Read Biatah Bidayuh AKIM 12 Bible Online

AKIM 12 - Biatah Bidayuh bible

AKIM 12

¹Daya Ephraim mbŭh sidia re biperang; ngara mutas Yang Jordan di ka Zaphon ka nang di Jephthah, “Mani angān mutas baat di rawan daya Ammon dŭh kidaan di kieh bada sua ngga angān? Kieh re badang ramin ngan samah ngga adŭp ngan!”

²Pak Jephthah kidaan di ngara, “Bara daya ku ngga aku agi kaii bās ngga daya Ammon. Aku agi bagan angān, pak angān dŭh an mandŭg di turung aku pirupas adŭp ku so ngara.

³Kan aku kiris angān dŭh re mandŭg, aku ruban asŭng adŭp ku mutas baat di rawan ngara, ka TUHAN nggen di aku pimanang ngarah ngara. Jadi mani meh angān mandŭg an rawan aku madin?”

⁴Komŭnŭ Jephthah taban sopŭrŭg daya Gilead, ka rawan bara soldadu Ephraim ka ngarah ngara. (Bara daya Ephraim ko nang, “Angān daya Gilead di Ephraim ngga Manasseh, angān daya adi kadi adŭp ngan so tibaran-asar Ephraim!”)

⁵Ngga bada daya Ephraim dŭh dapŭd pirupas adŭp ngara, daya daya Gilead sirabut tarun tarun adi yŭn Jordan dapŭd dog mutas. Kan tadŭ tadŭ daya Ephraim suba an pirupas adŭp-i, ayŭh an mite pinyibandar diŭ so-i mutas, ka daya Gilead meh re siken, “Kuu daya Ephraim kah?” Kambŭi ayŭh nang, “Dŭh,”

⁶ngara an bada ayŭh nang “Shibboleth.” Pak ayŭh nang “Sibboleth,” sabab ayŭh dŭh pandai nyabŭt-i ngga batur. Ka ngara meh an nakap ayŭh ka siŭ ayŭh diginŭ di ndi so anŭ adi yŭn mutas Yang Jordan. Di tika anŭ pat puru duwŭh ribu naan daya Ephraim dog siŭ.

⁷Jephthah jadi pinguru Israel sitŭkŭd nŭm sawa. Komŭnŭ ayŭh kabŭs ka dog kubur di kupo adŭp-i[18] di Gilead.

⁸Ripas Jephthah, Ibzan so Bethlehem jadi pinguru Israel.

⁹Ayŭh biyŭn taruh puru naan anak dari ka taruh puru naan anak dayung. Ayŭh bada anak anak dayung-i banan ngga daya daya so manak bŭkŭn ka taban dayung dayung mara so sapa manak adŭp-i bada jadi sawŭn bara anak adŭp-i. Ibzan jadi pinguru Israel sitŭkŭd ju sawa,

¹⁰komŭnŭ ayŭh kabŭs ka dog kubur di Bethlehem.

¹¹Ripas Ibzan, Elon so Zebulun jadi pinguru Israel sitŭkŭd simŭng sawa.

¹²Komŭnŭ ayŭh kabŭs ka dog kubur di Aijalon di tarun tana Zebulun.

¹³Ripas Elon, Abdon anak Hillel so Pirathon jadi pinguru Israel.

¹⁴Ayŭh biyŭn pat puru naan anak dari ka taruh puru naan sukuh dari, ka barang naan biyŭn kaldi adŭp-i. Abdon jadi pinguru Israel sitŭkŭd mai sawa,

¹⁵komŭnŭ ayŭh kabŭs ka dog kubur di Pirathon di tarun tana Ephraim di rais tarun tana sandah Amalek.