Read Biatah Bidayuh AKIM 14 Bible Online

AKIM 14 - Biatah Bidayuh bible

AKIM 14

¹Ndi andu, Samson matak di ka Timnah, ka diginŭ ayŭh kiris ndi naan dayung bujang daya Philistine.

²Ayŭh mari ka arŭn ka kidaan di sindŭ sama-i, “Aku agi kiris ndi naan bujang dayung daya Philistine di Timnah adi ripong ku kiris. Siken ayŭh yŭn ku; aku raan tambit ayŭh ndu sawŭn.”

³Pak sindŭ sama-i siken ayŭh, “Mani kuu sah di ka dupan daya Philistine di jiroh dayung ndu mu sawŭn? Dŭh kah kuu tungang dapŭd dayung so manak adŭp ta, di dupan sopŭrŭg daya bangsa adŭp ta?” Pak Samson kidaan di sama-i, “Ayŭh inŭh dayung adi raan ku angān tambit yŭn ku. Ayŭh dog di batŭh ku.”

⁴Sindŭ sama Samson dŭh puan nang TUHAN inŭh adi ngatur Samson bada ndai simŭnŭ, amai TUHAN taŭn mbŭh jiroh aran adi ngga-i bisa rawan daya Philistine. Di jaman anŭ daya Philistine inŭh adi mritah Israel.

⁵Jadi Samson matak di ka Timnah ayō sindŭ sama-i. Ka darŭm ngara panu mutas teya anggor diginŭ, ayŭh dingah singah adi mara ngŭr.

⁶Ka gŭgŭh kuasa TUHAN nyibake Samson, ka-i nyiratak adŭ singah anŭ nyinuwŭh ngga tangan-i, mun nyiratak anak kambing. Pak ayŭh dŭh kidaan di pimas-i kayuh adi ndai-i.

⁷Muko anŭ ayŭh di tudu ka minyu ngga dayung anŭ. Ayŭh suka dayung anŭ.

⁸Duwŭh taruh andu ripas anŭ, Samson pari di sawŭn ayŭh. Di atang aran, ayŭh nyipang, di tingga singah adi ko-i siŭ. Ayŭh mbŭh raru gŭgŭh kan-i kiris dudu banyis ngga ju banyis darŭm tadang singah anŭ.

⁹Ka-i nyauk ngga tangan-i, ka man-i buang-i panu. Ayŭh taban kada ju banyis anŭ ka yŭn sindŭ sama-i. Ngara man-i, pak Samson dŭh kidaan di ngara nang adŭp-i tambit ju banyis anŭ so tadang singah.

¹⁰Sama Samson di ka ramin dayung anŭ, ka Samson kuka gawai diginŭ. Anŭ inŭh ndi masam adat yŭn bujang dari.

¹¹Kan daya Philistine kiris ayŭh, ngara pait taruh puru naan bujang dari bada rŭŭ ngga ayŭh.

¹²Samson nang di ngara, “Aku re nang ndi atau di angān, ka kambŭi angān tungang kidaan rati-i diŭ so ju andu adi ngga ata sita gawai ati ripuan, aku an nggen di angān taruh puru rambar banang linen adi jarŭh ngga taruh puru pasang piraka adi ramus.” “Nang garang atau mu di kieh,” ngara nang. “Kieh an dingah.”

¹⁴Ayŭh nang, “So sianŭ adi man mandŭg kayuh man; So sianŭ adi bake mandŭg kayuh adi nyibanyis.” Taruh andu ripas anŭ, ngara gibabŭ dŭh tungang dapŭd rati atau anŭ.

¹⁵Di andu adi pat[22] ngara nang di sawŭn Samson, “Mujuk banŭh mu, isa-i kidaan rati atau-i. Kambŭi kuu dŭh, kieh re sigot ramin sama mu, samŭn adŭp mu darŭm-i.[23] Angān duwŭh bagan kieh kamati amai raan mirupak kieh, dŭh kah?”

¹⁶Jadi sawŭn Samson di tudu ayŭh buang sien nang di ayŭh, “Kuu dŭh sawŭ awang aku! Kuu tiru di aku! Kuu nggen atau di dingan dingan ku, ka dŭh kidaan rati-i di aku!” Ayŭh nang di sawŭn-i, “Tingga, di sindŭ sama ku dŭh gŭh aku kidaan. Re ngga mani aku kidaan di kuu?”

¹⁷Sawŭn-i sien pasar kayuh anŭ sitadŭn ju andu gawai anŭ. Pak di andu adi ju, Samson kidaan di sawŭn-i rati atau anŭ, amai mbŭh anŭ anŭ nang sawŭn-i. Ka sawŭn Samson kidaan rati atau anŭ di daya Philistine.

¹⁸Jadi, di andu adi ju, diŭ so Samson di mŭrŭt ka darŭm birit bŭŭs,[24] bara dari kupo anŭ nang di ayŭh: “Ani adi nyibanyis dŭ so ju banyis? Ani adi bake dŭ so dāng singah?” Samson nam, “Kambŭi angān dŭh ko diŭ majak tana ngga sapi ku, tatu angān dŭh tungang puan rati atau ku.”

¹⁹Ka gŭgŭh kuasa TUHAN nyibake Samson, ka ayŭh matak di ka kupo Ashkelon, di yŭn-i siŭ taruh puru naan daya, ka pirukos piraka ngara, ka nggen di ngara anŭ adi muko kidaan rati atau-i tejah. Muko anŭ, ayŭh mari ka ramin sama-i buang raru baji pasar kayuh adi mbŭh jadi,

²⁰ka sawŭn Samson dog nggen di jerā-i anŭ adi muko ngapid ayŭh di tika sawan-i.