Read Biatah Bidayuh 1 PETER 1 Bible Online

1 PETER 1 - Biatah Bidayuh bible

1 PETER 1

¹So Peter, adi pinyuruh Jesus Kristus, nuju bara daya adi Tapa mbŭh mien adi papar sasah rŭŭ nupang di ndi utung utung rais Pontus, Galatia, Cappadocia, Asia, ka Bithynia.

²Angān mbŭh dog mien nanyam ka pinŭtŭn Tapa Sama, ka mbŭh dog ndai Roh-I jadi daya kudus, da nundok di Jesus Kristus ka dog pibisig ngga deya-I. Isa-i Tapa nggen pinyirasi-mandis ngga damai di angān ngga sipuno-i.

³Ja ata nggen trima kaseh di Tapa ngga Sama Tuhan ta Jesus Kristus! Sabab masi-I adi bās Ayŭh mbŭh nggen di ata udip bauh darŭm-I pakat Jesus Kristus so kabŭs. Kayuh ati nggen di ata pingarap adi udip.

⁴Ngapŭi ata harap adŭp ta re dapu berkat bās anŭ adi Tapa mbŭh sidia yŭn daya-I. Ayŭh nyikŭn-i di shorga yŭn ngan, di yŭn-i dŭh bisa madam, rusak, puan kah asab.

⁵Berkat anŭ mbŭh yŭn ngan, angān adi so ka pinyabah mbŭh pagŭng dog jaga Tapa ngga kuasa-I yŭn pinyiramat anŭ adi mbŭh dog sidia re dog pinandŭng di andu sikasŭn.

⁶Gaŭn meh pasar kayuh anŭ, sunggu-i madin ati angān taŭn patut susah dawŭ-i sabab bagŭ masam pisuba adi dog angān.

⁷Tujuan-i inŭh ngga tingga batur kah dŭh pinyabah ngan anŭ. Mas bina, adi bisa dog pirusak babŭ gŭh dog suba ngga apui; ngapŭi pinyabah ngan, adi brega dŭ so mas, dŭh siŭn dŭh gŭh dog suba, isa-i jadi tan. Komŭnŭ angān re trima puji ngga bragah ka stabi di Andu anŭ kan Jesus Kristus dog pinandŭng.

⁸Angān rindu Ayŭh, sunggu angān bŭn kiris Ayŭh; angān sabah di Ayŭh, sunggu tong-i angān dŭh kiris Ayŭh. Jadi angān gaŭn ngga pinyigaŭn adi rabis so tungang manusia kira

⁹sabab angān kambat pinyiramat simangi ngan, adi taŭn pinŭtŭn pinyabah ngan di Ayŭh.

¹⁰Pasar pinyiramat ati inŭh bara nabi ko nakit jiroh ka bisiken, ka minyu-binabi pasar pinganggen adi Tapa re nggen di angān.

¹¹Ngara suba an puan andu-i ka simuki-i re mandŭg.[1] Roh Kristus agi darŭm ngara ka mbŭh ninjau di ngara jera-birasa adi Kristus re kinyam, samŭn bragah adi re mandŭg sundis.

¹²Tapa mbŭh kiren di bara nabi anŭ nang kraja pingandai ngara dŭh-i yŭn utung adŭp ngara, pak yŭn utung ngan. Ngara minyu pasar kayuh anŭ adi angān madin ko dingah so bara pinyisung adi kidaan Agah Kana ngga kuasa Roh Kudus adi dog pait so shorga. Anŭ inŭh kayuh adi adŭp bara malaikat an gŭh sua mirati.

¹³Sabab anŭ meh, angān patut sidia. Bijaga buang na puno pingarap ngan di berkat anŭ adi re dog nggen di angān di andu Jesus Kristus dog pinandŭng.

¹⁴Nundok di Tapa, ka dŭhnyah bada pimudip ngan dog nguasa pinyiripong arap ngan adi dawŭ, di andu angān gibayuh puan Tapa.

¹⁵Pak, bada adŭp ngan kudus darŭm sopŭrŭg kayuh adi angān ndai, nimun Tapa adi bagan angān inŭh kudus.

¹⁶ Surat-kudus nang, “Jadi kudus sabab Aku ati kudus.”

¹⁷Angān bagan Ayŭh Sama, kan angān simayang nyambah Ayŭh. Ayŭh ngayag sopŭrŭg daya nanyam ka kraja ngara, dŭh mien asi asi. Ngapŭi meh, sitian angān babŭ di ong ati, angān an stabi di Ayŭh.

¹⁸Amai angān puan ani adi mbŭh dog bayar ngga pirupas angān so pimudip adi dŭh biguna adi angān trima so tayung-babuk ngan. Dŭh-i kayuh adi bisa dog pirusak, mun mas bait pirak;

¹⁹pak-i sadis Kristus adi brega, adi keya ka anak biri adi mating takar kais puan kah tadŭ mun arap-i.

²⁰Ayŭh dog mien adŭp Tapa diŭ so ong dog napa, ka mandŭg di nyiramat angān di sikasŭn tipuh ati.

²¹So Ayŭh angān sabah di Tapa, adi pakat Ayŭh so kabŭs ka nggen bragah di Ayŭh; ngapŭi madin angān sabah di Tapa ka harap di Ayŭh ngga sipuno-i.

²²Amai madin so ka adŭp ngan adi dingah ka nurut ajar adi sawŭ pasar Tapa, angān mbŭh pibisig adŭp ngan ka mbŭh biyŭn pinyirindu ngga atin tŭnggŭn yŭn bara adi bŭkŭn adi samah sabah di Jesus; rindu dingan ngan ngga siabo atin ngan.[2]

²³Amai so ka pinganang Tapa adi udip ka adi tan adu adu angān mbŭh dog biranak bauh, dŭh so manusia, pak so Sama adi udip adu adu.

²⁴ Sak adi nang Surat-kudus, “Sopŭrŭg manusia agi keya ka kupai, ka sopŭrŭg bragah-i agi keya ka rarak bunga tarun. Kupai rayu, ka rarak-i ruruh,

²⁵pak pinganang Tapa babŭ ndŭg situi tui.” Pinganang anŭ inŭh Agah Kana adi mbŭh dog piagah ka angān.