Read Biatah Bidayuh 1 PETER 5 Bible Online

1 PETER 5 - Biatah Bidayuh bible

1 PETER 5

¹Aku, adi adŭp nyamba eklisia, mite bara nyamba eklisia di dupan ngan puan. Aku ati saksi jera-birasa Kristus, ka aku re sua dapu bragah adi re dog pinandŭng. Aku mite angān

² jadi pingingat kaban biri adi Tapa ko nggen di angān da kingat, dŭh ngga atin adi abah pak ngga atin adi siabo raan. Ndai kraja ngan, dŭh sabab an dapŭd utung adŭ, pak so atin adi sawŭ an ndai-i.

³Dŭhnyah bada adŭp ngan mun daya pinguasa di tunduh daya adi angān jaga, pak jadi suto danding yŭn ngara.

⁴Jadi kan Pingubak Pingingat-biri nandŭng, angān re kambat makota bragah adi dŭh re asab jawa-i.

⁵ Simŭnŭ gŭh angān daya adi babŭ mara, dŭh siŭn dŭh an nundok di daya adi tuuh. Ka sopŭrŭg ngan dŭh siŭn dŭh an taban atin tŭkŭn yŭn turung dingan ngan; amai Surat-kudus nang, “Tapa abah di daya adi sambuh, pak turung daya adi pirapat adŭp-i.”

⁶ Pirapat meh adŭp ngan di ribo kuasa tangan Tapa, isa Ayŭh katuh angān di tika adi adŭp-I mbŭh mien.

⁷Pasan sopŭrŭg pinyusah ngan di Ayŭh, sabab Ayŭh kingat angān.

⁸An ari sidia, ka bijaga! Pinganyu ngan, Siarap, bijaruh mun singah ngŭr, jiroh daya an-i man.

⁹Tagap darŭm pinyabah ngan ka rawan ayŭh, sabab angān puan bara adi bŭkŭn adi samah sabah mun angān di ndi ong ong mbŭh samah sangsara mun angān gŭh.

¹⁰Pak ripas angān ko sangsara nyitiro, Tapa adi dapu sopŭrŭg pinyirasi-mandis, adi bagan angān da sua dapu bragah-I adi tan adu adu darŭm udip ndi ngga Kristus, re adŭp-I bada angān sukup kana ka nŭtŭd atin ngan, nyibake angān, ka nagap angān.

¹¹Ayŭh inŭh adi bikuasa ndŭg situi tui! Amen.

¹² Aku nuris surat adi purok ati ngga pinurung Silas, adi aku ngaku keya ka dingan Kristen ku adi tŭtŭd. Aku raan ngatat angān ka bisaksi di angān nang kayuh ati inŭh sawŭ pinyirasi-mandis Tapa. Bidigŭng tagap meh dieh.

¹³ Eklisia di Babylon[3] adi jurud eklisia ngan, dog mien Tapa gŭh, pait ka angān tabi, ka simŭnŭ gŭh anak ku Mark.

¹⁴Tabi dingan ngan ngga tabi tandā pinyirindu Kristen. Isa-i damai agi ngga sopŭrŭg ngan adi mbŭh tung Kristus.