Read Biatah Bidayuh 1 JOHN 4 Bible Online

1 JOHN 4 - Biatah Bidayuh bible

1 JOHN 4

¹Angān adi aku rindu, dŭhnyah sabah tadŭ tadŭ daya adi nang adŭp-i biyŭn Roh Kudus, pak suba ngara yŭn puan sawŭ kah dŭh roh anŭ adi ngara biyŭn mandŭg so Tapa. Amai bagŭ nabi kadong mbŭh tambus barang yŭn.

²Simuti inŭh angān bisa puan sawŭ kah dŭh anŭ Roh Tapa: tadŭ tadŭ daya adi ngaku Jesus Kristus ko mandŭg darŭm gayŭn manusia, mbŭh biyŭn Roh adi mandŭg so Tapa.

³Pak daya adi miman kayuh ati pasar Jesus, dŭh-i biyŭn Roh so Tapa. Roh adi-i biyŭn inŭh so Pinganyu Kristus; angān ko dingah pasar pimandŭg-i, ka madin ayŭh mbŭh agi di ong.

⁴Pak angān mbŭh daya adi Tapa dapu, bara anak ku, ka mbŭh ngarah bara nabi kadong, sabab Roh adi agi darŭm angān agi rabis bikuasa so roh adi darŭm ngara adi tung ong.

⁵Bara nabi kadong anŭ minyu pasar kayuh ong, ka ong dingah ngara sabab ngara tung ong.

⁶Pak ata mbŭh daya adi Tapa dapu. Asi asi adi puan Tapa dingah ata; asi asi adi dŭh tung Tapa dŭh dingah ata. Simŭnŭ inŭh ata bisa ngatŭn aki ndi Roh adi nggen ajar adi sawŭ ka aki ndi roh adi kinanyap daya.

⁷Angān adi aku rindu, ja ata rindu dingan ta, sabab pinyirindu mandŭg so Tapa. Asi asi adi rindu, ayŭh inŭh anak Tapa ka puan Tapa.

⁸Asi asi adi dŭh rindu, ayŭh anŭ dŭh puan Tapa, amai Tapa inŭh pinyirindu.

⁹Ka Tapa kiren pinyirindu-I yŭn ta darŭm-I pait Anak tambŭ-I ka ong, isa ata bisa dapŭd udip adi sawŭ so Ayŭh.

¹⁰Ati inŭh pinyirindu: dŭh-i ata mbŭh rindu Tapa, pak Ayŭh mbŭh rindu ata, ka mbŭh pait Anak-I da jadi aran adi ngga dosa ta bisa dog apun.

¹¹Angān adi aku rindu, kambŭi simŭnŭ Tapa rindu ata, ata patut rindu dingan ta.

¹² Gi-mating daya kiris Tapa, pak kambŭi ata rindu dingan ta, Tapa udip ndi ngga ata, ka pinyirindu-I mbŭh jadi sukup batur darŭm ata.

¹³Ata puan nang adŭp ta udip ndi ngga Tapa ka Ayŭh udip ndi ngga ata, sabab Ayŭh mbŭh nggen di ata Roh-I.

¹⁴Ka kieh mbŭh kiris ka kidaan di daya bŭkŭn Sama ko pait Anak-I da jadi Pinyikudip ong.

¹⁵Kambŭi ata ngaku Jesus anŭ Anak Tapa, ata udip ndi ngga Tapa ka Tapa udip ndi ngga ata.

¹⁶Ka adŭp ta puan ka sabah pinyirindu Tapa di ata. Tapa inŭh pinyirindu, ka ngara adi udip darŭm pinyirindu udip ndi ngga Tapa ka Tapa udip ndi ngga ngara.

¹⁷Pinyirindu dog bada sukup batur darŭm ata, siŭn ata birani di Andu Bisara te. Ata re birani, sabab pimudip ta di ong agi brimun ngga tung Kristus.

¹⁸Darŭm pinyirindu mating taru. Pinyirindu adi sukup batur kadi taru. Ngapŭi meh, pinyirindu gibayuh sukup batur di daya adi taru, sabab taru agi gagit-i ngga ukum.

¹⁹Ata rindu sabab Tapa diŭ rindu ata.

²⁰Kambŭi ata nang adŭp ta rindu Tapa, pak tiru dingan ta, ata inŭh pingadong. Amai ata dŭh tungang rindu Tapa adi bŭn ata kiris, kambŭi ata dŭh rindu dingan ta adi tungang ata kiris.

²¹Pinyipesan adi Kristus ko nggen di ata agi sakati: asi asi adi rindu Tapa dŭh siŭn dŭh rindu dingan-i gŭh.