Read Biatah Bidayuh AKIM 20 Bible Online

AKIM 20 - Biatah Bidayuh bible

AKIM 20

¹Sopŭrŭg daya Israel, so Dan di tura ka utara ndŭg Beersheba di tura ka Siratan, samŭn adi so tarun tana Gilead di tura ka timor, nam pinyibagan anŭ. Ngara tikuruk darŭm ndi tibaran bās di sirung jawin TUHAN di Mizpah.

²Bara pinguru sopŭrŭg tibaran-asar Israel agi darŭm udung bās bara daya TUHAN anŭ. Ka mbŭh agi pat ratus ribu naan soldadu adi panu kaja.

³Sitadŭn anŭ daya so tibaran-asar Benjamin dingah sopŭrŭg daya Israel adi bŭkŭn anŭ agi tikuruk di Mizpah. Bara daya Israel siken, “Kidaan di kieh munki sarah anŭ jadi?”

⁴Daya Levi adi dapu dayung nyikŭn adi dog siŭ anŭ nam, “Aku ngga dayung nyikŭn ku di ka kupo Gibeah di tarun tana Benjamin amai re nyirŭmŭn diginŭ.

⁵Bara daya di Gibeah mandŭg ngarŭm anŭ an tambit aku, ka kirurung ramin adi yŭn ami nyirŭmŭn. Ngara an siŭ aku; pak gŭt-i ngara miragag dayung nyikŭn ku ndŭg ka-i kabŭs.

⁶Aku tambit tadang-i ka kapŭg-i simŭng duwŭh tatad, ka pait ndi ndi tatad ka barang tibaran-asar Israel. Ngara anŭ mbŭh ndai pingandai sarah adi raru sipŭ di ruang ta.

⁷Sopŭrŭg ngan digiti mbŭh bara daya Israel. Ani re ata ndai pasar kayuh ati?”

⁸Sopŭrŭg daya samah makat mijog, ka nang, “Mating so ata re mari ka bari bait ka ramin adŭp-i.

⁹Ati inŭh kayuh adi re ata ndai; ata re taran dadu, ka mien kada daya bada nyerang Gibeah.[38]

¹⁰Ndi utung so simŭng bara dari di Israel re tukang sidia pinguman yŭn bara soldadu, adi bŭkŭn re di ngukum Gibeah[39] sabab pingandai sarah adi raru sipŭ ati adi ngara mbŭh ndai di ruang Israel.”

¹¹Sabab anŭ, sopŭrŭg dari di Israel nguruk adŭp ngara ngga ndi pinŭtŭn: nyerang kupo Gibeah.

¹²Jadi tibaran tibaran-asar Israel pait bara pinyisung ka sopŭrŭg tarun tana tibaran-asar Benjamin bada nang, “Ani meh pingandai sarah ati adi angān mbŭh ndai?

¹³Nyerah ka kieh ngara adi sumbang urah anŭ di Gibeah, isa kieh bisa siŭ ngara ka kadi arap ati so Israel.” Pak daya Benjamin dŭh tambit piduri di pinganang bara daya Israel adi bŭkŭn anŭ.

¹⁴So sopŭrŭg kupo tibaran-asar Benjamin, ngara di ka Gibeah re biperang rawan daya Israel adi bŭkŭn anŭ.

¹⁵Sopŭrŭg soldadu adi mandŭg so sopŭrŭg kupo daya Benjamin di andu anŭ adŭ agi duwŭh puru nŭm ribu naan bara dari. Nambah anŭ, bara daya di kupo Gibeah mbŭh nguruk ju ratus naan bara dari adi muko nakit dog mien[40] adi sibait. Barang naan ngara pandai nyitamŭng kayuh adi mati ndi sirah ubok ngga batuh ka bŭn re aset.

¹⁶

¹⁷Tibaran tibaran-asar Israel adi bŭkŭn mbŭh nguruk pat ratus ribu naan soldadu adi mbŭh pandai birawan.

¹⁸Bara daya Israel di ka tarun adi yŭn bisambah di Bethel, ka diginŭ ngara siken di Tapa, “Tibaran-asar aki adi patut diŭ matak nyerang daya Benjamin?” TUHAN nam, “Tibaran-asar Judah.”

¹⁹Jadi tibaran tibaran-asar Israel matak ngga isan isan andu jawa ndi, ka bibari sindŭk kupo Gibeah.

²⁰Ngara matak di nyerang bara soldadu daya Benjamin, ka ngatur bara soldadu-i di yŭn adi nura kupo anŭ.

²¹Bara soldadu daya Benjamin ruah so kupo, ka diŭ so andu ripuan ngara mbŭh siŭ duwŭh puru duwŭh ribu naan soldadu daya Israel.

²²Komŭnŭ daya Israel di ka tarun yŭn bisambah ka muās bara soldadu adi mbŭh kabŭs, di sirung jawin TUHAN ndŭg singumi andu. Ngara siken di TUHAN, “Patut kah kieh matak dinge di nyerang jurud madis ami bara daya Benjamin?” TUHAN nam, “Patut.” Pinganang anŭ mirasang bara soldadu daya Israel, ka ngara ngatur bara soldadu-i dinge di yŭn anŭ nimun di andu adi diŭ.

²³

²⁴Ngara makat di nyerang bara soldadu daya Benjamin, adi piduwŭh saba.

²⁵Ka piduwŭh saba anŭ gŭh bara daya Benjamin ruah so kupo Gibeah, ka saba anŭ ngara siŭ simŭng mai ribu naan soldadu Israel adi mbŭh pandai birawan.

²⁶Komŭnŭ sopŭrŭg daya Israel di ka Bethel ka muās diginŭ. Ngara tikuruk diginŭ di sirung jawin TUHAN, ka bipusa ndŭg singumi andu. Ngara jugan sadis bidingan ka mŭrŭng badang kada sadis di sirung jawin TUHAN.

²⁷Pati Simanya Tapa agi diginŭ di Bethel di jaman anŭ, ka Phinehas, adi anak Eleazar, ka sukuh Aaron adi jaga-i. Daya Israel siken di TUHAN, “Patut kah dŭh kieh makat dinge di rawan jurud madis ami daya Benjamin, puan kah dŭhsah tia?” TUHAN nam, “Di rawan ngara. Sipagi Aku re nggen pimanang di angān, ngarah ngara.”

²⁸

²⁹Jadi bara daya Israel ngatur kada soldadu bada bisukan maning Gibeah,

³⁰Komŭnŭ di andu adi taruh dinge ngara matak di nyerang bara soldadu daya Benjamin, ka ngatur bara soldadu ngara bada nura kupo Gibeah nimun adi mbŭh.

³¹Bara daya Benjamin ruah di birawan ka mbŭh jo ka sapa kupo. Nimun adi mbŭh, ngara piguru siŭ daya Israel di sapa kupo, di aran nuju Bethel ngga di aran nuju Gibeah. Ngara siŭ kurang rabis taruh puru naan daya Israel.

³²Bara daya Benjamin nang, “Ata mbŭh ngarah ngara dinge.” Pak bara soldadu daya Israel taŭn muko bisatur an ngundur isa daya Benjamin tadak ngara di aran aran jeh di sapa kupo Gibeah.

³³Jadi kan tibaran bās soldadu Israel mbŭh ngundur ka pari nguruk adŭp-i di Baaltamar, bara soldadu Israel adi bisukan maning Gibeah rasu ruah so tarun yŭn ngara bisukan di tarun adi pibatuh di sapa kupo.

³⁴Simŭng ribu naan bara dari, adi mbŭh nakit dog mien so dupan bara daya Israel, nyerang Gibeah. Ka diginŭ so-duwŭh parad, daya Israel ngga daya Benjamin samah bandar bandar birawan. Bara daya Benjamin dŭh rada adŭp-i re dog ngarah.

³⁵TUHAN nggen pimanang di Israel ngarah bara soldadu daya Benjamin. Bara daya Israel siŭ 25,100 naan pinganyu di andu anŭ,

³⁶ka bara daya Benjamin rada adŭp-i mbŭh arah. Tibaran bās soldadu Israel ngundur mangān soldadu daya Benjamin amai ngara bisangan di bara soldadu adŭp ngara adi bisukan maning kupo Gibeah.

³⁷Ngara anŭ rikas tudu kupo Gibeah ka rasu mŭrŭt ka darŭm-i ka siŭ barang naan daya diginŭ.

³⁸Tibaran adi bās soldadu Israel ngga adi bisukan mbŭh agi bipekat nggen tandā. Kan ngara kiris jambung asuh makat so darŭm kupo,

³⁹bara soldadu Israel adi birawan di sapa tarun dŭh siŭn dŭh pari. Nganŭ bara daya Benjamin muko siŭ taruh puru naan daya Israel. Ngara nang dupan adŭp ngara, “Sawŭ, ata mbŭh ngarah ngara dinge.”

⁴⁰Komŭnŭ tandā anŭ tatŭng; jambung asuh makat so darŭm kupo. Bara soldadu daya Benjamin kimat punok, ka mbŭh inga inga kiris kupo ngara mbŭh simadum ngga jireb apui.

⁴¹Komŭnŭ bara soldadu Israel pari, ka bara soldadu Benjamin mbŭh kandang-kandŭ taru, amai mbŭh rada adŭp ngara re arah.

⁴²Ngara ngundur so bara soldadu Israel jeh nuju sapa rais, pak ngara mbŭh dŭh tungang pirupas adŭp ngara. Ngara mbŭh tikapung di asah tibaran bās soldadu Israel ngga bara soldadu adi mbŭh aŭn ruah so darŭm kupo, ka ngara meh mbŭh sawŭ batur dog ngarah.

⁴³Bara soldadu daya Israel mbŭh mirakap bara pinganyu, ka ngara dŭh rŭŭ rŭŭ tadak buang siŭ bara soldadu daya Benjamin ndŭg ndi tarun di tura ka timor Gibeah.

⁴⁴Simŭng mai ribu naan soldadu Benjamin adi siabo pandai mbŭh dog siŭ.

⁴⁵Adi bŭkŭn bu nuju sapa rais di ka Batuh Rimmon. Rimŭh ribu naan ngara dog siŭ di aran. Soldadu Israel adu adu tadak ngara adi bŭkŭn ndŭg Gidom, ka siŭ duwŭh ribu naan ngara.

⁴⁶Prungun-i, agi duwŭh puru rimŭh ribu naan soldadu daya Benjamin dog siŭ di andu anŭ; sopŭrŭg-i soldadu adi pagan.

⁴⁷Pak nŭm ratus naan ngara adi tungang bu pirupas adŭp-i di ka sapa rais di ka Batuh Rimmon, ka ngara rŭŭ diginŭ sitian pat buran.

⁴⁸Bara soldadu Israel pari di rawan tadŭh bara soldadu daya Benjamin, ka siŭ sopŭrŭg ngara, dari dayung ngga anak-anya, ngga dāng dāng ani. Ngara sigot barang kupo adi di tarun tana anŭ.