Read Biatah Bidayuh AKIM 3 Bible Online

AKIM 3 - Biatah Bidayuh bible

AKIM 3

¹Ngapŭi meh TUHAN kidŭm kada bangsa di tarun tana anŭ ngga suba daya Israel adi mating sua kinyam perang di Canaan.

²Ayŭh ndai simŭnŭ adŭ-i ngga ngajar barang turap bauh daya Israel pasar perang, rabis-i ngara adi gi-bŭn sua biperang.

³Anŭ adi gibabŭ di tarun tana anŭ inŭh rimŭh kupo daya Philistine, sopŭrŭg daya bangsa Canaan, daya bangsa Sidon, ka daya bangsa Hivi adi rŭŭ di gadung Darŭd Lebanon so Darŭd Baal Hermon ndŭg Ateng Hammath.

⁴Ngara anŭ inŭh ngga suba daya Israel, ngga tingga re daya Israel tunda ka dŭh pesan adi TUHAN ko nggen di tayung-babuk ngara so baba Moses.

⁵Sabab anŭ meh daya Israel rŭŭ bigaur ngga daya Canaan, daya Hitti, daya Amor, daya Periz, daya Hivi, ka daya Jebus.

⁶Ngara banan sawan ngga bangsa bangsa anŭ ka sua nyambah tapa tapa ngara.

⁷Daya Israel mbŭh kambŭt TUHAN adi Tapa ngara; ngara bidosa rawan Ayŭh ka nyambah tibudo tibudo Baal ngga Asherah.

⁸Jadi TUHAN raru baji di daya Israel ka bada Cushan Rishathaim adi Raja Mesopotamia piurun ngara. Ngara dog mritah raja anŭ sitŭkŭd mai sawa.

⁹Komŭnŭ daya Israel mite turung so TUHAN, ka Ayŭh pait daya da pirupas ngara. Ayŭh anŭ Othniel, anak Caleb adi sude Kenaz.

¹⁰Roh TUHAN nguasa ayŭh, ka ayŭh jadi pinguru Israel. Othniel di matak biperang, ka TUHAN bada ayŭh manang rawan raja Mesopotamia.

¹¹Ka damai meh agi di tarun tana anŭ sitŭkŭd pat puru sawa. Ripas anŭ Othniel kabŭs.

¹²Daya Israel bidosa rawan TUHAN dinge. Sabab anŭ TUHAN bada Raja Eglon so Moab bake dŭ so Israel.

¹³Eglon bipambit ngga daya Ammon ka daya Amalek; ngara ngarah Israel ka sirabut Jericho, kupo tŭngŭn kurma.

¹⁴Daya Israel dog mritah Eglon sitian simŭng mai sawa.

¹⁵Komŭnŭ daya Israel mite turung so TUHAN, ka Ayŭh pait daya da pirupas ngara. Ayŭh anŭ Ehud, daya adi sibait ndai kayuh, adi anak Gera, so tibaran-asar Benjamin. Daya Israel pait Ehud di ka Raja Eglon di Moab da taban takŭd ka ayŭh.

¹⁶Ehud mbŭh ndai yŭn adŭp-i pedang adi duwŭh siid-i, sindŭk rimŭh puru sentimita ambu-i. Ayŭh nakin-i tura ka tauh-i ka dog nutu piraka-i.

¹⁷Komŭnŭ ayŭh taban takŭd anŭ ka Eglon, adi mbŭh taŭn daya adi raru gamu.

¹⁸Kan Ehud muko nggen takŭd anŭ di ayŭh, ayŭh bada ngara adi kabis-i pari maad.

¹⁹Pak adŭp Ehud, so arong batuh batuh adi dog mŭŭt di Gilgal, pari ka Eglon, ka nang, “Tuan Raja, aku agi taban agah ka kaam, agah adi dŭh daya bŭkŭn siŭn puan.” Jadi raja mritah bara daya gaji-i, “Tandah kieh sadi digiti!” Ka ngara sopŭrŭg samah ruah ka sapa.

²⁰Komŭnŭ, darŭm raja aŭn guru sadi diginŭ darŭm birit adi madud di tibung ramin, Ehud di ka yŭn-i ka nang, “Aku agi pinganang so Tapa yŭn mai.” Raja rasu mijog.

²¹Ngga tangan bait-i Ehud nyitak pedang so tura ka tauh-i ka tabŭk tain raja ngga pedang anŭ.

²²Pedang anŭ abo mŭrŭt, samŭn ubak-i ka dog marut ramak. Ehud dŭh tarik-i so tain raja, ka-i birambus ka punok di asah kaja-i.[8]

²³Komŭnŭ Ehud ruah ka sapa, tŭŭp tiban tiban, ngabŭt sopŭrŭg-i,

²⁴ka bu. Bara daya-gaji mandŭg ka kiris tiban tiban dog ngabŭt, pak ngara pikir raja agi di darŭm, bijamban.

²⁵Ngara kajŭn nanyam patut-i, pak kan ayŭh gibabŭ dŭh kuka tiban, ngara tambit kusi ka kuka-i. Ka diginŭ meh ngara kiris tuan ngara mbŭh gatang gatang di tunduh samen, kabŭs.

²⁶Ehud bu sitadŭn ngara kajŭn. Ayŭh bu murah batuh batuh adi dog mŭŭt, di ka Seirah.

²⁷Kan ayŭh mbŭh ndŭg nŭ di rais tarun tana sandah Ephraim, ayŭh mambak trompet ngga bagan bara daya Israel bada matak biperang; komŭnŭ ayŭh nguru ngara mūn dudu sandah anŭ.

²⁸Ayŭh kidaan di ngara, “Tunda aku! TUHAN mbŭh nggen di angān pimanang ngarah pinganyu ngan, daya Moab.” Jadi ngara tunda Ehud mūn ka sirabut tarun adi yŭn daya daya Moab re mutas Jordan; ngara dŭh nyibandar tadŭ tadŭ so bara pinganyu mutas.

²⁹Di andu anŭ ngara siŭ kurang rabis simŭng ribu naan soldadu daya Moab adi siabo bake ka adi pandai birawan; ndi mating gŭh so ngara tungang pirupas adŭp-i.

³⁰Di andu anŭ daya Israel ngarah daya Moab, ka mbŭh agi damai di tarun tana anŭ sitŭkŭd mai puru sawa.

³¹Pinguru adi bauh inŭh Shamgar anak Anath. Ayŭh gŭh pirupas Israel, kan-i siŭ nŭm ratus daya Philistine pakai basi adi ambu anŭ adi ngga nguru sapi.