Read Biatah Bidayuh 1 JOHN 2 Bible Online

1 JOHN 2 - Biatah Bidayuh bible

1 JOHN 2

¹Aku nuris ati ka angān, bara anak ku, isa angān dŭh ndai dosa; pak kambŭi tadŭ so angān agi ndai dosa, ata biyŭn pingarun, Jesus Kristus adi tŭnggŭn, adi ngarun ata di sirung jawin Sama.

²Ka adŭp Kristus inŭh aran adi ngga dosa ta bisa dog apun; dŭh yŭn dosa ta adŭ, pak yŭn dosa barang naan daya.

³Kambŭi ata sita pinyipesan Tapa, ata taŭn ngaku adŭp ta sawŭ puan Ayŭh.

⁴Kambŭi ata nang adŭp ta puan Tapa, pak dŭh sita pinyipesan-I, ata mbŭh pingadong, ka Tapa mating darŭm ata.

⁵Pak kambŭi ata tunda pinganang Tapa, ata sawŭ rindu Tapa. Simŭnŭ inŭh ata dapŭd puan adŭp ta agi udip ndi ngga Tapa:

⁶kambŭi ata nang adŭp ta bijijŭ darŭm udip ndi ngga Tapa, ata patut udip tunda suto danding Jesus Kristus.

⁷ Angān adi aku rindu, pinyipesan ati adi aku nuris ka angān dŭh-i bauh, pak pinyipesan adi amba adi angān mbŭh biyŭn so sibungas-i. Pinyipesan amba ati inŭh agah adi angān ko dingah.

⁸Pak pinyipesan adi aku nuris ka angān madin inŭh bauh, sabab pinyawŭ-i agi tatŭng darŭm Kristus ka darŭm angān gŭh. Amai karŭm re ripuan, ka jawa adi sawŭ mbŭh agi nyekar.

⁹Kambŭi ata nang adŭp ta darŭm jawa, pak tiru di dingan ta, ata taŭn babŭ darŭm karŭm.

¹⁰Kambŭi ata rindu dingan ta, ata udip darŭm jawa, ka mating inŭh kayuh adi darŭm ata adi re bada daya bŭkŭn[2] bidosa.

¹¹Pak kambŭi ata tiru di daya, ata darŭm karŭm; ata panu darŭm-i ka dŭh puan kamaki ata panu, sabab karŭm anŭ mbŭh bada ata karak.

¹²Aku nuris ka angān, bara anak ku, sabab dosa ngan mbŭh dog apun amai adŭn Kristus.

¹³Aku nuris ka angān adi bara sama, sabab angān mbŭh puan Ayŭh mbŭh agi so sibungas-i. Aku nuris ka angān, bara adi mara, sabab angān mbŭh ngarah Siarap anŭ.

¹⁴Aku nuris ka angān, bara anak ku, sabab angān puan Sama. Aku nuris ka angān, adi bara sama, sabab angān puan Ayŭh agi so sibungas-i. Aku nuris ka angān, bara dari adi mara, sabab angān bake; pinganang Tapa rŭŭ darŭm angān, ka angān mbŭh ngarah Siarap anŭ.

¹⁵Dŭhnyah awang ong puan kah tadŭ kayuh adi agi dieh. Kambŭi angān awang ong, angān dŭh rindu Sama.

¹⁶Barang masam kayuh adi dog dapu ong ati, pinyiripong pŭrŭng adi arap, kayuh adi daya kiris ka raan, ka barang masam kayuh di ong ati adi mingangŭn daya dieh, dŭh-i mandŭg so Sama; sopŭrŭg-i mandŭg so ong.

¹⁷Ong ati samŭn sopŭrŭg kayuh adi agi dieh adi daya raru raan re miyap; pak daya adi ndai pinyiraan Tapa udip adu adu.

¹⁸Bara anak ku, sikasŭn ong mbŭh sindŭk! Angān ko dog kidaan pasar pimandŭg Pinganyu Kristus; ka madin mbŭh bagŭ pinganyu Kristus tatŭng, ngapŭi ata puan sikasŭn ong mbŭh sindŭk.

¹⁹Bara pinganyu Kristus anŭ taŭn sawŭ dŭh so tibaran ta, ngapŭi ngara bu tingge ata; kambŭi ngara so tibaran ta, ngara tatu babŭ ngga ata. Pak ngara bu isa-i tatŭng mating katŭn ngara sawŭ so tibaran ta.

²⁰Pak angān mbŭh trima Roh Kudus adi Kristus ko ren di tunduh ngan; ngapŭi sopŭrŭg ngan puan ajar adi sawŭ.

²¹Aku nuris ka angān, meh garang, dŭh-i sabab angān dŭh puan ajar adi sawŭ, pak sabab angān puan kidŭ-i. Angān puan gŭh nang mating kayuh kadong timbur so ajar adi sawŭ.

²²Asi meh garang, daya adi pingadong anŭ? Daya pingadong anŭ inŭh ngara adi nang Jesus dŭh Kristus. Daya adi mun anŭ inŭh bara pinganyu Kristus; ngara tirawan soduwŭh-I, Sama ngga Anak.

²³Amai ngara adi tirawan Anak tirawan gŭh Sama; ngara adi trima Anak trima gŭh Sama.

²⁴Ingat meh, angān an nyikŭn darŭm atin ngan agah anŭ adi angān ko dingah so sibungas-i. Kambŭi angān bidigŭng di agah anŭ, angān re siraru udip ndi ngga Anak ka ngga Sama.

²⁵Ka ati inŭh kayuh adi Kristus ko bijanji an nggen di ata, udip adi sawŭ adi tan adu adu.

²⁶Aku nuris ati ka angān pasar ngara adi suba an kinanyap angān.

²⁷Pak mun angān, Kristus ko ren Roh-I di angān. Sitŭkŭd Roh-I babŭ darŭm angān, angān dŭh biguna di daya da ngajar angān. Amai Roh-I ngajar angān pasar sopŭrŭg kayuh, ka kayuh adi-I ngajar agi sawŭ, dŭh kayuh kadong. Tunda meh garang ajar Roh anŭ, ka bijijŭ darŭm udip ndi ngga Kristus.

²⁸Sawŭ, bara anak ku, angān bijijŭ meh darŭm udip ndi ngga Ayŭh, isa di andu Ayŭh nandŭng, ata re pus ka dŭh sukan adŭp ta darŭm mangŭh so Ayŭh di Andu Ayŭh mandŭg.

²⁹Angān puan Kristus tŭnggŭn; angān patut puan gŭh, nang barang naan daya adi ndai pingandai adi batur inŭh anak Tapa.