Read Biatah Bidayuh AKIM 15 Bible Online

AKIM 15 - Biatah Bidayuh bible

AKIM 15

¹Dŭh tui ripas anŭ, Samson matak di munan sawŭn-i darŭm tipuh daya ngatŭm gandom, taban anak kambing yŭn-i. Ayŭh kidaan di sama sawŭn-i, “Aku raan mŭrŭt birit sawŭn ku.” Pak sama sawŭn-i abah bada ayŭh mŭrŭt ka darŭm birit sawŭn-i.

²Ayŭh kidaan di Samson, “Aku batur batur pikir kuu mbŭh tiru di ayŭh, ngga aku muko nggen ayŭh di jerā mu. Pak sude-i no, ramus dŭ. Kuu bisa tambit ayŭh adŭ, ngga gati sawŭn mu.”

³Samson nang, “Saba ati, aku dŭh re dapu tanggong di kayuh adi ndai ku di tunduh daya Philistine.”

⁴Jadi ayŭh matak ka nakap taruh ratus pŭrŭng dāng bisirŭh. Ayŭh bada bigembar duwŭh dāng dāng anŭ, mŭŭng-i di koi-i bada bigagit, ka prita-siru' ayŭh na di buku-i.

⁵Komŭnŭ Samson tung prita-siru' anŭ ngga apui ka piruah dudu bisirŭh anŭ darŭm ŭmŭh gandom daya Philistine. Simŭnŭ ayŭh sigot dŭh gandom adi muko dog ngatŭm adŭ, pak samŭn anŭ adi gibabŭ di tŭngŭn-i. Risŭn risŭn kanā daya dog sigot gŭh.

⁶Kan bara daya Philistine siken asi ndai kayuh anŭ, ngara dog kidaan nang Samson adi ndai-i amai damŭh-i, daya so Timnah, mbŭh nggen sawŭn Samson di jerā Samson. Jadi daya Philistine di ka badang dayung anŭ ndŭg ka kabŭs ka badang ramin sama-i.[25]

⁷Samson nang di ngara, “Mun anŭ pingandai ngan kawang! Aku bipayu aku dŭh re ko ndŭg ka aku mbŭh maras angān!”

⁸Samson bandar bandar nyerang ka siŭ bagŭ bara ngara anŭ. Komŭnŭ ayŭh di ka rŭŭ di darŭm tang di sandah batuh di Etam.

⁹Daya Philistine mandŭg ka bibari di tarun tana Judah, ka nyerang kupo Lehi.

¹⁰Bara daya Judah siken ngara, “Mani angān nyerang kieh?” Ngara nam, “Kieh mandŭg an nakap Samson ka ndai di ayŭh nimun adi ayŭh mbŭh ndai di kieh.”

¹¹Jadi taruh ribu naan bara daya Judah di ka tang di sandah batuh di Etam ka nang di Samson, “Dŭh kah kuu puan nang daya Philistine adi mritah ata? Mani kuu ndai simuti di kieh?” Ayŭh nam, “Aku ndai di ngara nimun adi ngara mbŭh ndai di aku.”

¹²Ngara nang di ayŭh, “Kieh mandŭg kamati an muak kuu, isa kieh bisa nggen kuu di ngara.” Samson nang, “Bijanji ngga aku adŭp ngan dŭh re siŭ aku.”

¹³“Kieh bijanji,” ngara nang, “Kaŭs kieh re muak kuu ka nggen kuu di ngara. Kieh dŭh re siŭ kuu.” Jadi ngara muak ayŭh ngga duwŭh tŭngŭn taris adi gi-bauh, ka taban ayŭh ngga pari so sandah batuh anŭ.

¹⁴Kan ayŭh mbŭh ndŭg Lehi, bara daya Philistine bikaduh mandŭg tudu ayŭh, buang nyirais. Gŭgŭh kuasa TUHAN nyibake ayŭh, ka ayŭh matŭd taris adi ngga mŭŭng birungo ngga tangan-i keya ka matŭd tiburi adi dog badang.

¹⁵Komŭnŭ Samson dapŭd siraka kaldi adi bauh kabŭs. Ayŭh mutu ka tambit siraka anŭ ka pakai-i ngga siŭ siribu naan daya.

¹⁶Ka Samson biragu, “Ngga turang siraka kaldi aku siŭ siribu naan daya; Ngga turang siraka kaldi aku nugung tadang ngara bada bitugung.”[26]

¹⁷Ripas anŭ, Samson taran turang siraka kaldi anŭ. Tarun adi yŭn kayuh anŭ jadi dog kadŭn Ramath Lehi.[27]

¹⁸Komŭnŭ Samson raru badŭh asŭng-i, ka ayŭh bagan ka TUHAN ka nang, “Kaam mbŭh nggen di aku pimanang bās ati; ka madin aku re kabŭs badŭh asŭng ka dog nakap bara daya Philistine adi dŭh puan Kaam kah?”

¹⁹Jadi Tapa kuka tarun adi bigagong darŭm tana di Lehi, ka piin ruah so darŭm-i. Samson nok piin anŭ, ka yang-i jadi mua ranyah. Jadi rubang piin anŭ dog kadŭn Hakkore,[28] ka gibabŭ agi diginŭ di Lehi.

²⁰Samson jadi pinguru Israel sitŭkŭd duwŭh puru sawa darŭm daya Philistine nguasa tarun tana anŭ.