Read Biatah Bidayuh 2 PETER 3 Bible Online

2 PETER 3 - Biatah Bidayuh bible

2 PETER 3

¹Angān adi aku rindu! Ati adi madin inŭh surat adi duwŭh adi aku nuris ka angān. Ngga so-duwŭh surat ku ati aku suba kies pikir-kira adi bisig darŭm pikir ngan darŭm ku kidaan sopŭrŭg kayuh ati isa angān dŭh kambŭt-i.

²Aku raan angān ingat pinganang so baba bara nabi kudus ndun jah, ka pinyipesan so Tuhan ngga Pinyikudip ta adi bara pinyuruh ngan ko nggen di angān.

³ Diŭ so kayuh bŭkŭn, angān dŭh siŭn dŭh an mirati di sikasŭn tipuh re agi kada daya timbur; pimudip ngara dog nguasa pinyiripong pŭrŭng-i. Ngara re nyibudo angān

⁴buang re siken, “Ayŭh bijanji re an mandŭg, dŭh kah? Diki meh Ayŭh, garang? Bara tayung-babuk ta mbŭh kabŭs, pak sopŭrŭg kayuh babŭ mun mun-i so sibungas ong jadi!”

⁵ Ngara saji-i miman Tapa ko jah-i napa rangit ngga ong ngga pinganang-I. Ong dog napa so piin ka ngga piin,

⁶ ka ngga piin gŭh, piin uba, ong amba dog pirusag.

⁷Pak rangit ngga ong adi agi madin babŭ dog digŭng pinganang Tapa anŭ gŭh, siŭn-i dog pirabur ngga apui. Rangit ngga ong babŭ yŭn andu adi ngga daya adi dŭh stabi di Tapa dog ukum ka dog pirabur.

⁸ Pak dŭh kambŭt ati, angān adi aku rindu! Di batŭh Tapa, ndi andu mating bŭkŭn-i so siribu sawa; soduwŭh-i agi brimun di Ayŭh.

⁹Tuhan dŭh-I sais ndai kayuh adi-I ko bijanji an ndai, sak adi nang daya. Ayŭh sabar ngga angān, sabab Ayŭh dŭh raan tadŭ tadŭ daya dog pirabur, pak raan sopŭrŭg daya marik pimudip-i pari ka adŭp-I.

¹⁰ Pak Andu Tuhan re mandŭg mun pinaku. Di Andu anŭ rangit re miyap ngga sak jawŭn adi raru bana, kayuh kayuh di rangit re dog sigot ka dog pirabur, ka ong ngga sopŭrŭg isi-i re mating tia.[4]

¹¹Amai sopŭrŭg kayuh anŭ re dog pirabur simŭnŭ, manusia adi mun ani angān patut? Darŭm pimudip ngan angān patut nurut pinyiraan Tapa,

¹²darŭm angān kajŭn Andu Tapa ka ngga situngang ngan bada-i rikas mandŭg, Andu anŭ adi ngga rangit dog sigot ka dog pirabur, ka kayuh kayuh di rangit riris da paras-i.

¹³ Pak ata kajŭn kayuh adi Tapa ko janji, anŭ inŭh rangit ngga ong bauh, di yŭn pinŭnggŭn rŭŭ.

¹⁴Ngapŭi meh, bara dingan ku, darŭm angān kajŭn Andu anŭ, ngga sibisa bisa ngan bada adŭp ngan bisig ka dŭh biyŭn takar sarah di sirung jawin Tapa ka udip bamai ngga Ayŭh.

¹⁵Nakit kira atin sabar Tuhan adi keya ka pluang adi-I nggen di angān yŭn ngan dapŭd dog nyiramat, nimun Paul, dingan adi ata raru rindu, mbŭh nuris ka angān pakai pinyibijak adi Tapa ko nggen di ayŭh.

¹⁶Anŭ inŭh kayuh adi-i nang darŭm sopŭrŭg surat-i. Agi kada kayuh adi mbar dog mirati di surat-i adi daya adi bawa ka budo marik rati-i, nimun ngara ko nyikadar gŭh ngga kayuh kayuh adi bŭkŭn di Surat-kudus. Pingandai ngara anŭ re taban ka adŭp ngara pinyirusag.

¹⁷Pak angān, bara dingan ku, mbŭh puan kayuh ati. Bijaga meh, isa angān dŭh miriseu da sarah daya adi arap, ka rabu so yŭn ngan adi siramat.

¹⁸Angān patut bitambah kambang darŭm pinyirasi-mandis Tapa ka darŭm pinyipuan pasar Tuhan ngga Pinyikudip ta Jesus Kristus. Di Ayŭh inŭh bragah, madin ngga ndŭg situi tui! Amen.