Read Biatah Bidayuh JUDE 1 Bible Online

JUDE 1 - Biatah Bidayuh bible

JUDE 1

¹ So Jude, adi urun Jesus Kristus, ka jurud James, nuju ngara adi mbŭh dog bagan Tapa, adi udip darŭm pinyirindu Tapa Sama ka adi dog grindung Jesus Kristus:

²Isa-i masi, damai, ka pinyirindu Tapa agi ngga angān ngga sipuno-i.

³Angān adi aku rindu, aku ko ngga situngang tungang ku nuris ka angān pasar pinyiramat anŭ adi samah ta dapu, kan aku kinyam raru biguna-i aku rasu nuris surat ati ngga ngatat angān da pijuu birawan yŭn pinyabah anŭ adi ndi sidah yŭn adu adu Tapa mbŭh nggen di daya-I.

⁴Amai agi kada daya adi dŭh stabi di Tapa, dŭh ata rada, mbŭh mŭrŭt ka darŭm tibaran ta. Ngara nikok marik agah pasar pinyirasi-mandis Tapa ta ngga-i nyibandar pimudip-i adi dŭh tatu darŭm pingandai kais, ka tirawan Jesus Kristus, adi Tuan ka Tuhan ta adi ndi adŭ. Ndun jah Surat-kudus ko ninjau ukum adi ngara mbŭh trima.

⁵ Amai sunggu angān puan sopŭrŭg kayuh anŭ, aku raan kidaan isa angān dŭh kambŭt munki Tuhan[1] ko pirupas daya Israel so Egypt, pak komŭnŭ Ayŭh pirabur ngara adi dŭh sabah.

⁶Ingat bara malaikat adi dŭh bijijŭ darŭm kuasa ngara, ndŭg ka tagan yŭn pinyirŭŭ ngara: ngara dog muak darŭm karŭm di rasan ong ngga parik basi ruro, di yŭn Tapa kurung ngara yŭn dog nunggu di Andu Bisara.

⁷ Ingat ngan Sodom ngga Gomorrah, ka kupo kupo adi maning-i; pingandai daya-i brimun ngga pingandai bara malaikat anŭ, adi mbŭh sungak darŭm pingandai kais. Ngara mbŭh kinyam ukum darŭm apui neraka, adi jadi pinyibakan yŭn sopŭrŭg daya.

⁸Simŭnŭ gŭh, ngara anŭ adi nyipŭmŭh adi bada ngara bidosa di pŭrŭng adŭp ngara; ngara ngamun kuasa Tapa ka pimangŭh bara adi bragah di sambu.

⁹ Pingubak malaikat, Michael, bŭn-i ndai simŭnŭ. Darŭm kaii-i ngga Siarap, pasar asi so ngara adi re tambit pŭrŭng Moses, Michael dŭh birani nunggu Siarap ngga pinganang adi arap; adŭ-i nang, “Tuhan re ngukum kuu!”

¹⁰Pak bara daya anŭ kinarap kayuh adi ngara dŭh mirati; ka kayuh anŭ adi ngara puan so ka asŭng adŭ, mun gaya dāng, mbŭh tigŭrŭ kayuh adi pirusak ngara.

¹¹ Payah inŭh ngara! Ngara mbŭh tunda gaya Cain. Sitagar duit ngara mbŭh ndai sarah, mun sarah adi Balaam ko ndai. Ngara binasa amai rawan pritah, mun Korah.

¹²Ngga urah ngara adi mangŭh nŭŭh ngarun ngara mbŭh keya ka takar kais di dupan angān di tika tikuruk man. Ngara rada adŭp-i adŭ. Ngara mbŭh keya ka kruman dog poh sabak, pak dŭh taban ujen. Keya ka tŭngŭn kayuh adi dŭh buān, ndŭg ka di tipuh jaya ani, ka adi dog dimbut ndŭg uat-i ka kabŭs.

¹³Ngara mbŭh keya ka girumbang bās di rawŭt, ngga pingandai adi mangŭh nŭŭh ngarun kiren adŭp-i ngga bude-i. Keya ka bitang bitang di rangit, adi Tapa mbŭh sidia yŭn-i ruro di yŭn siabo karŭm.

¹⁴ Enoch inŭh, adi numbor ju tigŭrŭ tubu sesang so Adam, adi ko jah-i minyu-binabi sakati pasar ngara: “Tuhan re mandŭg ngga biribu ribu malaikat kudus-I

¹⁵di nggen ukum di sopŭrŭg daya, di nunggu ngara sabab sopŭrŭg urah ginaka ngara ka sabab pinganang arap adi daya bidosa adi dŭh stabi di Tapa ko piruah ngga rawan Ayŭh!”

¹⁶Ngara anŭ siraru mingungut buang nyarah daya; ngara tunda pinyiripong adŭp-i adi arap, muji adŭp-i ka nganju daya bŭkŭn yŭn dapŭd utung.

¹⁷Pak angān adi bara dingan ku, dŭh siŭn dŭh ingat kayuh adi bara pinyuruh Tuhan Jesus Kristus ko kidaan di angān.

¹⁸ Ngara nang di angān, “Kan sikasŭn tipuh mandŭg, agi daya re timbur adi re napat angān, ka adi tunda pinyiraan arap adŭp ngara.”

¹⁹Ngara inŭh adi nimbur kaii di dupan ngan, ngara adi dog nguasa tibiat pŭrŭng-i, ka adi dŭh biyŭn Roh Kudus.

²⁰Pak angān adi bara dingan ku, pijuu pijog adŭp ngan di pinyabah ngan anŭ adi siabo kudus. Simayang ngga kuasa Roh Kudus,

²¹ka bijijŭ darŭm pinyirindu-I, darŭm angān kajŭn Tuhan ta Jesus Kristus darŭm masi-I nggen di ata udip adi sawŭ adi tan adu adu.

²²Kiren masi di ngara adi kurang sabah;

²³nyiramat daya adi patut dog nyiramat, keya ka tarik ngara so apui; ka di ngara adi bŭkŭn kiren masi bigaur ngga taru, pak tiru di piraka ngara, adi mbŭh bitameg da pinyiripong pŭrŭng adi sarah.

²⁴Jugan puji ka Tapa adi Pinyikudip ta sabab Tuhan ta Jesus Kristus! Tapa sadi adŭ adi tungang kingat angān isa angān dŭh rabu, ka bada angān bisig ka gaŭn di sirung jawin bragah-I. So jah diŭ so sopŭrŭg kayuh jadi, madin ka ndŭg situi tui, ka Tapa inŭh bragah, stabi, bisa-pŭrŭg, ngga kuasa. Amen