Read Biatah Bidayuh AKIM 21 Bible Online

AKIM 21 - Biatah Bidayuh bible

AKIM 21

¹Kan bara daya Israel mbŭh tikuruk di Mizpah, ngara ndai payu ngga TUHAN: “Mating so kieh re nyibandar dari daya Benjamin sawŭn anak dayung ami.”

²Madin daya Israel di ka Bethel ka guru diginŭ di sirung jawin Tapa ndŭg singumi andu. Ngara muās ngga bana:

³“TUHAN Tapa Israel, mani kayuh ati jadi simuti? Mani tibaran-asar Benjamin mbŭh re miyap so Israel?”

⁴Isan isan andu jawa ndi bara daya makat ka pijog ndi mija-sambah diginŭ. Ngara jugan sadis bidingan ka mŭrŭng badang kada sadis.

⁵Ngara siken, “Agi kah tibaran so barang tibaran-asar Israel adi mating mandŭg tikuruk di sirung jawin TUHAN di Mizpah?” (Ngara mbŭh bipayu nang kambŭi agi tadŭ tadŭ daya mating sua di ka Mizpah re dog ukum kabŭs.)

⁶Daya Israel mbŭh susah kira jurud ngara daya Benjamin ka nang, “Andu ati, Israel mbŭh kinanyap ndi tibaran-asar so Israel.

⁷Ani re ta ndai ngga jiroh sawŭn yŭn bara dari daya Benjamin adi dŭm? Ata mbŭh bipayu ngga TUHAN nang ata dŭh re nggen anak anak dayung ta di ngara.”

⁸Kan ngara siken pasar agi ngga mating so tibaran-asar Israel adi mating sua tikuruk di Mizpah, ngara dapŭd ndi naan mating gŭh so Jabesh di Gilead sua di kamanŭ;

⁹kan dŭn dŭn bara soldadu dog bagan ndi naan daya so Jabesh mating gŭh nam.

¹⁰Jadi bara adi mbŭh tikuruk mritah simŭng duwŭh ribu naan bara soldadu adi siabo pagan, “Panu di siŭ sopŭrŭg daya di Jabesh, samŭn bara dayung ngga anak-anya.

¹¹Siŭ sopŭrŭg dari, ka sopŭrŭg dayung adi dŭh tibŭn.”

¹²Ngara dapŭd pat ratus dayung bujang tibŭn dupan bara daya di Jabesh, adi ngara taban ka tarun yŭn bibari di Shiloh di tarun tana Canaan.

¹³Komŭnŭ bara adi agi tikuruk anŭ pait pinganang ka bara daya Benjamin adi agi di Batuh Rimmon, mite dŭh tia biperang.

¹⁴Bara daya Benjamin pari, ka bara daya Israel adi bŭkŭn anŭ nggen di ngara bara dayung adi so Jabesh adi ngara dŭh siŭ. Pak bara dayung anŭ dŭh sadang bagŭ yŭn ngara.

¹⁵Bara daya mbŭh raru susah di bara daya Benjamin sabab TUHAN mbŭh kadi bŭŭng bisindi tibaran tibaran-asar Israel.

¹⁶Jadi bara pinguru di tika tikuruk anŭ nang, “Mbŭh mating tia bara dayung di tibaran-asar Benjamin. Simuki meh ata re jiroh dayung yŭn bara dari adi dŭm anŭ?

¹⁷Israel dŭh siŭn kinanyap ndi so simŭng duwŭh tibaran asar-i. Ata dŭh siŭn dŭh jiroh aran ngga kudip tibaran-asar Benjamin,

¹⁸pak ata dŭh bisa bada ngara tambit anak dayung ta, sabab ata muko ndai pangu di tunduh tadŭ tadŭ daya adi nyibandar daya Benjamin tambit anak dayung-i ndu sawŭn.”

¹⁹Komŭnŭ ngara bipikir, “Gawai sawa TUHAN di Shiloh mbŭh sindŭk.” (Shiloh inŭh tura ka utara Bethel, tura ka siratan Lebonah, ka tura ka timor aran di asah Bethel ngga Shechem.)

²⁰Ngara nang di bara daya Benjamin, “Panu di bisukan di arong teya anggor

²¹ka bijaga. Kan bara dayung bujang di Shiloh ruah re bitanda di tika gawai, angān ruah so teya anggor. Barang naan angān sirapas dayung ndu sawŭn so tibaran dayung anŭ ka taban-i pari ngga adŭp ngan ka tarun tana Benjamin.

²²Kambŭi sama puan kah jurud dari ngara mandŭg ka angān[41] ka matah, angān[42] bisa kidaan di ngara, ‘Turung bada kieh tambit ngara, amai kieh dŭh tambit ngara so angān darŭm biperang, bada jadi sawŭn ami. Ka amai angān dŭh nggen ngara di kieh, angān dŭh miranggar payu ngan.’ ”

²³Bara daya Benjamin ndai nimun dog bada; barang naan ngara mien yŭn adŭp-i dayung so bara dayung bujang adi bitanda di Shiloh ka taban dayung anŭ ngga bu. Komŭnŭ ngara pari ka tarun tana adŭp ngara, pari pijog kupo kupo ngara, ka rŭŭ diginŭ.

²⁴Nganŭ gŭh bara daya Israel bu, barang naan pari ka tibaran-asar adŭp-i, ka rawang ngga tana adŭp-i.

²⁵ Di jaman anŭ gi-mating raja di Israel. Barang naan daya ndai tadŭ mun kayuh nanyam pinyiraan adŭp-i.