs buang taban pingapun yŭn bagŭ dosa.