Read Biatah Bidayuh AKIM 9 Bible Online

AKIM 9 - Biatah Bidayuh bible

AKIM 9

¹Abimelech, adi anak Gideon, di ka Shechem, di yŭn sopŭrŭg jurud madis sindŭ-i rŭŭ, ka kidaan di ngara

²bada siken daya di Shechem, “Aki adi raan ngan? Raan sopŭrŭg anak Gideon adi ju puru naan mritah angān puan kah bada ndi naan adŭ? Ingat nŭh Abimelech inŭh isin ngga deya adŭp ngan.”

³Jurud madis sindŭ Abimelech minyu di bara daya di Shechem pasar kayuh anŭ yŭn-i, ka bara daya di Shechem matŭd rundeng ngara an tunda Abimelech sabab ayŭh madis ngara.

⁴Ngara nggen di ayŭh 70 kiping pirak adi so bari-sambah Baal-Berith, ka ngga duit anŭ ayŭh ngupah ndi tibaran daya arap bada tunda adŭp-i.

⁵Ayŭh di ka ramin sama-i di Ophrah, ka diginŭ di tunduh ndi tibande batuh ayŭh siŭ bara jurud-i adi anak Gideon adi ju puru naan. Pak Jotham, anak sibusu Gideon, bisukan ka dŭh dog siŭ.

⁶Komŭnŭ sopŭrŭg daya di Shechem ngga di Bethmillo tikuruk ka di ka yŭn tŭngŭn oak pirapu' di Shechem, di yŭn ngara garar Abimelech jadi raja.

⁷Kan Jotham dingah pasar kayuh anŭ, ayŭh di ka mijog di tibung Darŭd Gerizim ka nyirais nang di ngara, “Dingah kayuh nang ku, angān daya Shechem, ka Tapa re dingah angān!

⁸Agi ndi andu, tŭngŭn tŭngŭn kayuh tikuruk ka mien raja yŭn adŭp ngara. Ngara nang di tŭngŭn kanā, ‘Jadi raja ami.’

⁹Tŭngŭn kanā nam, ‘Kambŭi aku mritah angān, aku tatu dŭh re tia piruah inyo, adi ngga kibās tapa tapa ngga manusia.’

¹⁰Ka tŭngŭn tŭngŭn kayuh anŭ nang di tŭngŭn ara, ‘Kuu nŭh jadi raja ami.’

¹¹Pak tŭngŭn ara nam, ‘Kambŭi aku mritah angān, aku tatu dŭh re tia piruah buwa ku adi sidi.’

¹²Jadi tŭngŭn tŭngŭn kayuh anŭ nang di tŭngŭn anggor, ‘Kuu nŭh jadi raja ami.’

¹³Pak tŭngŭn anggor anŭ nam, ‘Kambŭi aku mritah angān, aku tatu dŭh re tia piruah ju anggor ku adi bada tapa tapa ngga manusia gaŭn.’

¹⁴Sabab anŭ meh sopŭrŭg tŭngŭn kayuh anŭ nang di tŭngŭn reja, ‘Kuu adŭ nŭh jadi raja ami.’

¹⁵Tŭngŭn reja nam, ‘Kambŭi angān tŭk sawŭ raan bada aku jadi raja ngan, mandŭg garang ka nyayung adŭp ngan di sayung ku. Kambŭi angān dŭh, apui re bijagu ruah so daan ku adi pireja ka badang sopŭrŭg tŭngŭn sedar di Lebanon.’

¹⁶“Jadi madin,” Jotham pijuu minyu, “Sawŭ batur ngga tŭnggŭn kah atin ngan di tika angān bada Abimelech jadi raja? Agi kah angān biyŭn stabi di pinyikana Gideon, ka nakit ngga rawang-i, nimun kraja pingandai kana-i patut dog rapas.

¹⁷Ingat nŭh sama ku biperang yŭn ngan. Ayŭh mbŭh ruban asŭng-i nyiramat angān so daya daya Midian.

¹⁸Pak andu ati angān mbŭh rawan rawang sama ku. Angān siŭ bara anak-i adi ju puru naan di tunduh ndi tibande batuh -- ka sitagar Abimelech, anak-i adi dog biranak so daya gaji-i, adi madis ngan, angān mbŭh bada ayŭh jadi raja di Shechem.

¹⁹Jadi madin, kambŭi kayuh adi ndai ngan andu ati di Gideon ngga di rawang-i sawŭ batur ngga tŭnggŭn, gaŭn meh garang ngga Abimelech ka bada ayŭh samah gaŭn ngga angān.

²⁰Pak kambŭi dŭh, isa-i apui bijagu ruah so Abimelech ka badang sopŭrŭg daya di Shechem ngga di Bethmillo. Isa-i apui bijagu ruah so bara daya Shechem ngga Bethmillo ka badang Abimelech.”

²¹Ka sabab ayŭh taru kaka-i Abimelech, Jotham bu ka di rŭŭ di Beer.

²²Abimelech mritah Israel taruh sawa.

²³Komŭnŭ Tapa bada Abimelech ngga daya daya di Shechem tiru di dingan-i; ka ngara makat rawan Abimelech.

²⁴Anŭ mbŭh jadi isa Abimelech ngga daya daya Shechem, adi ngatat ayŭh bada siŭ anak anak Gideon adi ju puru naan, dog ukum yŭn sarah adŭp ngara.

²⁵Bara daya di Shechem bada daya tuman Abimelech di tibung tibung darŭd, ka mirupak barang naan daya adi murah tarun anŭ. Abimelech dog kidaan pasar kayuh anŭ.

²⁶Jadi Gaal adi anak Ebed mandŭg ka Shechem ngga bara jurud dari-i, ka daya daya di Shechem na atin sabah ngara di ayŭh.

²⁷Sopŭrŭg ngara di ka teya anggor ngara ka ngatŭm buwa anggor, ndai wain ngga ju anggor, ka ngara kuka gawai. Ngara di ka bari-sambah tapa ngara, di yŭn ngara man nok ka ndai tapat di tunduh Abimelech.

²⁸Gaal nang, “Ata ati daya adi rŭŭ di Shechem. Mani ata bituan di Abimelech? Asi ayŭh? Anak Gideon! Ka Zebul di ribo kuasa-i, pak mani ata bituan di ayŭh? Nundok di babuk ngan Hamor, ayŭh adi puun manak ngan!

²⁹Kasi kambŭi aku adi jadi pinguru bara daya ati! Aku kadi Abimelech! Aku kidaan[17] di ayŭh, ‘Nguruk bara soldadu mu, mandŭg ruah ka birawan!’ ”

³⁰Zebul, adi mritah di kupo anŭ, jadi raru baji kan-i dingah pinganang Gaal.

³¹Ayŭh pait bara pinyisung bada di bidapŭd ngga Abimelech di Arumah bada nang, “Gaal anak Ebed ngga bara jurud-i mbŭh mandŭg ka Shechem, ka ngara dŭh re bada kuu mŭrŭt kupo.

³²Ngapŭi madin, kuu ngga bara daya mu patut matak singarŭm ka bisukan di arong teya.

³³Makat isan isan andu sipagi kan batŭh andu mbŭh nusak ka nyirŭgŭh nyerang kupo anŭ. Komŭnŭ kan Gaal ngga bara daya-i ruah rawan kuu, rawan ngara ngga situngang tungang mu!”

³⁴Abimelech ngga sopŭrŭg bara daya-i matak singarŭm ka bisukan di sapa Shechem darŭm pat tibaran.

³⁵Kan Abimelech ngga bara daya-i kiris Gaal ruah ka mijog di rawa tiban-bās kupo, ngara makat ruah so tarun adi yŭn ngara bisukan.

³⁶Gaal kiris ngara ka nang di Zebul, “Tingga! Agi bara daya mandŭg mūn so tibung tibung darŭd!” “Anŭ dŭh manusia,” Zebul nam. “Anŭ inŭh singangi adŭ di tibung tibung darŭd.”

³⁷Gaal nang dinge, “Tingga! Agi bara daya mūn dūg darŭd ka ndi tibaran mandŭg kadŭg aran adi so tŭngŭn oak adi daya adi pandai kidaan nasip dapu!”

³⁸Komŭnŭ Zebul nang di ayŭh, “Diki meh sopŭrŭg piminyu ranggung mu? Kuu inŭh adi nang mani ata sah bituan di Abimelech. Ngara anŭ inŭh bara daya adi kuu muko bandar bandar ngamun. Panu meh ruah di rawan ngara.”

³⁹Gaal taban bara daya di Shechem ruah di rawan Abimelech.

⁴⁰Abimelech tadak Gaal, ka Gaal bikaduh mangān ayŭh. Bagŭ adi mbŭh biragan, ka di tiban-bās kupo ani.

⁴¹Abimelech rŭŭ di Arumah, ka Zebul pibu Gaal ngga bara jurud dari-i so Shechem, isa ngara dŭh tia rŭŭ diginŭ.

⁴²Andu adi ndi Abimelech mbŭh dog kidaan nang bara daya di Shechem mbŭh birundeng re di ruah ka teya,

⁴³jadi ayŭh taban bara daya-i, kutung ngara bada jadi taruh tibaran, ka bisukan di arong teya, kajŭn. Kan ayŭh kiris daya ruah so kupo, ayŭh ruah so yŭn-i bisukan di siŭ ngara.

⁴⁴Darŭm Abimelech ngga tibaran-i bikaduh tudu tiban-bās kupo ka jaga-i, tibaran adi duwŭh anŭ di nyerang bara daya anŭ di arong teya ka siŭ sopŭrŭg ngara.

⁴⁵Ngara birawan ndi andu andu. Abimelech sirabut kupo anŭ, ka siŭ bara daya-i, nyirubuh kupo anŭ, ka nabur garo di tana.

⁴⁶Kan sopŭrŭg pinguru di kuta di Shechem dingah pasar kayuh anŭ, ngara bisukan di birit bās di ribo bari-sambah El-Berith.

⁴⁷Abimelech mbŭh dog kidaan nang ngara agi tikuruk diginŭ,

⁴⁸jadi ayŭh maad Darŭd Zalmon ngga bara daya-i. Diginŭ ayŭh tambit kapak, kapŭg ndi daan kayuh, ka gŭrŭng-i. Ayŭh bada bara daya-i rikas ndai simŭnŭ gŭh.

⁴⁹Jadi barang naan ngara japa daan kayuh, ka tunda Abimelech nugung daan daan kayuh di baŭm tiban birit bās di ribo bari-sambah anŭ. Ngara sigot-i, samŭn daya adi darŭm-i, ka sopŭrŭg daya adi darŭm birit anŭ kabŭs -- kurang rabis siribu naan bara dari ngga bara dayung.

⁵⁰Komŭnŭ Abimelech di ka Thebez, kirurung kupo anŭ, ka sirabut-i.

⁵¹Diginŭ agi tawā adi raru tagap, ka barang naan dari ngga dayung darŭm kupo anŭ, samŭn bara pinguru, bikaduh di kamanŭ. Ngara ngabŭt adŭp ngara di darŭm-i ka maad ka tibung-i.

⁵²Di tika Abimelech mandŭg di nyerang tawā anŭ, ayŭh di ka tiban-i di sigot tawā anŭ.

⁵³ Pak ndi naan dayung buān batuh kisar so sambu bada nyatŭk ubak-i ka tikurok-i pape.

⁵⁴Ka ayŭh bigaut bagan ndi naan bujang dari adi tukang taban sinyata-i ka kidaan di ayŭh, “Nyitak pedang mu ka siŭ aku. Aku dŭh raan daya nang aku kabŭs dog siŭ dayung.” Ka bujang dari anŭ tabŭk ayŭh ngga pedang-i, ka ayŭh kabŭs.

⁵⁵Kan bara daya Israel kiris Abimelech mbŭh kabŭs, sopŭrŭg ngara mari.

⁵⁶Simŭnŭ inŭh Tapa maras Abimelech sabab sarah-i di tunduh sama-i, anŭ inŭh siŭ jurud-i adi ju puru naan.

⁵⁷Tapa bada gŭh daya Shechem sangsara sabab udip ginaka ngara, nimun adi Jotham anak Gideon muko nang di andu ayŭh mangu ngara.