Read Biatah Bidayuh AKIM 10 Bible Online

AKIM 10 - Biatah Bidayuh bible

AKIM 10

¹Ripas pinyikabŭs Abimelech, Tola anak dari Puah ka sukuh Dodo, mandŭg di pirupas Israel. Ayŭh anŭ so tibaran-asar Issachar ka rŭŭ di Shamir di rais tarun tana sandah Ephraim.

²Ayŭh jadi pinguru Israel sitian duwŭh puru-taruh sawa. Komŭnŭ ayŭh kabŭs ka dog kubur di Shamir.

³Ripas Tola, Jair jadi pinguru Israel. Ayŭh nguru Israel sitian duwŭh puru-duwŭh sawa.

⁴Ayŭh biyŭn taruh puru anak dari adi nunggang taruh puru kaldi. Ngara biyŭn taruh puru kupo di tarun tana Gilead, adi gibabŭ dog kadŭn anak anak kupo Jair.

⁵Jair kabŭs ka dog kubur di Kamon.

⁶Ndi sidah dinge bara daya Israel bidosa rawan TUHAN amai nyambah Baal ngga Astart; ngara nyambah gŭh tapa tapa so Syria, so Sidon, so Moab, so Ammon, ka so Philistia. Ngara mbŭh tagan TUHAN ka mbŭh dŭh tia nyambah Ayŭh.

⁷Jadi TUHAN baji di daya Israel, ka bada daya Philistine ngga daya Ammon ngarah ngara.

⁸Sitian simŭng mai sawa ngara pijera ka kisiis sopŭrŭg daya Israel adi rŭŭ di rais Amor di parad tura ka timor Yang Jordan di Gilead.

⁹Bara daya Ammon mutas gŭh Yang Jordan di nyerang tibaran-asar Judah, Benjamin, ngga Ephraim, ndŭg ka daya Israel mbŭh raru susah.

¹⁰Komŭnŭ daya Israel bagan ka mite turung so TUHAN, “Kieh mbŭh bidosa rawan Kaam, amai kieh mbŭh tingge Kaam, adi Tapa ami, ka nyambah tapa tapa Baal.”

¹¹TUHAN nggen di ngara pinyinam sakati: “Daya Egypt, daya Amor, daya Ammon, daya Philistine,

¹²daya Sidon, daya Amalek, ngga daya Maon pijera angān dawŭ-i, ka angān bagan ka mite turung so Aku. Mating kah Aku nyiramat angān so ngara?

¹³Pak angān gibabŭ tingge Aku ka nyambah tapa tapa bŭkŭn, jadi Aku dŭh re nyiramat angān dinge.

¹⁴Panu di bagan tapa tapa adi angān mbŭh mien. Bada ngara pirupas angān kan angān dog pinyusah.”

¹⁵Pak daya Israel nang di TUHAN, “Kieh mbŭh bidosa. Ndai tadŭ mun-i nanyam raan Mai, atas Kaam nyiramat kieh andu ati.”

¹⁶Jadi ngara kubo taran tapa tapa saruh ngara ka nyambah TUHAN; ka Ayŭh dŭh munos yang-I kiris pinyusah Israel.

¹⁷Komŭnŭ bara soldadu daya Ammon mbŭh sidia yŭn re biperang ka bibari di Gilead. Daya Israel mandŭg tikuruk ka bibari di Mizpah di Gilead.

¹⁸Diginŭ bara daya ngga bara pinguru tibaran tibaran-asar Israel siken dupan adŭp-i, “Asi adi re nguru ata biperang rawan daya Ammon? Sianŭ adi birani nguru siŭn jadi pinguru yŭn barang naan daya di Gilead.”