Read Biatah Bidayuh AKIM 1 Bible Online

AKIM 1 - Biatah Bidayuh bible

AKIM 1

¹Ripas pinyikabŭs Joshua daya Israel siken di TUHAN, “Aki ndi so bara tibaran-asar ami adi patut diŭ matak di nyerang bara daya Canaan?”

²Ka TUHAN nam, “Tibaran-asar Judah patut diŭ. Aku nggen di ngara kuasa ngga sirabut tarun tana anŭ.”

³Daya Judah nang di daya Simeon, “Matak ngga kieh ka tarun tana adi mbŭh dog pirutung ka kieh, ka ata samah samah rawan bara daya Canaan. Muko anŭ kieh re matak ngga angān ka tarun tana adi mbŭh dog pirutung ka angān.” Ka tibaran-asar Simeon

⁴ngga Judah meh samah matak biperang. TUHAN nggen di ngara pimanang ngarah bara daya Canaan ngga bara daya Periz. Ngara ngarah simŭng ribu naan soldadu di Bezek.

⁵Ngara dapŭd Adonibezek diginŭ ka rawan ayŭh.

⁶Ayŭh bu, pak ngara tadak ayŭh, nakap ayŭh, ka kapŭg so-duwŭh sindŭ tangan ngga so-duwŭh sindŭ kaja-i.

⁷Adonibezek nang, “Ju puru naan raja adi dog kapŭg sindŭ tangan ngga sindŭ kaja ngara sun tatuh di ribo mija ku. Tapa mbŭh ndai di aku kayuh adi aku mbŭh ndai di ngara.” Ayŭh dog taban ka Jerusalem, ka diginŭ ayŭh kabŭs.

⁸Daya Judah nyerang Jerusalem ka sirabut-i. Ngara siŭ bara daya adi darŭm-i, ka sigot kupo anŭ.

⁹Muko anŭ, ngara di nyerang daya Canaan adi rŭŭ di rais tarun tana sandah, di sigŭn sandah, ka di tarun tana adi badŭh di tura ka siratan.

¹⁰Ngara masang tudu daya Canaan adi rŭŭ di kupo Hebron adi ko dog kadŭn Kiriath Arba. Diginŭ ngara ngarah bara manak Sheshai, Ahiman, ngga Talmai.

¹¹So nŭ bara daya Judah masang di nyerang kupo Debir, adi di jaman anŭ dog kadŭn Kiriath Sepher.

¹²Ndi naan so ngara, adi dŭn Caleb, nang, “Aku re nggen anak dayung ku Achsah ndu sawŭn di dari adi tungang sirabut Kiriath Sepher.”

¹³Othniel, anak sude Caleb adi dŭn Kenaz, sirabut kupo anŭ, jadi Caleb nggen di ayŭh anak dayung-i Achsah ndu sawŭn-i.

¹⁴Di andu pinyisawan ngara, Othniel ngasu sawŭn-i[1] mite ndi engan tana so sama-i. Ayŭh mūn so kaldi adi nunggang-i, ka Caleb siken ayŭh ani raan-i.

¹⁵Ayŭh nam, “Aku raan tana adi biyŭn rubang piin. Tana adi kaam mbŭh nggen di aku inŭh di tarun tana badŭh.” Jadi Caleb nggen di ayŭh tana adi biyŭn rubang rubang piin di sijo ngga di saba.

¹⁶Jadi bara sesang damŭh Moses, adi daya Ken, samah ngga daya Judah bipindah so Jericho, anŭ inŭh kupo adi biyŭn bagŭ tŭngŭn kurma, di ka tarun tana-matung di tura ka siratan Arad di tarun tana Judah. Diginŭ ngara rŭŭ bigaur ngga daya Amalek.[2]

¹⁷Daya Judah matak ngga daya Simeon ka samah samah ngara ngarah daya Canaan adi rŭŭ di kupo Zephath. Ngara mangu kupo anŭ, nyirubuh ka kadŭn-i Hormah.[3]

¹⁸TUHAN turung daya Judah, ka ngara tambit rais tarun tana sandah; pak ngara dŭh sirabut[4] Gaza, Ashkelon, bait Ekron, ngga abong tarun tana adi maning anŭ. Ngara adi rŭŭ di pang rawŭt biyŭn krita kuda adi dog ndai so basi, ka anŭ sabab daya Judah dŭh tungang pibu ngara.

²⁰ Jadi, nimun adi Moses muko pesan, Hebron dog nggen di Caleb, adi mbŭh pibu taruh manak adi so sesang Anak so dieh.

²¹ Pak daya tibaran-asar Benjamin dŭh pibu daya Jebus adi rŭŭ di Jerusalem, sabab anŭ meh daya Jebus babŭ diginŭ ndŭg madin, bigaur ngga daya Benjamin.

²²Tibaran-asar Ephraim ngga Manasseh matak di nyerang kupo Bethel, adi dog kadŭn Luz di jaman anŭ. TUHAN agi turung ngara. Ngara pait pinyiong ka kupo anŭ.

²⁴Ka bara pinyiong anŭ kiris ndi naan daya ruah so kupo anŭ, ka nang di ayŭh, “Turung kidaan di kieh aran mŭrŭt kupo ati, ka kieh dŭh re ida ida ngga kuu.”

²⁵Ka ayŭh kidaan di ngara aran mŭrŭt kupo; ka daya Ephraim ngga Manasseh siŭ sopŭrŭg daya adi darŭm kupo anŭ, adŭ-i daya anŭ ngga rawang-i.

²⁶Ripas anŭ ayŭh di ka tarun tana daya Hitti, ka pijog ndi kupo diginŭ, ka kadŭn-i Luz. Anŭ meh dŭn-i ndŭg andu ati.

²⁷ Tibaran-asar Manasseh dŭh pibu daya adi rŭŭ di kupo Beth Shan, Taanach, Dor, Ibleam, Megiddo, ngga anak anak kupo adi sindŭk anŭ; daya Canaan gibabŭ rŭŭ diginŭ.

²⁸Kan bara daya Israel jadi rabis bake, ngara takan daya Canaan bada nyiraja yŭn adŭp ngara, pak babŭ gŭh dŭh pibu ngara.

²⁹ Tibaran-asar Ephraim dŭh pibu daya Canaan adi rŭŭ di kupo Gezer, ka daya Canaan meh babŭ rŭŭ diginŭ bigaur ngga ngara.

³⁰Tibaran-asar Zebulum dŭh pibu daya adi rŭŭ di kupo Kidron ngga Nahalal, ka daya Canaan meh babŭ rŭŭ bigaur ngga ngara, ka dog takan bada nyiraja yŭn daya Zebulum.

³¹Tibaran-asar Asher dŭh pibu daya adi rŭŭ di kupo Acco, Sidon, Ahlab, Achzib, Helbah, Aphek, ngga Rehob.

³²Daya Asher rŭŭ ngga daya Canaan adi daya asar rais anŭ, amai ngara dŭh pibu ngara so nŭ.

³³Tibaran-asar Naphtali dŭh pibu daya adi rŭŭ di kupo Beth Shemesh ngga Bethanath. Daya Naphtali rŭŭ bigaur ngga daya Canaan adi daya asar rais anŭ, pak takan ngara bada nyiraja yŭn ngara.

³⁴Bara daya Amor pibu daya tibaran-asar Dan ka rais tarun tana sandah ka dŭh bada ngara pari ka tarun tana rabak.

³⁵Bara daya Amor babŭ rŭŭ di Aijalon, Shaalbim, ngga di Darŭd Heres, pak tibaran-asar Ephraim ngga Manasseh nguasa ngara ka takan ngara bada nyiraja yŭn ngara.

³⁶Di utara Sela, baat daya Edom[5] mutas Ateng Akrabbim.