Read Biatah Bidayuh 2 PETER 1 Bible Online

2 PETER 1 - Biatah Bidayuh bible

2 PETER 1

¹So Simon Peter, urun ka pinyuruh Jesus Kristus, nuju sinadan daya adi mbŭh sabah mun kieh, so pinŭnggŭn Tapa ngga Pinyikudip ta Jesus Kristus.

²Isa-i pinyirasi-mandis ngga damai jadi jangān ngga sipuno-i so pinyipuan ngan pasar Tapa ka pasar Jesus Tuhan ta.

³So kuasa Tapa ata mbŭh kambat sopŭrŭg kayuh adi ata biguna yŭn aran pimudip adi pimunos asŭng Tapa. Ayŭh simŭnŭ so ka pinyipuan ta pasar Ayŭh adi bagan ata da sua darŭm[1] bragah ngga pinyikana-I.

⁴Simuti inŭh, Ayŭh mbŭh nggen di ata pinganggen anŭ adi bās ka brega adi Ayŭh ko bijanji an nggen, isa ngga pinganggen anŭ angān bisa pirupas adŭp ngan so pinyiripong adi bisa pirusak angān di ong ati, ka mandŭg sua dapu tibiat Tapa.

⁵Sabab anŭ meh, ngga sibisa bisa ngan na pinyikana di pinyabah ngan; di pinyikana na pinyipuan;

⁶di pinyipuan na atin adi an jaga adŭp ngan so pinyiripong adi sarah; di atin adi an jaga adŭp so pinyiripong adi sarah na pinyitŭtŭd atin; di pinyitŭtŭd atin na atin adi an nurut pinyiraan Tapa;

⁷di atin adi an nurut pinyiraan Tapa na pinyirindu Kristen; ka di pinyirindu Kristen na atin rindu di sopŭrŭg daya.

⁸Simŭnŭ inŭh angān patut masang darŭm pimudip ngan, ka kambŭi angān udip mun anŭ, angān re puan nang kayuh adi angān puan pasar Jesus Kristus mbŭh bada pimudip ngan biguna ka biyŭn rati.

⁹Pak kambŭi angān dŭh masang mun anŭ, angān mbŭh keya ka daya adi dŭh tungang kiris tarun, puan kah karak, buang mbŭh kambŭt adŭp ngan ko dog pibisig so dosa ngan adi jah.

¹⁰Jadi meh, bara dingan ku, angān dŭh siŭn dŭh ngga situngang ngan kiren darŭm pimudip ngan Tapa sawŭ ko bagan ka mien angān. Kambŭi angān ndai simŭnŭ, angān dŭh re udah pasan pinyabah ngan;[2]

¹¹Darŭm angān ndai simŭnŭ angān re dog nggen hak ngga sipuno-i ngga kinyam Pinyipritah adi sawŭ adi tan adu adu adi tung Tuhan ngga Pinyikudip ta, Jesus Kristus.

¹²Sabab anŭ, aku an ari kidaan di angān isa angān dŭh kambŭt kayuh ati, sunggu angān mbŭh puan-i buang mbŭh batur sabah di ajar Tapa adi angān mbŭh kambat.

¹³Sitŭkŭd aku babŭ udip, aku pikir taŭn-i patut aku kies pikir ngan di kayuh anŭ.

¹⁴Aku puan aku re rikas tingge pŭrŭng ong ku ati, sak adi ko Tuhan ta Jesus Kristus nakit kidaan di aku.

¹⁵Aku re ngga sibisa bisa ku nggen di angān aran ngga ari ingat sopŭrŭg kayuh ati ripas aku mbŭh kabŭs.

¹⁶Kan kieh kidaan di angān munki masam bikuasa pimandŭg Tuhan ta Jesus Kristus, kieh dŭh bisangan di dundan adi dog nimbur daya. Ngga batŭh adŭp ami kieh mbŭh kiris kuasa bās-I.

¹⁷ Kieh agi diginŭ di andu Tapa Sama nggen di Ayŭh stabi ngga bragah, kan sirŭŭn mandŭg ka Ayŭh so Bragah Siabo Bās, nang, “Siati inŭh Anak nyirot Ku; di Ayŭh asŭng Ku munos!”

¹⁸Adŭp ami mbŭh dingah sirŭŭn anŭ mandŭg so shorga, di andu kieh ngga Ayŭh di darŭd kudus.

¹⁹Anŭ sabab kieh mbŭh rabis sabah nang agah adi ko dog piagah bara nabi agi sawŭ. Angān patut nakit mbit bat di agah anŭ, sabab-i agi keya ka prita nyekar darŭm karŭm ndŭg andu jawa, ka keya ka jawa bitang isan isan nyekar darŭm atin ngan.

²⁰Rabis-i, nŭŭh an ingat mating daya tungang kidaan sadi adŭp-i rati pinganang-binabi darŭm Surat-kudus.

²¹Amai mating pinganang-binabi mandŭg so pinyiraan manusia, pak manusia inŭh adi dog nguasa Roh Kudus darŭm ngara kidaan agah so Tapa.