Read Biatah Bidayuh AKIM 2 Bible Online

AKIM 2 - Biatah Bidayuh bible

AKIM 2

¹Malaikat TUHAN matak so Gilgal di ka Bochim ka nang di bara daya Israel. “Aku tambit angān ngga ruah so Egypt ka taban angān ka tarun tana adi Aku muko bijanji di tayung-babuk ngan an nggen. Aku nang, ‘Simanya Ku ngga angān dŭh Aku re miranggar.

² Angān dŭh siŭn ndai tadŭ tadŭ simanya ngga daya adi rŭŭ di tarun tana anŭ. Angān dŭh siŭn dŭh nyirubuh mija-sambah ngara.’ Pak gŭt angān dŭh ndai kayuh adi Aku bada angān ndai. Angān mbŭh ndai kayuh adi Aku bŭn bada!

³Ngapŭi madin, Aku dŭh re pibu bara daya anŭ darŭm angān masang. Ngara re jadi pinganyu ngan,[6] ka angān re ripong di tapa ngara.”

⁴Kan malaikat anŭ muko nang sopŭrŭg kayuh anŭ, sopŭrŭg daya Israel rasu sien,

⁵anŭ meh sabab tarun anŭ dog kadŭn Bochim.[7] Diginŭ ngara jugan sadis ka TUHAN.

⁶Joshua bada bara daya Israel matak, ka barang naan ngara matak di tambit tung adŭp-i utung tana.

⁷Sitadŭn Joshua gibabŭ udip daya Israel bituan di TUHAN; ndŭg ka ripas pinyikabŭs-i ngara babŭ mun anŭ sitŭkŭd bara pinguru anŭ gibabŭ udip adi muko kiris ngga batŭh adŭp ngara sopŭrŭg pingandai bās adi TUHAN mbŭh ndai yŭn Israel.

⁸Urun TUHAN, Joshua anak Nun, kabŭs kan umbur-i mbŭh siratus simŭng sawa.

⁹ Ayŭh dog kubur di utung tana adŭp-i di Timnah Serah di rais tarun tana sandah Ephraim tura ka utara Darŭd Gaash.

¹⁰Sopŭrŭg adi darŭm turap takar anŭ kabŭs gŭh, ka turap bauh kambŭt TUHAN ngga sopŭrŭg kayuh adi Ayŭh mbŭh ndai yŭn Israel.

¹¹Komŭnŭ, daya Israel bidosa rawan TUHAN ka piguru bituan di Baal.

¹²Ngara mbŭh dŭh tia nyambah TUHAN, adi Tapa tayung-babuk ngara, Tapa adi muko taban ngara ruah so Egypt, ka piguru nyambah tapa tapa bŭkŭn, anŭ inŭh tapa bangsa daya adi rŭŭ maning ngara. Ngara mutu ubak ngara ka tapa tapa bangsa bŭkŭn ngga bada TUHAN baji.

¹³Ngara mbŭh dŭh tia nyambah TUHAN pak bituan di Baal ngga Astart.

¹⁴Ngapŭi TUHAN jadi raru baji di Israel ka bada bara pirupak nyerang ka mirupak ngara. TUHAN bada bara pinganyu adi maning ngara ngarah ngara. Daya Israel mbŭh dŭh tia tungang grindung adŭp-i.

¹⁵Barang saba ngara matak biperang, TUHAN rawan ngara, nimun adi ko-I kidaan di ngara. Ngara mbŭh darŭm susah bās.

¹⁶Muko anŭ, TUHAN tijuan bara pinguru adi bisa nyiramat daya Israel so bara pirupak.

¹⁷Pak bara daya Israel dŭh dingah pinganang bara pinguru ngara. Israel mbŭh dŭh tŭtŭd di TUHAN ka nyambah tapa tapa bŭkŭn. Bara babuk ngara tunda pesan TUHAN, pak turap bauh anŭ rikas raru dŭh tia ndai simŭnŭ.

¹⁸Kan TUHAN nggen di Israel pinguru, TUHAN turung pinguru anŭ, ka nyiramat daya Israel so pinganyu ngara sitŭkŭd pinguru anŭ gibabŭ udip. TUHAN masi di ngara amai sidaing ngara sitagar sangsara ngga jera-birasa.

¹⁹Pak kan bara pinguru anŭ kabŭs, daya Israel rasu pari ka aran pimudip amba ngara ka jadi rabis arap so turap adi diŭ. Ngara ari an nyambah tapa tapa bŭkŭn, ka andŭh andŭh tunda aran arap ngara.

²⁰Sabab anŭ TUHAN baji di Israel ka nang, “Bangsa ati mbŭh miranggar simanya adi Aku mbŭh bada tayung-babuk ngara sita. Amai ngara mbŭh nyibireu Aku,

²¹Aku re dŭh tia pibu tadŭ tadŭ bangsa adi gibabŭ darŭm tarun tana ati di andu Joshua kabŭs.

²²Aku re pakai ngara ngga tingga nang an kah abah bara daya Israel tunda aran Ku, nimun tayung-babuk ngara.”

²³Sabab anŭ meh TUHAN nyibandar bangsa bangsa bŭkŭn anŭ babŭ rŭŭ di tarun tana anŭ. TUHAN dŭh bada Joshua manang rawan ngara, ka dŭh gŭh pibu ngara ripas Joshua kabŭs.