Read Biatah Bidayuh AKIM 19 Bible Online

AKIM 19 - Biatah Bidayuh bible

AKIM 19

¹Di jaman Israel gibayuh biyŭn raja, agi ndi naan daya Levi rŭŭ jeh di rais tarun tana sandah Ephraim. Ayŭh tambit ndi naan dayung adi gi-mara so Bethlehem di Judah jadi dayung nyikŭn-i.

²Pak komŭnŭ dayung anŭ baji di ayŭh ka mari ka ramin sama-i di Bethlehem, ka rŭŭ diginŭ pat buran.

³Jadi dari anŭ ndai pikir-i an tudu ayŭh ka nyikuro ayŭh bada pari ka yŭn adŭp-i. Ayŭh taban daya gaji-i ngga duwŭh kaldi. Dayung anŭ bada dari anŭ mŭrŭt ka darŭm arŭn, ka kan sama dayung anŭ kiris ayŭh, ayŭh kambat ayŭh ngga atin gaŭn.

⁴Sama dayung anŭ bitan ayŭh, jadi ayŭh rŭŭ diginŭ taruh andu. Ngara man nok ka ayŭh nyirŭmŭn diginŭ.

⁵Isan isan andu adi pat, ngara awar makat ka mbŭh sidia re an matak. Pak sama dayung anŭ nang di daya Levi anŭ, “Guru man dawŭ-i, bada adŭp nŭh bisoh. Kuu bisa panu te.”

⁶Jadi ngara duwŭh anŭ guru, ka samah man nok. Komŭnŭ sama dayung anŭ nang di daya Levi anŭ, “Turung nyirŭmŭn dinge ka nyipawŭn adŭp mu.”

⁷Daya Levi anŭ makat an panu, pak sama dayung anŭ ngasu ayŭh bada nyirŭmŭn, jadi ayŭh nyirŭmŭn dinge diginŭ.

⁸Awar isan isan andu jawa adi rimŭh ayŭh makat re an panu, pak sama dayung anŭ nang, “Man dawŭ-i. Kajŭn ndŭg ripas kumbeng ka nŭh panu.” Ka ngara duwŭh man samah.

⁹Kan daya Levi anŭ, dayung nyikŭn-i, ngga daya gaji-i makat dinge re panu, sama dayung anŭ nang di ayŭh, “Tingga, madin andu mbŭh re karŭm; kana dŭ angān nyirŭmŭn adŭ. Dŭm dŭh tui andu re karŭm. Rŭŭ digiti ka nyipawŭn adŭp ngan. Sipagi angān bisa awar makat, panu mari.”

¹⁰Pak daya Levi anŭ abah nyirŭmŭn dinge diginŭ, ka ayŭh ngga dayung nyikŭn-i panu adŭ, ngga daya-gaji ngara ka ngga duwŭh kaldi anŭ adi mbŭh dog na tapas-pinyiguru dieh. Andu mbŭh rambat kan ngara mbŭh re ndŭg Jebus, (anŭ inŭh Jerusalem). Ka daya-gaji anŭ nang di tuan-i, “Mani ata dŭh rŭŭ adŭ ka nyirŭmŭn di kupo daya Jebus ati?”

¹²Pak tuan-i nang, “Ata dŭh re nyasa rŭŭ di kupo daya adi dŭh daya Israel. Ata an radus adŭ panu jo nisit, ka nyirŭmŭn di Gibeah puan kah di Ramah.”

¹⁴Jadi ngara murah kupo Jebus ka pijuu pimanu ngara. Batŭh andu mbŭh simŭdŭp kan ngara ndŭg Gibeah, di tarun tana tibaran-asar Benjamin.

¹⁵Ngara biruit so aran bās, amai an nyirŭmŭn di kupo anŭ. Ngara mŭrŭt kupo ka guru di pakan kupo, pak mating daya raan tambit ngara bada nyandong ramin-i.

¹⁶Sitadŭn ngara diginŭ, ndi naan nyamba dari mari so ŭmŭh-i. Daya anŭ, asar-i inŭh so rais tarun tana sandah Ephraim, pak madin ayŭh rŭŭ di Gibeah. (Daya bŭkŭn adi rŭŭ diginŭ inŭh so tibaran-asar Benjamin.)

¹⁷Nyamba dari anŭ kiris daya Levi anŭ di pakan kupo ka siken ayŭh, “So ki kuu mandŭg? Re di kamaki kuu?”

¹⁸Daya Levi anŭ nam, “Kieh bauh mandŭg so Bethlehem di tarun tana Judah, ka madin kieh darŭm pimanu ami re pari ka ramin adŭp ami[37] jeh di rais tarun tana sandah Ephraim. Mating daya an bada kieh nyirŭmŭn di ramin-i,

¹⁹sunggu kieh biyŭn pinguman ngga kupai yŭn kaldi kaldi ami, samŭn ruti ngga wain yŭn dayung nyikŭn ku ka yŭn adŭp ku ngga daya-gaji ku. Kieh biyŭn sopŭrŭg-i adi kieh biguna.”

²⁰Nyamba dari anŭ nang, “Mandŭg ka ramin ku! Aku bisa nggen di angān kayuh adi raan ngan. Dŭhnyah nyirŭmŭn di pakan kupo.”

²¹Jadi ayŭh taban ngara ngga maad ka ramin adŭp-i, ka paan kaldi ngara. Ngara nyandong ramin-i, ngu kaja ngara ka guru man.

²² Ngara aŭn nyipawŭn adŭp-i ka gŭgŭh mandŭg bara dari adi sumbang urah mandŭg so kupo anŭ ka kirurung ramin anŭ ka piguru gutog tiban. Ngara nang di nyamba dari anŭ, “Taban ngga ruah dari anŭ adi mari ayō kuu! Kieh raan bisiket ngga ayŭh!”

²³Pak nyamba dari anŭ ruah ka sapa ka nang di ngara. “Dŭhnyah! Turung dŭhnyah ndai pingandai arap, adi kais mun anŭ! Ayŭh anŭ jerā ku.

²⁴Tingga! Agi dayung nyikŭn-i ngga anak dayung adŭp ku adi bujang tibŭn. Aku bisa taban ngara ngga ruah, ka angān bisa tambit ngara, ka pimunos adŭp ngan ngga ngara. Pak dŭhnyah ndai pingandai adi raru sipŭ anŭ di daya ati!”

²⁵Pak bara dari anŭ dŭh dingah pinganang-i. Jadi daya Levi anŭ tambit dayung nyikŭn-i anŭ, ka turak ayŭh ka sapa yŭn ngara. Ngara miragag dayung anŭ ka pijera ayŭh ndi ngarŭm ngarŭm anŭ ka dŭh rŭŭ rŭŭ ndŭg ka andu jawa.

²⁶Nga siri jawa, dayung anŭ mandŭg ka tumbang di bŭŭn tiban nyamba dari anŭ adi yŭn banŭh-i. Ayŭh gibabŭ diginŭ kan andu mbŭh jawa.

²⁷Banŭh-i makat isan isan anŭ, ka kan ayŭh kuka tiban amai re pijuu panu, ayŭh dapŭd dayung nyikŭn-i guring di rawa tiban buang tangan-i nyapai tiban.

²⁸Ayŭh nang, “Makat, ja meh panu.” Pak dayung anŭ dŭh nam. Jadi ayŭh tunduk tadang dayung anŭ ka na-i nyiparang kaldi-i, ka piguru panu mari ka ramin adŭp-i.

²⁹ Kan ayŭh mbŭh ndŭg ramin-i, ayŭh mŭrŭt arŭn ka tambit sinda. Ayŭh kapŭg tadang dayung nyikŭn-i anŭ simŭng duwŭh tatad, ka pait ndi ndi tatad ka barang tibaran-asar Israel adi simŭng duwŭh.

³⁰Barang naan daya adi kiris tatad anŭ nang, “Kieh gi-bŭn dingah kayuh adi mun ati! Mating kayuh adi mun ati mbŭh jadi ngitong so andu daya Israel ruah so Egypt! Ata dŭh siŭn dŭh bisatur ani re ata ndai?”