Read Biatah Bidayuh AKIM 13 Bible Online

AKIM 13 - Biatah Bidayuh bible

AKIM 13

¹Daya Israel bidosa dinge rawan TUHAN, ka Ayŭh bada daya Philistine mritah ngara sitŭkŭd pat puru sawa.

²Di jaman anŭ agi ndi naan daya dŭn Manoah so kupo Zorah. Ayŭh anŭ ndi naan daya so tibaran-asar Dan. Sawŭn-i aboh.

³Malaikat TUHAN nandŭng di sawŭn-i ka nang, “Kuu mbŭh bŭn tungang biyŭn anak, pak dŭm dŭh tui kuu re bite ka biranak ndi anak dari.

⁴Pak ingat, dŭhnyah nok tadŭ tadŭ wain puan kah nok nok adi bisā, puan kah man tadŭ tadŭ pinguman adi dog nagah daya man,

⁵ ka ripas anak mu mbŭh dog biranak, kuu dŭh siŭn kapŭg ubok-i, amai piguru so andu pinyibranak-i ayŭh mbŭh dog nitah ka TUHAN, jadi daya Nazir.[19] Ayŭh re piguru pinyirupas yŭn daya Israel so daya Philistine.”

⁶Muko anŭ, dayung anŭ di ka kidaan di banŭh-i, “Ndi naan daya Tapa agi mandŭg tudu aku, taru nŭŭh kiris, mun malaikat Tapa. Aku dŭh siken so ki pimandŭg-i, ka ayŭh dŭh gŭh kidaan dŭn-i di aku.

⁷Pak ayŭh agi kidaan di aku nang aku re bite ka re biranak ndi anak dari. Ayŭh kidaan di aku bada dŭhnyah nok tadŭ tadŭ wain puan kah nok nok adi bisā puan kah man pinguman adi dog nagah daya man, amai anak anŭ re dog nitah ka TUHAN jadi daya Nazir sitŭkŭd umbur-i”.

⁸Komŭnŭ Manoah bidua ka TUHAN, “TUHAN, turung bada daya Tapa anŭ adi pait Mai pari ka yŭn ami isa-i kidaan kayuh adi patut ami ndai yŭn anak anŭ kan ayŭh mbŭh dog biranak.”

⁹Tapa ndai nimun pimite Manoah, ka malaikat-I anŭ pari tudu dayung anŭ darŭm-i guru di ŭmŭh. Banŭh-i Manoah mating ngga ayŭh diginŭ.

¹⁰Jadi ayŭh rasu makat ka bikaduh di kidaan di banŭh-i, “Tingga! Daya anŭ adi mandŭg tudu aku prajah mbŭh agi nandŭng dinge di aku!”

¹¹Manoah rasu makat ka tunda sawŭn-i. Ayŭh tudu daya anŭ ka siken, “Kaam kah daya anŭ adi minyu ngga sawŭn ku prajah?” “Aku inŭh anŭ,” ayŭh nam.

¹²Komŭnŭ Manoah nang, “Kan pinganang mai anŭ jadi bitŭtŭk, ani dŭh siŭn dŭh anak anŭ ndai? Pimudip adi munki tung jangi”

¹³Malaikat TUHAN nam, “Sawŭn mu dŭh siŭn dŭh ndai nimun adi muko aku kidaan di ayŭh.

¹⁴Ayŭh dŭh siŭn man tadŭ tadŭ kayuh adi mandŭg so tŭngŭn anggor; ayŭh dŭh siŭn nok tadŭ tadŭ wain puan kah nok nok adi bisā, puan kah man pinguman adi dog nagah daya man. Ayŭh dŭh siŭn dŭh ndai sopŭrŭg anŭ adi aku muko kidaan di ayŭh.”

¹⁵Dŭh puan nang ayŭh anŭ malaikat TUHAN, Manoah nang di ayŭh, “Turung dŭhnyah diŭ bu. Kieh re tanŭk ndi anak kambing yŭn mai.” Pak malaikat anŭ nang, “Kambŭi aku kajŭn, dŭh gŭh aku re man pinguman ngan. Pak kambŭi angān raan sidia-i, angān siŭn badang-i ndu sadis ka TUHAN.”

¹⁷Manoah nam, “Kidaan dŭn mai di kieh, isa kieh bisa nggen stabi di kaam kan pinganang mai jadi bitŭtŭk.”

¹⁸Ka malaikat anŭ siken, “Mani angān an puan dŭn ku? Dŭn ku inŭh dŭn adi saruh.”[20]

¹⁹Jadi Manoah tambit ndi anak kambing ngga kada ruwang kayuh, ka jugan-i di tunduh mija-sambah batuh ka TUHAN adi ndai pingandai pingandai saruh.[21]

²⁰Ka sitadŭn jireb apui bijagu ka sambu so tunduh mija-sambah, Manoah ngga sawŭn-i kiris malaikat TUHAN maad ka rangit darŭm jireb apui anŭ. Manoah rasu rada nang daya anŭ malaikat TUHAN, ka ayŭh ngga sawŭn-i rasu sipŭŭb di tana, nyambah. Ngara bŭn kiris malaikat anŭ dinge.

²²Manoah nang di sawŭn-i, “Ata tatu re kabŭs amai ata mbŭh kiris Tapa?”

²³Pak sawŭn-i nam, “Kambŭi TUHAN sawŭ raan siŭ ata, Ayŭh dŭh kambat sadis ta; ka Ayŭh dŭh gŭh an kiren sopŭrŭg kayuh ati di ata bait kidaan kayuh adi mun ati di tipuh ati.”

²⁴Jadi dayung anŭ biranak ndi anak dari, ka kadŭn ayŭh Samson. Anak anŭ masang baga bigatung ka TUHAN nyiberkat ayŭh.

²⁵Ka kuasa TUHAN piguru nyibake ayŭh sitadŭn ayŭh rŭŭ di Bari Dan di asah Zorah ngga Eshtaol.