Read Biatah Bidayuh 1 JOHN 5 Bible Online

1 JOHN 5 - Biatah Bidayuh bible

1 JOHN 5

¹Asi asi adi sabah Jesus sawŭ Kristus, mbŭh anak Tapa; ka asi asi adi rindu sama rindu anak-i gŭh.

²Simuti inŭh ata puan ata rindu bara anak Tapa: anŭ inŭh darŭm ata rindu Tapa ka sita pinyipesan-I.

³ Amai pinyirindu ta di Tapa inŭh rati-i ata sita pinyipesan-I. Pinyipesan-I anŭ, dŭh-i mbar ata sita,

⁴sabab barang naan anak Tapa tungang ngarah ong. Ka ngga pinyabah ta ata dapŭd pimanang ta di tunduh-i.

⁵Asi tungang ngarah ong? Kaŭs-i daya adi sabah Jesus Anak Tapa adŭ tungang ngara ong.

⁶Jesus Kristus inŭh adi mandŭg ngga piin baptisa-I ka deya pinyikabŭs-I. Ayŭh mandŭg dŭh ngga piin adŭ, pak ngga soduwŭh-i piin ngga deya. Ka adŭp Roh Kudus mbŭh bisaksi nang kayuh anŭ sawŭ, sabab Roh dŭh bisa kadong.

⁷Mbŭh agi taruh saksi:

⁸Roh Kudus, piin, ka deya; ka so-taruh anŭ taksi-i brinyam.

⁹Ata sabah taksi manusia; pak taksi Tapa agi rabis bake, ka Ayŭh ko nggen taksi pasar Anak-I.

¹⁰Jadi ngara adi sabah di Anak Tapa, biyŭn taksi anŭ darŭm atin ngara; pak ngara adi dŭh sabah Tapa, mbŭh bada Ayŭh jadi pingadong, sabab ngara dŭh sabah kayuh adi Tapa ko nang pasar Anak-I.

¹¹ Taksi anŭ agi simuti: Tapa mbŭh nggen di ata udip adi sawŭ adi tan adu adu, ka udip anŭ inŭh so Anak-I.

¹²Asi asi adi biyŭn Anak biyŭn udip adi sawŭ anŭ; asi asi adi dŭh biyŭn Anak Tapa dŭh biyŭn udip anŭ.

¹³Aku nuris ati ka angān isa angān puan adŭp ngan biyŭn udip adi sawŭ adi tan adu adu, angān adi sabah di Anak Tapa.

¹⁴Ata pus di sirung jawin Tapa, sabab ata puan Ayŭh tatu an dingah ata kambŭi ata mite so Ayŭh kayuh adi nanyam ka pinyiraan-I.

¹⁵Ayŭh dingah ata di tadŭ nga ata mite so Ayŭh; ka amai ata puan kayuh anŭ sawŭ, ata puan gŭh nang Ayŭh nggen di ata kayuh adi ata mite so Ayŭh.

¹⁶Kambŭi angān kiris dingan ngan adi sabah ndai dosa adi dŭh taban pinyikabŭs, angān patut bidua ka Tapa, adi re nggen udip adi sawŭ adi tan adu adu di ayŭh. Angān ndai simŭnŭ yŭn ngara adi ndai dosa adi dŭh taban pinyikabŭs. Pak agi dosa adi taban pinyikabŭs, ka aku dŭh minyu nang angān patut bidua ka Tapa pasar anŭ.

¹⁷Sopŭrŭg pingandai sarah inŭh dosa, pak agi dosa adi dŭh bitan daya dapŭd udip adi sawŭ adi tan adu adu.

¹⁸Ata puan mating anak Tapa re babŭ an ndai dosa, amai Anak Tapa jaga ngara, ka sianŭ adi Arap dŭh re tungang kandam ngara.

¹⁹Ata puan ata ati mbŭh daya adi Tapa dapu sunggu ndi ong ong mbŭh di ribo kuasa sianŭ adi Arap.

²⁰Ata puan Anak Tapa mbŭh mandŭg ka mbŭh nggen di ata pinyimirati, isa ata puan Tapa adi sawŭ. Ata udip ndi ngga Tapa adi sawŭ, amai ata udip ndi ngga Anak-I Jesus Kristus. Ati inŭh Tapa adi sawŭ, ka ati inŭh udip adi sawŭ adi tan adu adu.

²¹Angān adi bara anak ku, jaga adŭp ngan so bara tapa-kadong!