Read Biatah Bidayuh 1 JOHN 1 Bible Online

1 JOHN 1 - Biatah Bidayuh bible

1 JOHN 1

¹ Kieh nuris ka angān pasar Pinganang adi nggen udip, adi taŭn mbŭh agi so sibungas-i. Kieh mbŭh dingah pasar-I, ka mbŭh kiris-I ngga batŭh adŭp ami; sawŭ kieh mbŭh kiris-I, ka tangan adŭp ami mbŭh tama-I.

² Kan udip anŭ dog pinandŭng, kieh kiris-I. Anŭ meh sabab kieh minyu pasar-I ka kidaan di angān pasar udip adi sawŭ adi tan adu adu adi mbŭh agi ngga Sama ka mbŭh dog kidaan di kieh.

³Kayuh adi kieh mbŭh kiris ka dingah, kieh piagah ka angān, isa angān sua ngga kieh darŭm udip ndi ngga Sama ka ngga Anak-I Jesus Kristus.

⁴Kieh nuris ati siŭn pinyigaŭn ta[1] jadi gŭgŭp.

⁵Agah adi kieh dingah so Anak-I ka adi kieh piagah inŭh ati: Tapa inŭh Jawa, ka darŭm Ayŭh taŭn mating adŭ karŭm.

⁶Jadi meh, kambŭi ata nang adŭp ta udip ndi ngga Ayŭh, pak babŭ udip darŭm karŭm, ata mbŭh kadong darŭm piminyu ka darŭm pingandai.

⁷Pak kambŭi ata udip darŭm jawa, nimun Ayŭh adi taŭn darŭm jawa, ata manŭn mbŭh udip ndi samah ngga dingan ta; ka deya Jesus, Anak-I, pibisig ata so barang masam dosa.

⁸Kambŭi ata nang adŭp ta dŭh biyŭn dosa, ata kadong adŭp ta, ka Tapa mating darŭm atin ta.

⁹Pak kambŭi ata ngaku dosa ta ka Tapa, Ayŭh re ingat janji-I ka ndai nanyam patut: Ayŭh re apun dosa ta ka pibisig ata so sopŭrŭg pingandai sarah ta.

¹⁰Kambŭi ata nang adŭp ta mating ndai dosa, ata mbŭh bada Tapa jadi pingadong, ka pinganang-I mbŭh mating darŭm ata.